प्रियङ्का कार्की, आयुष्मान देशराज र आयाङ्का बने वात्सल्यका ब्रान्ड एम्बास्डर

प्रियङ्का कार्की, आयुष्मान देशराज र आयाङ्का बने वात्सल्यका ब्रान्ड एम्बास्डर

A+ A A-

अभिनेत्री प्रियङ्का कार्की, अभिनेता आयुष्मान देशराज र उनीहरूकी छोरी आयाङ्का वात्सल्य नेचुरल आईभीएफको ब्रान्ड एम्बास्डरमा नियुक्त भएका छन् । वात्सल्यको नारायणचौरस्थित क्लिनिकमै भएको एक कार्यक्रममा दुवै पक्षले सम्झौतापत्रमा हस्ताक्षर गरेका हुन् ।

सम्झौताबमोजिम प्रियङ्का कार्की, आयुष्मान देशराज र आयाङ्का नि:सन्तानसँग सम्बन्धित विषयमा जागरुकता फैलाउने र उपचारमा पहुँच बढाउने कार्यमा संलग्न रहनेछन् ।

वात्सल्य क्लिनिकका संस्थापक/प्रबन्ध निर्देशक प्रशान्त सुवेदीले तीनै जनालाई संयुक्त रूपमा ब्रान्ड एम्बास्डरको रूपमा लिन पाउँदा खुसी व्यक्त गरेका छन् । उनले भने, 'नि:सन्तानसम्बन्धी कुण्ठाको विषयमा उहाँहरूमार्फत थप प्रभावकारी रूपमा जागरुकता र चेतना फैलाउन सक्नेमा हामी आशावादी छौँ ।'

'अभिनेत्री कार्की आफ्नो खुला सोच/धारणाका कारण धेरै महिलाहरूका लागि अनुकरणीय बनेको र स्पष्ट वक्तासमेत भएका कारण उहाँको प्रभाव नयाँ पुस्तामा गहिरो रहेको तथ्य नकार्न सकिन्न । साथै, हालै मातृत्व र पितृत्वको भूमिका निभाउँदै गरेका दुवैले सन्तान प्राप्तिको अनुभवलाई राम्ररी उजागर गर्न सक्नेमा म विश्वस्त छु,' सुवेदीले भने ।

त्यस्तै, बदलिँदो जीवनशैली र खानपानले गर्दा सन्तान प्राप्तिको चुनौती थपिँदै गएको अवस्थामा यस सम्बन्धी सचेतना फैलाउने र सन्तान नहुनुमा आफू वा आफ्नो जीवनसाथीलाई दोषी ठहर्‍याउनुभन्दा उपचार गराउनु जाती हुन्छ भन्ने सकारात्मक सन्देश फैलाउने भूमिका पाउँदा आफूहरू उत्साहित रहेको अभिनेत्री कार्कीले बताइन् ।

त्यस्तै, आफ्नो परिवार पूर्ण बनाउन आधुनिक आईभीएफ उपचारको निर्णय जटिल रहेको तर खासमा बुझ्दै जाँदा यो प्रविधि लाभकारी नै रहेको आफूहरूले थाहा पाएका कारण यससम्बन्धी आफूले बुझेको तथ्य प्रभावकारी रूपमा सबैमा राख्दै जाने अभिनेता जोशीले बताए ।

वात्सल्य नेचुरल आईभीएफले उच्च आईभीएफ सफलता दरका साथ नेपालमा आधुनिक प्रजनन् चिकित्साको प्रवर्द्धन, विकास र प्रयोगमा टेवा पुर्‍याउँदै आएको छ । यस संस्थाले आईभीएफका साथै आईयूआई, ओभुलेसन इन्डक्सन, फर्टिलिटी फ्रिजिङ, प्रसूतिपूर्वको सम्पूर्ण जाँचजस्ता प्रजनन्‌सम्बन्धी विभिन्न आधुनिक सेवाहरू प्रदान गर्दै आइरहेको छ ।

प्रकाशित मिति: आइतबार, माघ २८, २०८० १९:४५