कस्ता छन् कांग्रेस बैठकमा पेस हुने प्रतिवेदन ?

A+ A A-

नेपाली कांग्रेसको केन्द्रीय समिति बैठकमा पेस गरिने प्रतिवेदन ७ देखि १० फागुनमा हुने महासमिति बैठकमा प्रस्तुत हुँदै छ । उपसभापति पूर्णबहादुर खड्काले नीतिगत, महामन्त्री गगन थापाले सांगठनिक र अर्का महामन्त्री विश्वप्रकाश शर्माले समसामयिक राजनीतिक प्रतिवेदनको मस्यौदा केन्द्रीय समितिमा पेस गर्नेछन् ।

चौथोपटक बैठक सर्दा प्रारम्भिक रूपमा तयार पारिएको प्रतिवेदन संयोजकहरूले पुनर्लेखन गरेका छन् । तीनवटै प्रतिवेदन लामो दस्तावेजमा छ । नेताहरूले समुदायमा कांग्रेस अभियानको पहिलो चरणबाट आएका सुझावहरू प्रतिवेदनमा परिमार्जन गरेका छन् ।

पार्टीले लिने आर्थिक, सामाजिक, धार्मिक, सांस्कृतिक तथा राजनीतिक विषय समेटिएको करिब ५६ पृष्ठको नीति प्रस्ताव महासमितिमा पेस हुनेछ । कांग्रेसका आगामी नीति तय गर्न योजना आयोगका पूर्वउपाध्यक्ष डा. विश्वनाथ पौडेल, डा. नवराज लम्साल, गेजा शर्मा वाग्ले, उपप्राध्यापक दीपेश घिमिरे, मद कट्टेललगायतले तयार पारेका हुन् । जसलाई महामन्त्रीद्वय थापा र शर्माले संयोजन गरेका छन् ।

नीतिगत कुरामा आर्थिक नीति पुन: परिभाषित गर्ने प्रस्ताव गरिएको छ । खुला बजार अर्थनीति अँगालेको कांग्रेसले अर्थतन्त्रमा देखिएको समस्या समाधान गर्ने र नेपालजस्तो तुलनात्मक रूपमा सानो बजार रहेको देशमा बाह्य प्रभाव बढी पर्ने भएकाले उत्पादनमा कसरी जोड दिने भन्ने कुरा प्रतिवेदनमा समेटिएकाे छ ।

सांगठनिक प्रतिवेदनमा संगठनको अवस्थाको विस्तृत रिपोर्ट समावेश गरिएको छ । जसमा पार्टी संरचनाका बारेमा समीक्षा गरिएकाे छ । संरचना ठूला भए पनि प्रभावकारी नभएको कुरा सांगठनिक प्रतिवेदनमा उल्लेख छ । संगठन परिचालन हुन नसकेको विषयलाई निर्मम समीक्षा गरिएकाे प्रतिवेदन लेखनमा सहजीकरण गरेका एक सदस्यले जानकारी दिए ।

संगठन विस्तारका साथै संरचना प्रभावकारी बनाउनेबारेमा महामन्त्रीले प्रस्ताव गरेका छन् । पार्टीको महाधिवेशन हुन २ वर्ष बाँकी रहेकाले दुईवर्षे क्यालेन्डर तय गर्ने र महाधिवेशनको मितिसमेत सोही क्यालेन्डरमा उल्लेख गर्ने भनिएकाे छ ।गठबन्धन गरेका कारण संगठन कमजोर भएको र निर्वाचनपूर्व गठबन्धन नगर्ने प्रस्ताव महामन्त्री थापाले गरेका छन् । उनले पार्टीमा ‘ल्याट्रल इन्ट्री’को प्रस्ताव समावेश गरेका छन् ।

अर्का महामन्त्री शर्माले भ्रष्टाचार नियन्त्रण र सुशासन, समाजमा किन असन्तुष्टि छ ? सरकारले किन राम्रो प्रस्तुति गर्न सकेन ? सरकारले के गर्नुपर्छ ? निराशा सम्बोधन गर्न के गर्नुपर्छ भन्नेबारेमा प्रतिवेदनमा उल्लेख गरेका छन् । कांग्रेसले ‘राजनीतिक स्थायित्व, रूपान्तरण र नवीनता, स्वतन्त्रता न्याय र समानता, नेपाली कांग्रेसको नीतिगत प्रतिबद्धता’ भन्ने नाराका साथ महासमिति बैठक आयाेजना गर्दै छ ।

प्रकाशित मिति: बिहीबार, फागुन ३, २०८० १४:२२