पुल्चोक क्याम्पसका विद्यार्थीहरूले विश्वस्तरीय कार्यक्रम 'टेडएक्सआईओई' आयोजना गर्दै

पुल्चोक क्याम्पसका विद्यार्थीहरूले विश्वस्तरीय कार्यक्रम 'टेडएक्सआईओई' आयोजना गर्दै

A+ A A-

पुल्चोक क्याम्पसका विद्यार्थीहरूले यही फागुन ९ गते विश्वस्तरीय कार्यक्रम टेडएक्सआईओई आयोजना गर्ने भएका छन् । ललितपुरको च्यासलस्थित ज्यापू प्रज्ञा भवनमा आयोजना हुनेे सो कार्यक्रमको गोल्ड पाटनरमा हाइपर्स, मार्केटिङ पाटनरमा एट ग्रुप्स र टिकेटिङ पार्टनरमा खल्ती रहेको आयोजकले जनाएका छन् ।

कार्यक्रममा विभिन्न क्षेत्रहरूमा आफ्नो नाम बनाएका व्यक्तित्वहरूले आ–आफ्नो भनाइ प्रस्तुत गर्ने बताइएको छ । टेडएक्सआईओई पुल्चोकले नयाँ विचारधारा बोकेका नेतृत्वहरू, नवीन प्रयोग गर्ने आविष्कारकहरू र नवप्रवर्तनका सर्जकहरूलाई आफ्ना विचारहरू र अन्तर्दृष्टिहरू नेपाल र विश्वव्यापी रूपमा रहेका दर्शकहरूसँग साझा गर्ने प्लेटफर्मको विकास गर्ने लक्ष्य राखेको छ ।

अमेरिकाको प्रख्यात 'टेडएक्स टक्स'बाट प्रेरित यस कार्यक्रमले अर्थपूर्ण छलफल र समाजमा सकारात्मक परिवर्तन ल्याउने अपेक्षा राखिएको छ । टेडएक्सआईओई पुल्चोकका विद्यार्थीद्वारा आयोजना गरिएको पहिलो संस्करणले पुल्चोक क्याम्पस समुदायका लागि एक महत्वपूर्ण कोसेढुङ्गा हुने आयोजकको विश्वास छ । यसले विद्यार्थीहरूको प्रतिभा र लगनशीलतालाई पनि विश्वव्यापी मञ्चमा प्रदर्शन गर्नेछ ।

कार्यक्रमका वक्ताहरूमा संघीय सांसद सुमना श्रेष्ठ, अर्थशास्त्री तथा राष्ट्रिय योजना आयोगका सदस्य रमेश पौडेल, प्रशिक्षक खेम लकईलगायत धेरै प्रतिष्ठित व्यक्तित्वहरूको सहभागिता रहनेछ ।सहभागीहरूले कार्यक्रममा आफ्ना विचारहरूका साथसाथै अन्तर्क्रियात्मक छलफलहरू गर्ने बताइएको छ ।

कारिब ३०० दर्शक भित्र्याउने लक्ष्य राखिएको टेडएक्सआईओईमा ८ घण्टा लामो सत्र हुने र यसबाट प्रेरित भएर समाज, देश र विश्वकै हितका लागि थोरै भए पनि भूमिका निर्वाह गर्न सकिन्छ भन्ने आयोजकको विश्वास छ । कार्यक्रमको टिकट खल्ती एपबाट सजिलै खरिद गर्न सकिने आयोजकले बताएका छन् ।