आईएमएस ग्रुप र सबको फोनबीच मोबाइल एक्सचेन्जका लागि सहकार्य

A+ A A-

'आईएमएस' र 'सबको फोन'ले 'आईएमएस सबको फोन Exchange' को घोषणा गरेका छन् । दुवै कम्पनीले साझेदारी गरी विभिन्न ब्रान्डका मोबाइल प्रयोगकर्ताहरूलाई आफूले प्रयोग गरेको फोन साटी सामसुङ स्मार्टफोनमा अपग्रेड गर्न सजिलो होस् भन्ने उद्देश्यले मोबाइल एक्सचेन्ज सुविधा सुरु गरेका हुन् ।

कम्पनीका अनुसार, यो एक्सचेन्ज सुविधाअन्तर्गत ग्राहकले आफूले प्रयोग गरेका जुनसुकै ब्रान्डका मोबाइललाई नयाँ सामसुङ स्मार्टफोनसँग साट्न सक्नेछन् । आईएमएस 'सबको फोन एक्सचेन्ज सुविधा'अन्तर्गत प्रदान गरिने वेबमा आधारित प्रणालीको प्रयोग गरी ग्राहकहरूले आफूले प्रयोग गरिरहेको फोनको विवरण भरी मात्र १ मिनेटमा फोनको मूल्य प्राप्त गरी नयाँ सामसुङ स्मार्टफोनमा सजिलै अपग्रेड गर्न सक्नेछन् ।

यस्तो एक्सचेन्ज सुविधा प्राप्त गर्नका लागि ग्राहकले आफूले प्रयोग गरेको मोबाइलको भ्याट बिल र परिचय खुल्ने सरकारी परिचयपत्र अनिवार्य उपलब्ध गराई स्वघोषणा फारम भर्नुपर्नेछ । प्रथम चरणका लागि यो सुविधा हाल सामसुङको आधिकारिक आईएमएस स्मार्ट आउटलेटहरू र काठमाडौंमा रहेका अधिकृत बिक्रेतामा मात्र उपलब्ध गराइएको छ ।

सबको फोनका संस्थापक उत्तम काफ्लेले यस सहकार्यप्रति उत्साह व्यक्त गर्दै आईएमएस र सबको फोनबीचको यस साझेदारीले मोबाइल प्रयोगकर्ताहरूलाई मोबाइल एक्सचेन्ज सहज र छिटो बनाउँदै उचित मूल्य प्रदान गर्नेे लक्ष्य राखिएको बताए । 'एकपटक प्रयोग गरिएका फोनहरूलाई upcycle गरी पुनःप्रयोग गर्न सके विद्युतीय फोहोरको (ई–वेस्ट) समस्यालाई समेत सम्बोधन गर्न सकिन्छ । हामीले सुरु गरेको यस प्रयासले नेपालमा वातावरण र पुनःप्रयोगप्रति जिम्मेवार र सामाजिक उत्तरदायी उद्यमशीलताको प्रतिनिधित्व पनि गर्नेछ,’ उनले बताए ।

आईएमएस ग्रुपका अध्यक्ष एवं प्रमुख कार्यकारी अधिकृत दिकेश मलहोत्राले सबको फोनसँगको सहकार्यले नेपालमा मोबाइल एक्सचेन्जलाई सहज बनाउनेमा आफू विश्वस्त रहेको बताए । उनले भने, 'यो सुविधाको कार्यान्वयन पहिलो चरणमा काठमाडौंका आउटलेटहरूमा केन्द्रित हुने र बिस्तारै एक्सचेन्ज सुविधा नेपालभर उपलब्ध गराउने योजना राखेका छौँ ।'

सबको फोनको प्रविधिसँग आईएमएसको विशेषज्ञतालाई संयोजन गरेर आफ्ना ग्राहकहरूलाई प्रयोगमा आइसकेका फोनहरूको उचित मूल्य प्रदान गरी सामसुङ स्मार्टफोनमा अपग्रेड गर्न सजिलो र सुविधाजनक बनाउने आईएमएसको योजना रहेको मलहोत्राले बताए ।

आईएमएस नेपालमा सामसुङ फोनको राष्ट्रिय वितरक हो भने सबको फोन नेपाली बजारमा स्थानीय रूपमा नवीकरण (रिफर्बिस्ड) गरिएका मोबाइल फोनहरू तयार गर्ने अग्रणी कम्पनी हो ।

प्रकाशित मिति: बुधबार, फागुन २, २०८० १७:०६