माओवादीमा क्रमभङ्ग, अब नेतृत्व प्रत्यक्ष निर्वाचनबाट चयन हुने

A+ A A-

नेकपा माओवादी केन्द्रले १९९ सदस्यीय केन्द्रीय समिति प्रत्यक्ष निर्वाचनबाट निर्वाचित गर्ने भएको छ । माओवादीको तीन दिनसम्म चलेको पहिलो विधान अधिवेशनले विधानमा नै नेतृत्व प्रत्यक्ष रूपमा महाधिवेशन हलबाट निर्वाचित हुनुपर्ने व्यवस्था गरेको छ ।

विधान अधिवेशनबाट सबै केन्द्रीय सदस्य प्रत्यक्ष निर्वाचनबाट निर्वाचित हुने विधानमा व्यवस्था भएको केन्द्रीय सदस्य नहेन्द्र खड्काले जानकारी दिए । उनले भने, ‘माओवादीमा पहिलोपटक प्रत्यक्ष रूपमा निर्वाचित भएर केन्द्रीय समिति चयन हुने भएको छ ।’

माओवादीले एकता केन्द्रदेखि नै महाधिवेशन हलबाट सहमतिमा नेतृत्व चयन गर्दै आएको थियो । तर, इतिहासमा पहिलोपटक पहिलो विधान अधिवेशनबाट नेतृत्व चयन गर्न तयार भएको हो ।

विधान अधिवेशनमा सहभागी भएका अधिकांश नेताहरूले नेतृत्व चयन निर्वाचनबाट गर्नुपर्ने माग राखेका थिए । नेतृत्व पनि बाध्य भएर प्रत्यक्ष निर्वाचनमा जान तयार भएको छ । अधिवेशनको अन्तिम दिन पनि नेताहरू नेतृत्व चयन प्रत्यक्ष निर्वाचनबाट हुँदैन कि भनेर दुविधामा थिए । तर, अन्त्यमा एकलौटी रूपमा नेतृत्व चयन गर्दै आएका माओवादी केन्द्रका अध्यक्ष पुष्पकमल दाहाल प्रचण्ड अधिवेशन हलको निर्णय मान्न बाध्य बनेका छन् ।

करिब ३८ वर्षदेखि माओवादीको नेतृत्वमा रहेका प्रचण्डलाई पहिलोपटक प्रत्यक्ष निर्वाचनबाट निर्वाचित गर्न हलले माग गरेको थियो । उक्त माग यो अधिवेशन हलले पूरा गरेको छ ।

१९९ केन्द्रीय सदस्य निर्वाचित भए पनि कार्यालय टिम र अध्यक्ष भने केन्द्रीय सदस्यहरूले चयन गर्ने व्यवस्था गरिएको छ । यो व्यवस्थामा भने अधिकांश नेताहरू रुष्ट बनेका छन् ।

'पहिलोपटक केन्द्रीय समिति प्रत्यक्ष निर्वाचनबाट निर्वाचित हुने व्यवस्था भएको छ । यो माओवादीमा पहिलो उपलब्धि हो । केही साथीहरूले कार्यालय टिम पनि निर्वाचित हुनुपर्छ भनेर कुरा राख्नुभएको थियो,' केन्द्रीय सदस्य डीपी ढकालले भने, ‘माओवादीमा यो ऐतिहासिक क्रमभंग हो । पहिलोपटक नेतृत्व चयन निर्वाचनबाट हुने भनेर हलले पास गरेको छ । अब नेतृत्व चयनमा कसैको चाहनाले मात्र हुँदैन । कार्यकर्तामा भिजेका नेताहरू मात्र नेतृत्वमा आउने बाटो खुल्यो ।’

अधिवेशन समापनमा अध्यक्ष प्रचण्डले माओवादीमा पहिलोपटक निर्वाचनबाट नेतृत्व चयन हुनु नै क्रमभंग भएको बताएको ढकालले बताए । ढकालले प्रचण्डको भनाइ उद्धृत गर्दै भने, ‘माओवादीमा प्यानल पेस गर्न पाइँदैन । नेतृत्वमा पुग्न निर्वाचित हुने व्यवस्थाको ढोका खोलिएको छ । कमरेडहरू निर्वाचित भएर आउनुहोस् । सबै समिति निर्वाचित भएर आउँछन् ।’

प्रचण्डले अधिवेशन हलमा केही नेताहरूले अनावश्यक रूपमा बोलेको भन्दै आक्रोश पोखेको एक नेताले बताए । ती नेताले प्रचण्डको भनाइ उद्धृत गर्दै भने, ‘साथीहरू, आवश्यक नभएको कुरा बोल्नुभयो । बोल्न आवश्यक नै थिएन । पहिलोपटक निर्वाचन हुने व्यवस्था गरेका छौँ । यही लागू गरौँ । अहिले नै कार्यालयको निर्वाचन हलबाट हुने व्यवस्थाका कुरा नगरौँ ।’

माओवादीले तत्काल पार्टीको नाम र चुनाव चिह्न भने नफेर्ने भएको छ ।

पार्टीको विधान अधिवेशनमा २१ समूहले विधानमाथि छलफल गरेका थिए । सबै समूहको सुझावको निष्कर्ष सुनाउँदै प्रचण्डले निर्वाचनमा जानु नै उपलब्धि भएको बताएका छन् । उनले अधिवेशन हलमा आवश्यकताअनुसार आगामी दिनमा पार्टीको नाम भने फेर्न सकिने बताएको एक सहभागी नेताले बताए ।

नेकपा माओवादी केन्द्रको केन्द्रीय समिति १९९ सदस्यीय हुने भएको छ । प्रचण्डले महाधिवेशन हलबाट १९९ सदस्यीय केन्द्रीय समिति निर्वाचित हुने गरी गरेको प्रस्ताव हलले पारित गरेको छ । केन्द्रीय सदस्यहरूले ११ सदस्यीय कार्यालय र स्थायी समिति सदस्य चयन गर्नेछन् । माओवादी केन्द्रको ११ जनाको कार्यालय रहनेछ भने ६७ सदस्यीय स्थायी समिति हुनेछ ।

माओवादीले विशेष महाधिवेशन गर्ने तयारी पनि गरेको छ । दुई वर्षपहिला माओवादीको महाधिवेशन भएको थियो । महाधिवेशन हलमा नै छिट्टै विशेष महाधिवेशन गर्ने बताएको थियो ।

प्रकाशित मिति: बिहीबार, फागुन ३, २०८० २०:३६