अमेरिका कन्सास शहरमा हजारौँको भिडमा अन्धाधुन्ध गोली चल्यो (भिडियो)

A+ A A-

अमेरिकामा बुधबार हजारौँ मानिसको भिडमा अन्धाधुन्ध गोली चलेको छ । अमेरिकी नेसनल फुटबल लिगले आयोजना गरेको द सुपर बोल च्याम्पियन्सिपको फाइनल कन्सास सिटी चिफ क्लबले जितेपछि विजयी परेड निकालिएको थियो ।

कन्सास क्लबका हजारौँ समर्थकहरू आफ्नो क्लबको जितका लागि सडकमा उत्सव मनाउन आएका थिए । सोही हजारौँको भिडमा अन्धाधुन्ध गोली चलेको हो । यस गोलीकाण्डमा २१ जना मानिसहरू घाइते भएका छन् भने एक जनाको ज्यान गएको छ ।

घाइतेमध्ये सात जनाको अवस्था चिन्ताजनक भएको बताइएको छ भने यस घटनामा ९ बालबालिका पनि घाइते छन् । युनियन स्ट्रेसनको पश्चिम तर्फबाट गोली चलेको आवाज सुनिएको थियो । प्रहरीले यस गोलीकाण्डमा संलग्न रहेको आशंकामा तीन जनालाई गिरफ्तार गरेर अनुसन्धान गरिरहेको छ ।

गोली चल्दा कन्सास सिटी चिफका खेलाडीहरू पनि त्यही भिडमा थिए । सो विजयी परेडमा आठ सय प्रहरी पहिल्यै तैनाथ थिए, बन्दुक चल्नासाथ प्रहरी र जासुसहरूको मद्दतमा संदिग्धहरूलाई पक्राउ गरिएको हो ।

(भिडियो)

अमेरिकामा बन्दुक हिंसाका घटना दैनिक भइरहन्छन्, जसमध्ये यो पछिल्लो घटनालाई डरलाग्दो भनिएको छ । अमेरिकामा यसवर्षको डेढ महिनाको अन्तरालमा ४ हजार ९९४ जनाले बन्दुक हिंसामा ज्यान गुमाइसकेका छन् । यसको अर्थ अमेरिकामा हरेक दिन ११० जनाले बन्दुकजन्य घटनामा ज्यान गुमाइरहेका छन् ।

गतवर्ष सन् २०२३ मा अमेरिकामा ४३ हजार ६५ जनाले बन्दुकहिंसाका घटनामा ज्यान गुमाएका थिए । बन्दुकको स्वामित्वको विषयमा अमेरिकामा दुई मुख्य पार्टी रिपब्लिकन र डेमोक्रेटिकबीच नै मत भिन्नता छ । रिपब्लिकन पार्टीले बन्दुकको स्वामित्वमा खुकुलो नीति लिन्छ भने डेमोक्रेटिक पार्टीले बन्दुक स्वामित्वको विषयमा कडा नीतिलाई समर्थन जनाउँछ ।