'लाहोर १९४७' मा सन्नी देओलको जोडी प्रीति जिन्टा 'कन्फर्म'

A+ A A-

अगस्ट २०२३ मा फिल्म 'गदर २' ब्लकबस्टर भएपछि आमिर खान र सन्नी देओलले राजकुमार सन्तोषीले निर्देशन गर्ने फिल्मका लागि हात मिलाएको चर्चा थियो । त्यो फिल्म हो ‘लाहोर १९४७’ ।

यस फिल्म आमिर खानले निर्माण गर्ने र उनको क्यामियो रहने समाचार छ । पछिल्लो समय यसको स्टार कास्टलाई लिएर विभिन्न नामहरू आइरहेका छन् । अब अर्को खबर चर्चामा छ कि यस फिल्ममा प्रीति जिन्टालाई मुख्य अभिनेत्रीको रूपमा छनोट गरिएको छ । सन ९० को दशककी सुन्दर र प्रतिभाशाली अभिनेत्री प्रीति जिन्टा लामो समयदेखि फिल्मबाट टाढा रहेकी थिइन् तर अहिले प्रीति यही फिल्मबाट बलिउडमा कमब्याक गर्दैछिन् । यसमा चाखलाग्दो कुरा के छ भने प्रीतिले सन्नी देओल र आमिर खान दुवैसँग उत्कृष्ट फिल्म दिएकी छिन् ।

ब्लकबस्टर ‘गदर २’ पछि सन्नीको यो अर्को फिल्म हो र यो पनि देशभक्ति प्रकारको फिल्म हुने भएकाले चर्चामा छ । यो चलचित्रलाई आमिर खानले निर्माण गर्दैछन् भने निर्देशन राजकुमार सन्तोषीले गर्नेछन् ।

खबरहरुका अनुसार राजकुमार सन्तोषीले सन्नी देओल र प्रीति जिन्टाको जोडीको बारेमा आफ्नो भावना व्यक्त गरेका छन् । उनले भने, ‘लामो समयपछि प्रीति जिन्टा ‘लाहोर १९४७’ बाट निकै महत्त्वपूर्ण भूमिकामा सिल्वर स्क्रिनमा फर्किने छिन् । वास्तवमा, उनी हाम्रो उद्योगमा सबैभन्दा प्रतिभाशाली, उत्कृष्ट र सबैभन्दा प्राकृतिक अभिनेत्री हुन् । उनले जस्तोसुकै क्यारेक्टर खेले पनि उनी आफूलाई त्यसमा पूर्ण रूपले ढाल्छिन् र त्यही भएर मानिसहरूले उनलाई मन पराउँछन् ।'

प्रीति–सन्नीले यसअघि पनि सँगै काम गरिसकेकाले यो अनस्क्रिन जोडीलाई दर्शकले मन पराएको निर्देशकले बताए । सन्नी र प्रीतिबाहेक फिल्ममा आमिर खान, शबाना आजमी र शिल्पा शेट्टी पनि देखिनेछन् । यो फिल्म २०२५ मा रिलिज हुने जनाइएको छ । सन्नी प्रीतिले दिल्लगी, द हिरो, ये रास्ते है प्यार के, फर्ज, भैयाजी सुपरहिट र हिरोजस्ता फिल्ममा सँगै काम गरिसकेका छन् ।