युक्रेनलाई अमेरिकाबाट फेरि झट्का, सभामुखद्वारा ९५ अर्ब अमेरिकी डलरको सहयोग अस्वीकार

युक्रेनलाई अमेरिकाबाट फेरि झट्का, सभामुखद्वारा ९५ अर्ब अमेरिकी डलरको सहयोग अस्वीकार

A+ A A-

युक्रेनले रुसविरुद्धको युद्धमा हतियार अभावको सामना गरिरहेको छ । राष्ट्रपति भोलोदिमिर जेलेन्स्की आफैँले हतियार कम भएको बारम्बार बताइसकेका छन् । उनले यतिसम्म भनेका छन् कि पश्चिमा राष्ट्रबाट हतियार नपाए युक्रेनले युद्ध हार्नेछ ।

सो क्रममा अमेरिकाबाट युक्रेनलाई दिने भनिएको ६१ अर्ब अमेरिकी डलरको सहायता र युरोपेली युनियनबाट दिने भनिएको ५४ अर्ब अमेरिकी डलरको सहायता प्याकेज अस्वीकृत भएको थियो । यतिबेला अमेरिकी सिनेटले फेरि ९५ अर्ब अमेरिकी डलरको सहायता प्याकेज युक्रेन, इजरायल र ताइवानलाई दिने भनेर स्वीकृत त गर्‍यो तर अमेरिकी प्रतिनिधिसभाका सभामुख माइक जोन्सनले उक्त सहायता रोकिदिएका छन् ।

९५ अर्ब डलरमध्ये ६० अर्ब युक्रेनलाई हतियार र अन्य सामग्रीका लागि प्रदान गरिँदै थियो । अमेरिकी राष्ट्रपति जो बाइडेनका अनुसार यो सहयोगले युक्रेनलाई रुसविरुद्ध युद्ध लड्न सहयोग हुनेछ । यद्यपि बाइडेनको आग्रहलाई बेवास्ता गर्दै सभामुख जोन्सनले मङ्गलबार युक्रेनका लागि युद्ध सहायता रोकिदिएका हुन् ।

आगामी नोभेम्बरमा हुने राष्ट्रपतीय निर्वाचनमा बाइडेनका सम्भावित प्रतिद्वन्द्वी डोनाल्ड ट्रम्पसँग निकट रहेर काम गर्ने सभामुख माइक जोनसनले विधेयकमाथिको मतदानलाई अगाडि बढाउने कुनै मनसाय नरहेको बताएका छन् । सभामुख जोन्सनले अवैध आप्रवासन रोक्न कडा नयाँ उपायहरूबिना युक्रेनको सुरक्षालाई सम्बोधन गर्न नसक्ने बताउँछन् ।

यसबीचमा बाइडेनले पूर्वअमेरिकी राष्ट्रपति ट्रम्पको आलोचना पनि गरेका छन् । ट्रम्पले आर्थिक प्रतिबद्धता पूरा गर्न असफल भएका नेटो सदस्य राष्ट्रहरूमाथि आक्रमण गर्न रूसलाई प्रोत्साहित गरेका थिए । बाइडेनले भनेका छन्, ‘भगवान्‌लाई साक्षी राखेर बोल्नुपर्छ, वास्तवमा यो मूर्ख र लाजमर्दो कुरा हो । यो खतरनाक छ । यो गैरअमेरिकी निर्णय हो ।’

अमेरिकी प्रतिनिधिसभामा रहेको अस्तव्यस्तताका कारण युक्रेनलाई दिने अमेरिकी सहयोग महिनौँदेखि ठप्प भएको छ भने युक्रेनी नेताहरूले बढ्दो रूसी आक्रमणको सामना गर्न मद्दतको याचना गरिरहेका छन् । युक्रेनमा रुसी आक्रमणपछि अमेरिकाले रुसमाथि प्रतिबन्धको आह्वान गरेको थियो । तर, अमेरिकाले नै रुसबाट अर्बौंको तेल खरिद गरिसकेको छ ।

प्रकाशित मिति: बुधबार, फागुन २, २०८० १५:५९