ट्रम्पको विवादास्पद टिप्पणीपछि पश्चिमा सैन्य गठबन्धन नेटो असन्तुष्ट, के भनेका थिए ट्रम्पले ?

ट्रम्पको विवादास्पद टिप्पणीपछि पश्चिमा सैन्य गठबन्धन नेटो असन्तुष्ट, के भनेका थिए ट्रम्पले ?

ट्रम्प र स्टोल्टनबर्ग

A+ A A-

अमेरिकी पूर्वराष्ट्रपति डोनाल्ड ट्रम्पसँग उत्तर एट्लान्टिक सन्धि संगठन नेटो असन्तुष्ट बनेको छ । ट्रम्पले नेटोलाई आर्थिक सहायता नदिने राष्ट्रहरूमा रुसले आक्रमण गर्दा पनि हुन्छ भनेर अभिव्यक्ति दिएका थिए ।

ट्रम्प यसै वर्ष हुने अमेरिकी राष्ट्रपतिको निर्वाचनमा रिपब्लिकनको तर्फबाट सम्भावित उम्मेदवार पनि हुन् । उनी अमेरिकामा दोस्रोपटक राष्ट्रपति पनि बन्न सक्छन् । ट्रम्पले जिम्मेवार भएर अभिव्यक्ति दिनुपर्ने टिप्पणी भइरहेको हो ।

नेटोका लागि पर्याप्त खर्च गर्न नमान्ने नेटो राष्ट्रमा रुसले आक्रमण गरेको खण्डमा आफूहरूले ती देशको सुरक्षा नगर्ने अभिव्यक्ति ट्रम्पले दिएपछि नेटो रुष्ट छ । नेटोका प्रमुख जेन्स स्टोल्टनबर्गले ट्रम्पको अभिव्यक्ति खेदजनक भएको बताउँदै भनेका छन्, ‘ट्रम्पको भनाइले हामी सबैको सुरक्षालाई कमजोर बनाउँछ ।’

स्टोल्टनबर्गका अनुसार यस्ता अभिव्यक्तिहरूले अमेरिकी र युरोपेली सेनालाई ठूलो जोखिममा पार्छ । ट्रम्पले नेटोका सदस्य राष्ट्रहरूले आफ्नो कुल गार्हसथ्य उत्पादनको २ प्रतिशत खर्च गर्नैपर्ने बताएका छन् । नेटोका ३१ सदस्य राष्ट्रहरूमध्ये यतिबेला १९ देशले नेटोकै नियमभन्दा कम आर्थिक सहायता प्रदान गरिरहेका छन्, जसमा जर्मनी, नर्वे र फ्रान्स पनि पर्छन् ।

उत्तर एट्लान्टिक सन्धि सङ्गठन नेटो पश्चिमा राष्ट्रहरूको साझा सैन्य गठबन्धन हो, जुन सन् १९४९ मा १२ देशले मिलेर गठन गरेका थिए । यतिबेला नेटो सदस्य संख्या ३१ पुगिसकेको छ ।

कुनै एक सदस्य राष्ट्रविरुद्ध आक्रमण भए नेटोमा आबद्ध यी देशहरूले एकअर्काको सहायता गर्ने सहमति जनाएका छन् । तर, ट्रम्प भने नेटोलाई पर्याप्त सहयोग नगर्ने नेटोकै सदस्यलाई किन सहयोग गर्ने भनेर प्रश्न गरिरहेका छन् ।

प्रकाशित मिति: सोमबार, माघ २९, २०८० १३:३०