दूरसञ्चार प्राधिकरणको अध्यक्षमा नियुक्त भूपेन्द्र भण्डारी को हुन् ?

A+ A A-

नियामक निकाय दूरसञ्चार प्राधिकरणको अध्यक्षमा भूपेन्द्र भण्डारी नियुक्त भएका छन् । आइतबार बसेको मन्त्रिपरिषद् बैठकले उनलाई सो पदमा नियुक्त गरेको हो । उनले नेपालको मात्र होइन, अन्तर्राष्ट्रियस्तरमै दूरसञ्चार, सूचना प्रविधि, बैंकिङ, फिनटेक, लेखा परीक्षण, कर तथा वित्त व्यवस्थापनको क्षेत्रमा अनुभव मात्र होइन, झण्डै २१ वर्षदेखि सफल नेतृत्व गर्दै आएका छन् ।

२०५४ सालमा त्रिभुवन विश्वविद्यालयबाट व्यवस्थापनतर्फ स्नातक पूरा गरेका भण्डारीले २०६२ मा भारतबाट चार्टर्ड एकाउन्टेन्ट अध्ययन गरेका थिए । इन्स्टिच्युट अफ चार्टर्ड एकाउन्टेन्ट्स भारतबाट २०६२ र इन्स्टिच्युट अफ चार्टर्ड एकाउन्टेन्ट्स नेपालको २०६४ मा सदस्यता प्राप्त गरेका भण्डारीले भारतमै चार्टर्ड एकाउन्टेन्ट्स फर्ममा तीनवर्षे अतिरिक्त तालिमसमेत लिएका थिए ।

भण्डारीले २०५९ देखि नेपालमा बैंकिङ क्षेत्रको नेतृत्व लिन सुरु गरेका थिए । उनले नेपाल–श्रीलङ्का मर्चेन्ट बैंक (हाल नबिल बैंकमा गाभिएको) मा कम्पनी सचिव एवं लेखा तथा वित्त प्रमुखको जिम्मेवारी लिएर वित्त तथा व्यवस्थापन क्षेत्रको नेतृत्व सुरु गरेका थिए । त्यसको एक वर्षपछि उनले मध्यपश्चिम क्षेत्रको नेपालगञ्जमा पहिलो विकास बैंकको रूपमा कर्णाली विकास बैंक स्थापनामा नेतृत्वदायी भूमिका निर्वाह गर्दै बैंकको संस्थापक बोर्ड सचिव तथा प्रमुख कार्यकारी अधिकृतको जिम्मेवारी सम्हालेका थिए । सशस्त्र द्वन्द्वका बीचमा ग्रामीण क्षेत्रमा वित्तीय पहुँच विस्तार गर्दै कर्णाली विकास बैंकलाई सफल बनाउन उनले महत्वपूर्ण भूमिका पनि निर्वाह गरेका थिए ।

त्यसको दुई वर्षपछि २०६२ मा सीएससी एण्ड कम्पनी चार्टर्ड एकाउन्टेन्ट्समा सिनियर अडिटरको रूपमा काम गरेका भण्डारीले एक वर्षपछि पशुपति विकास बैंक (हाल हिमालयन बैंकमा गाभिएको) मा प्रमुख कार्यकारीको रूपमा जिम्मेवारी सम्हालेका थिए । उनले पशुपति विकास बैंकको नेतृत्व मात्र लिएनन्, चार वर्षअघि सञ्चालनमा आएर पनि लाभांश नदिएर समस्याग्रस्त बनेको बैंकमा खराब वित्तीय स्थितिको व्यापक सुधार गरी एक वर्षभित्रै लाभांश दिने अवस्थामा पुर्‍याए ।

उनले भारतमा रहँदा पञ्जाव नेसनल बैंक, कार्पोरेसन बैंक, इन्डियन आयल कर्पोरेसनजस्ता स्थापित निकायमा लेखापरीक्षणको अनुभव प्राप्त गरिसकेका छन् । नेपाल र भारतमा विभिन्न निकायको कर तथा लेखा परीक्षणमा सल्लाहकारको भूमिका पनि निर्वाह गरिसकेका छन् ।

चार वर्ष बैंकिङ क्षेत्रको कुशल नेतृत्व गरेका भण्डारी २०६४ देखि दूरसञ्चार क्षेत्रको नेतृत्व लिने भूमिकामा आए । स्पाइस नेपाल प्रालि (मेरो मोबाइल)मा नायब प्रमुख वित्तीय अधिकृतको रूपमा सात महिना दूरसञ्चार क्षेत्रको नेतृत्व थालेका भण्डारीले सोही वर्षदेखि दूरसञ्चार क्षेत्रकै अन्तर्राष्ट्रिय अनुभव सुरु गरेका थिए ।

२०६४ मा अफ्रिकी मुलुक बुरुण्डीस्थित मोबाइल अप्रेटर कम्पनी लासेलको प्रमुख कार्यकारी अधिकृत बनेका भण्डारीले २०७२ सालसम्म आठ वर्ष सोही कम्पनीको नेतृत्वमा समय दिए । उनले रुग्ण कम्पनीको नेटवर्क सुचारु मात्र गरेनन्, तीन वर्षमै कम्पनीलाई नाफामा पुर्‍याए । त्यति मात्र होइन, उनको कुशल नेतृत्वको परिणाम काम थालेको चार वर्षमै लासेल बुरुण्डीको दोस्रो नम्बरको कम्पनी बन्न सफल भयो ।

२०७२ देखि २०७३ सम्म सिरायलिवनको इन्टरग्रुप टेलिकमको प्रमुख कार्यकारी अधिकृतको रूपमा नेतृत्व लिएका भण्डारी सोही वर्षको अन्तिमतिर पुनः बुरुण्डी मोबाइल नेटवर्क कम्पनी लासेलको कन्सल्ट्यान्टको भूमिकामा रहे । दश वर्ष लामो अन्तर्राष्ट्रिय अनुभव र दूरसञ्चार क्षेत्रको कुशल नेतृत्व गरेर २०७४ मा उनी नेपाल फर्किए । नेपाल फर्केपछि भण्डारी सूचना तथा सञ्चार प्रविधि क्षेत्रको नवीन विधा फिनटेकतर्फ प्रवेश गरे । उनी आफैँले पे नेप प्रालि स्थापना गरेर २०८० जेठ सम्म (छ वर्ष) त्यसको नेतृत्व गरे ।

२०८० असारमा भण्डारीको जिम्मेवारी बदलियो । नेपाल सरकार, मन्त्रिपरिषद्को निर्णयअनुसार भण्डारीले सञ्चार तथा सूचना प्रविधि मन्त्रालयमा सञ्चार तथा सूचना प्रविधि सल्लाहकारको जिम्मेवारी पाए । दूरसञ्चार तथा सूचना प्रविधि क्षेत्रमा भण्डारीको प्रवेशले सञ्चार मन्त्रालयका प्राथमिकता नै बदलिए । लामो समयदेखि मन्त्रालयभित्र रहेका विभिन्न निकायहरूका अनियमिताहरूको औपचारिक अध्ययनमार्फत छोटो समयको बीचमा भण्डारीले नेपालको दूरसञ्चारको क्षेत्रमा सुशासनको सुरुवात गर्न महत्त्वपूर्ण योगदान दिएका छन् ।

दूरसञ्चार क्षेत्रमा भएका भनिएका अनयिमतिताको गहिरो अध्ययन तथा प्रतिवेदन तयार, अनुमतिपत्र बहाल नरहेका दूरसञ्चार सेवा प्रदायकहरूको सम्पत्ति व्यवस्थापन नियमावली संशोधन, फ्रिक्वेन्सी नीति परिवर्तन, सेवाप्रदायकबाट भएका भनिएका कर छली र पुँजी पलायनका घटनाको शूक्ष्म अध्ययनजस्ता सुशासनका सवालमा भण्डारीले महत्त्वपूर्ण भूमिका निर्वाह गरेका छन् ।

नेपालमा सूचना प्रविधि क्षेत्रमा भए गरेका बेथितिहरू कानुनको परिधिभित्र ल्याई राष्ट्रको हितमा हुने गरी यो क्षेत्रबाट देशको अर्थतन्त्र र रोजगारी वृद्धिमा योगदान दिनुका साथै भरपर्दो तथा उच्च गुणस्तरको टेलिकम सेवाको सुनिश्चितता गरेर अगाडि बढ्ने उनको दृढ संकल्प छ ।

प्रकाशित मिति: सोमबार, फागुन ७, २०८० १६:११