८१ वर्षे अमेरिकी राष्ट्रपति बाइडेनमा हुन सक्छ डिमेन्सियाको परीक्षण, ऊँट, गैँडा र बाघ चिन्नुपर्ने

८१ वर्षे अमेरिकी राष्ट्रपति बाइडेनमा हुन सक्छ डिमेन्सियाको परीक्षण, ऊँट, गैँडा र बाघ चिन्नुपर्ने

A+ A A-

अमेरिकामा पछिल्लो समय ८१ वर्षे राष्ट्रपति जो बाइडेनको स्मरण शक्तिबारे विभिन्न प्रश्नहरू गर्न थालिएको छ । बाइडेनको स्मरण क्षमताबारे एउटा प्रतिवेदन सार्वजनिक भएपछि उनी राष्ट्रपति बन्न योग्य छैनन् भनेर विपक्षी रिपब्लिकन पार्टीले अभिव्यक्ति नै दिएको छ ।

प्रतिवेदनको दाबीअनुसार बाइडेनले उपराष्ट्रपति हुँदा गोप्य फाइल गलत ढंगले व्यवस्थापन गरेका थिए र उनले जीवनका मुख्य घटना सम्झन सकेका थिएनन् । ३४५ पृष्ठको प्रतिवेदनमा बाइडेनको स्मरण शक्तिमा सीमा भएको जनाइएको थियो ।

न्याय विभागका विशेष सल्लाहकार तथा अनुसन्धानकर्ता रोबर्ट हरसँगको अन्तर्वार्तामा बाइडेनले आफू कति समयसम्म उपराष्ट्रपति थिए र आफ्ना छोराको मृत्यु कहिले भएको थियो भनेर सम्झन सकेका थिएनन् । यद्यपि उमेर धेरै भए पनि अमेरिकाका लागि उपयुक्त राष्ट्रपति आफू नै हुने बाइडेनको दाबी छ ।

पछिल्ला केही दिनहरूमा पनि बाइडेनको भुल्ने बानीको चर्चा भएको थियो, जब इजिप्टका नेता अब्देल फतह अल–सीसीलाई उनले मेक्सिकोका राष्ट्रपति भनेका थिए । यसबीचमा अमेरिकामा बाइडेनमा ‘डिमेन्सिया’को परीक्षण हुनुपर्ने भनेर माग भइरहेको छ ।

यसअघि पूर्वअमेरिकी राष्ट्रपति डोनाल्ड ट्रम्पले पनि डिमेन्सिया परीक्षण गराएका थिए । डिमेन्सिया परीक्षणमा ऊँट, बाघ र गैँडा चिन्न लगाइन्छ । साथै, यहाँ घडी बनाउन, १ देखि ५ अंक र 'ए'देखि 'ई'सम्मका अंग्रेजी वर्ण पढ्न लगाइन्छ । सन् १९९६ देखि सुरु भएको मोन्ट्रियल कग्निटिभ एसेसमेन्ट मोका टेस्टले मानिसमा डिमेन्सिया छ कि छैन भनेर परीक्षण गर्छ ।

यो परीक्षण स्मरण शक्ति, एकाग्रता र ध्यानसँग केन्द्रित छ । यो परीक्षणमा २६ देखि माथिको अंक ल्याउनुलाई सामान्य मानिन्छ । यसअघि ट्रम्पले ३० अंक ल्याएका थिए । एनबीसी न्युजका अनुसार ६२ प्रतिशत अमेरिकीहरू बाइडेनको मानसिक र शारीरिक अवस्थालाई लिएर चिन्तित छन् । यस्तोमा विज्ञहरूले बाइडेनले डिमेन्सियाको परीक्षण दिनु उत्तम हुने बताउँछन् ।

प्रकाशित मिति: सोमबार, माघ २९, २०८० १५:४५