विश्वप्रकाश शर्माको प्रतिवेदन: गठबन्धनमा बसेर स्वतन्त्र गतिविधि गर्न हामी स्वतन्त्र छैनौँ

विश्वप्रकाश शर्माको प्रतिवेदन: गठबन्धनमा बसेर स्वतन्त्र गतिविधि गर्न हामी स्वतन्त्र छैनौँ

A+ A A-

नेपाली कांग्रेसका महामन्त्री विश्वप्रकाश शर्माले कोशी प्रदेशमा सरकार बनाउँदा र राष्ट्रियसभा निर्वाचनको नतिजाले माओवादी केन्द्रसँग सम्बन्ध बिग्रिने अवस्थामा पुगेको बताएका छन् ।

बिहीबारबाट सुरु केन्द्रीय समिति बैठकमा महामन्त्री शर्माले पेस गरेको राजनीतिक प्रतिवेदनमा कोशी प्रकरणपछि माओवादीसँगको सम्बन्ध विश्वासका आधारमा अघि बढाए मात्र गठबन्धन पाँच वर्ष चल्ने उल्लेख छ । महामन्त्री शर्माले कोशीमा सरकार गठनदेखि राष्ट्रियसभा चुनावसम्ममा देखिएका असन्तोषको समीक्षा गरी सहमति गर्न आवश्यक रहेको बताएका छन् ।

'कोशी प्रदेशमा पछिल्लोपटक सरकार बनाउँदा र राष्ट्रियसभा चुनावमा माओवादीका उम्मेदवार पराजित हुँदा सहयात्री दलले हामीप्रति असन्तोष प्रकट गरेको स्थिति छ । यो घटनाक्रमलाई गम्भीर समीक्षा गर्न, कमजोरी पहिचान गर्न र सहमतिपूर्वक निदान पहिल्याउन जरुरी छ,' प्रतिवेदनमा उल्लेख छ ।

कोशीमा कांग्रेसभित्रैबाट विद्रोह भएर प्रदेश सरकार गठन भएको र त्यसले कांग्रेसभित्र द्वन्द्व सिर्जना भएको प्रतिवेदनमा उल्लेख छ । ‘माओवादीसँग त्यसबेला कायम रहन नसकेको समझदारी राष्ट्रियसभाको निर्वाचन परिणामपछि झनै समस्याको चपेटामा परेको छ । गठबन्धनको सरकार पाँच वर्ष चल्नुपर्छ भन्ने अपेक्षा, निर्णय र चाहना बोकिरहँदा समस्याको ढाकछोपले होइन, खुला छलफल र आपसी विश्वासले मात्र त्यो सम्भव हुने तथ्य भुल्न मिल्दैन,’ प्रतिवेदनमा भनिएको छ ।

केन्द्र र प्रदेश दुवै ठाउँमा विश्वासको निश्चित आधारमा काम गर्न सकिएन भने गठबन्धनको भविष्य संकटमा पर्ने महामन्त्री शर्माको प्रतिवेदनमा उल्लेख छ । ‘हामीले के हेक्का राख्नैपर्छ भने गठबन्धन छोड्न हामी कुनै पनि दल स्वतन्त्र छौँ । तर, गठबन्धनमा रहेर स्वतन्त्र गतिविधि गर्न हामी स्वतन्त्र छैनौँ । केन्द्र र प्रदेश दुवै ठाउँमा विश्वासको निश्चित आधारमा काम गर्न सकिएन भने त्यसले गठबन्धनको भविष्य संकटमा पर्नेछ,’ महामन्त्री शर्माको प्रतिवेदनमा उल्लेख छ ।