पाेखरामा सुदन–सुमना सवालजवाफ : ओबामाले पाउरोटी बेच्न हुने, मैले पोछा लगाउन नहुने ?

पाेखरामा सुदन–सुमना सवालजवाफ : ओबामाले पाउरोटी बेच्न हुने, मैले पोछा लगाउन नहुने ?

A+ A A-

संस्कृति, पर्यटन तथा नागरिक उड्डयनमन्त्री सुदन किराँतीले आफ्नो कार्यकक्षमा सरसफाइ गरिरहेको भिडियो सामाजिक सञ्जालमा भाइरल छ । त्यसमा सरसफाइ कर्मचारी उभिएर हेरिरहेकी छन् भने मन्त्री किराँतीले पोछा लगाइरहेका छन् । यसमा मन्त्रीले कर्मचारीको सम्मान गरेकोदेखि पोछा लगाएर नाटक गरेकोसम्मका सकारात्मक र नकारात्मक दुवै खाले प्रतिक्रिया आइरहेका छन् ।

मन्त्री किराँतीले यो विषयमा पोखरा आएर स्पष्टीकरण दिएका छन् । नेपाल लिटरेचर फेस्टिबलको ‘कोही किन राजनीतिमा आउँछन् ?’ सत्रमा शुक्रबार उनी वक्ता थिए । सहजकर्ता वसन्त बस्नेतले यो प्रसंग उप्काएपछि बोल्दै मन्त्री किराँतीले उपल्लो तहका कर्मचारीले तल्लो तहकोलाई हेप्ने गरेको र त्यसलाई सच्याउनुपर्छ भनेर सन्देश दिन खोजेको बताए । त्यसमा उनले महिला कर्मचारी शारीरिक हिसाबले कमजोर रहेको र त्यो बेला आफूले हेरेर बस्न नसकेको समेत बताए ।

उनको यो जवाफपछि मञ्चमा भएका बीच सवाल–जवाफ सुरु भयो । मन्त्री किराँती बोलेपछि रास्वपा नेतृ तथा प्रतिनिधिसभा सदस्य सुमना श्रेष्ठ बोलिन् । कर्मचारी शारीरिक रूपमा अशक्त भए क्षमताअनुसार काम गर्ने ठाउँमा सरुवा गर्नुको सट्टा मन्त्रीले एकपटक काम गरेर देखावटी गरेको सुमनाले बताइन् । सत्रमा सहभागी प्रतिनिधिसभा सदस्य प्रदीप पौडेल र काठमाडौंको बूढानीलकण्ठ नगरपालिकाकी उपप्रमुख अनिता लामाले पनि मन्त्रीमाथि ‘फायर’ खोले । उपप्रमुख लामाले कर्मचारीलाई आडैमा उभ्याएर मन्त्री अनुत्तरदायी बनेको टिप्पणी गरिन् ।

यस्तो छ सवालजवाफ:

सुदन किराँती : हाम्रो देशको कार्यालय हेर्नुस् त आफूभन्दा माथिकोले कसरी पेल्छ ? म सधैँ त्यो ‘पोछा’ लगाउन भ्याउँदिनँ । मैले सन्देश दिन खोजेको मात्र हुँ । कोठा सरसफाइ गर्ने चेलीको दाहिनेको हड्डी खिइएको छ । ठूलठूला टेबुल सार्नुपर्छ । म कुर्सीमा बसेर कमजोर चेलीले टेबल सारेको मैले हेरिरहन सकिनँ । मन्त्रीले पनि यस्तो काम गर्दो रहेछ हामी पनि गरौँ भनेर मेरै मन्त्रालयको कर्मचारी सचेत होस् । यो संस्कृतिको कुरा पनि हो । कसैले गाली गरे, कसैले सपोर्ट गरे । नगर्नुपर्थ्यो । मलाई पनि हाकिम हुन मन छ । सुविधामै बस्न मन छ । तर, हामीले प्रतिकात्मक रूपमा सन्देश के दिने ? अमेरिकाको राष्ट्रपति भइसकेका ओबामाले पाउरोटी बेच्न हुने, सुदन किराँतीले पोछा लगाउन नहुने ? ठूलो मान्छेले कामै गर्न नहुने सामन्ती संस्कृति म खारेज गर्छु । मैले सक्ने र भ्याउने काम म गरिरहन्छु ।

सुमना श्रेष्ठ : तपाईंको आँखाअघि नभए पनि उहाँले काम गर्नुपर्ने हुन्छ । त्यसकारण यो ‘वान हिट ओन्डर भयो’ । गर्नुपर्ने चाहीँ उहाँको इन्स्योरेन्समा के छ र उहाँले काम गर्न नहुने रहेछ भने त्यो पो सिस्टमेटिक हुन्छ ।

सुदन किराँती : म प्राय गर्छु । मैले पशुपति सफा गरेँ । अरुतिर पनि गरेँ । पर्यटनको पहिलो आधार सफा हो । संस्कृति पनि सफा बस्नु हो । एक जना गाउँको भाइ ८ बजे बोलाएको ७ बजे मन्त्रालय आएछ । उसले भिडियो खिचेछ । मैले क्यामरा लगेर दिएको होइन । उहाँले भनेजस्तो सुविधामा सार्नुपर्थ्यो । त्यो पनि मिलाऊँला । गरौँला । अर्को ठाउँमा सार्ने नाममा जागिर खाइदिनु पनि भएको छैन । घरमा छोराछोरी छन् । सुझावप्रति धन्यवाद ।

अनिता लामा : त्यसले के सन्देश दियो भने जो महिला साइडमा हुनुहुन्थ्यो उहाँ टाइममा नआएर मन्त्रीले गर्नुपरेकोजस्तो देखाइयो । एउटा महिला कर्मचारीप्रति अलिकति अनुत्तरादायीजस्तो भिडियो आएको कुरा भएकाले उहाँको आवश्यकता पूरा गरेर अर्को भिडियो बनाउनुहोला, मन्त्रीज्यू ।