मा‌ओवादी बैठकमा प्रदेश कमिटीको ब्रिफिङः नेताहरू बेइमान भए, कार्यकर्ता पनि उस्तै

मा‌ओवादी बैठकमा प्रदेश कमिटीको ब्रिफिङः नेताहरू बेइमान भए, कार्यकर्ता पनि उस्तै

A+ A A-

सत्तारुढ नेकपा (माओवादी केन्द्र) को जारी केन्द्रीय कमिटी बैठकमा आइतबार प्रदेश इन्चार्ज अध्यक्षहरूले पार्टीको तीनमहिने ‘जनतासँग माओवादी विशेष रुपान्तरण अभियान'को समीक्षात्मक रिपोर्टिङ गरे । यो अभियानमा केन्द्रीय सदस्यहरू नै इमानदारीपूर्वक नलागेको गुनासो उनीहरूको थियो ।

'सबै प्रदेशका अध्यक्ष र इन्चार्जहरूले पार्टीको अभियानमा तल्ला कमिटीका नेताहरू इमानदारीका साथ खटिए पनि केन्द्रीय सदस्यहरूले भने बेइमानी गरेको रिपोर्टिङ राख्नुभयो,' एक केन्द्रीय सदस्यले भने, ‘सबै प्रदेशको रिपोर्टिङ पार्टी बनाउन सकिन्छ, उत्साह थपेको छ भन्ने छ । तर, सबै प्रदेशबाट केन्द्रीय नेताहरू अभियानमा फिल्डमा नखटेको र एक/दुई दिन मात्र खटेर बेपत्ता भएका रिपोर्ट आएका छन् ।’

माओवादीको अभियानका क्रममा चार महिनामा कुनै जिल्लामा ४ प्रतिशत मात्र र कुनै जिल्लामा ९४ प्रतिशतसम्म पार्टी सदस्यता नवीकरण भएको रिपोर्टिङ आएको केन्द्रीय सदस्य धीरेन्द्र शर्माले बताए ।

‘गण्डकी प्रदेशको अर्घाखाँचीमा ९४ प्रतिशत पार्टी सदस्यता नवीकरण भएको र त्यही प्रदेशको नवलपुरमा ४ प्रतिशत पार्टी सदस्यता नवीकरण भएको रिपोर्टिङ आएको छ,' शर्मा भन्छन्, 'अधिकांश प्रदेशमा पार्टीलाई रुपान्तरण गरेर नयाँ बनाउन सकिन्छ भन्ने छ । तर, केन्द्रीय नेताहरूको कार्यशैलीमा प्रश्न उठेको छ ।’

कोशी प्रदेशका अध्यक्ष हर्क नेम्वाङले अभियान सफल भएको रिपोर्टिङ गर्दै गुटबन्दी मौलाएको गुनासो गरेका छन् । पार्टीका बैठकमा अनुपस्थित हुनेहरूलाई पदमुक्त गर्नुपर्ने माग राखेका थिए नेम्वाङले । ‘केन्द्रमा गुटबन्दी धेरै छ, यो हटाउनुपर्नेछ,' नेम्वाङले बैठकमा भनेका थिए, 'निरन्तर स्कुलिङ दिनुपर्छ, पार्टीलाई नयाँ तरिकाले रुपान्तरणसहित ल्याउन सकिन्छ । जनयुद्धका भौतिक संरचना जोगाउनुपर्छ ।’

कोशीका इन्चार्ज चन्द्रप्रकाश खनाल 'बलदेव'ले पनि अभियानले संगठनमा आशा जगाए पनि कोशी प्रदेशको नामकरणले माओवादीको छवि खस्केको रिपोर्टिङ सुनाएको एक केन्द्रीय सदस्यले बताए । सबै वडामा पुग्ने लक्ष्य राखिए पनि त्यो हुन नसकेको खनालले बताएका थिए ।

माओवादी केन्द्रको मधेश प्रदेशमा कमिटी नै छैन । विवादका कारण अहिलेसम्म अधिवेशन हुन सकेको छैन । मधेशमा अधियानको लागि माओवादीले लिलामणि पोखरेललाई इन्चार्जको जिम्मेवारी दिएको छ । पोखरेलले बैठकमा संगठन संरचना नभएको अवस्थामा अभियान सञ्चालन गर्नुपरेको गुनासो गरेका थिए । नेतृत्व, नीति, योजना, कार्यक्रममा विवाद नभए पनि जुँगाको लडाइँले पार्टी खोज्नुपर्ने अवस्थामा पुगेको अवस्थामा अभियानले केही आशा जगाएको उनको भनाइ थियो ।

‘मधेशमा कसले सुविधा लिने भन्ने लडाइँ छ, एकले अर्कोलाई नटेर्ने प्रवृत्ति हावी छ । अभियानमा असहयोग पनि भयो । पार्टीमा काम गर्नेलाई पुरस्कृत र काम नगर्नेलाई दण्डित गरिनुपर्छ, भ्रष्टाचार व्याप्त रहेकाले सुशासनको अभियान मधेशमा केन्द्रित गरिनुपर्छ,’ पोखरेलले गरेको रिपोर्टिङ उद्धृत गर्दै एक केन्द्रीय सदस्यले भने ।

बागमती प्रदेश अध्यक्ष सरल सहयात्रीले भने पार्टीको अन्तरविरोध छताछुल्ल हुन थालेको भन्दै असन्तुष्टि जनाएका थिए । संगठनात्मक अराजकता मौलाएको सहयात्रीको रिपोर्टिङ रहेको ती केन्द्रीय सदस्यले जानकारी दिए । ‘आफूबाहेक कोही छैन भन्ने प्रवृत्ति, पार्टी र सरकारका बीच सम्बन्ध र एजेन्डामा एकरुपता छैन । पार्टीले आधुनिक चन्द्रगुप्त खोजी रहेको छ । आधुनिक चाणक्य खोजी रहेको छ,’ सहयात्रीको भनाइ उद्धृत गर्दै ती केन्द्रीय सदस्यले भने ।

बागमती प्रदेश इन्चार्ज जनार्दन शर्माले भने जनतामा पार्टीप्रति आशा भए पनि त्यसलाई संगठित गर्न नसकिएको टिप्पणी गरेका थिए । ‘जनार्दन कमरेडले कार्यकर्तामा नेतृत्वप्रति आलोचना र माया दुवै छ । विगतको कतिपय गलत निर्णयका कारण उपत्यकामा पार्टी बनाउन जनतालाई पार्टीमा जोड्न गाह्रो भएको रिपोर्टिङ गर्नुभयो,' ती केन्द्रीय सदस्यले भने, 'सरकारमा रहेर माओवादीले लोडसेडिङ अन्त्य, खानेपानी, नागरिकता, सुशासनको पक्षमा राम्रो काम गरे पनि त्यसको जस लिन नसकेको बताउनुभयो ।’

विशेष प्रदेशका इन्चार्ज वर्षमान पुनले अभियानको सिकाइ महत्त्वपूर्ण रहेको बताए । तथ्यमा आधारित बहस अभियानको मौलिकता रहेको उनको भनाइ थियो । उनले अभियानले नेतृत्वलाई विचारमा, राजनीतिमा र संगठनमा संलेषण गर्न सहज बनाएको बताए ।

गिरिराजमणि पोखरेलले पार्टीमा लय नमिलेको र अन्तरविरोध हावी भएको टिप्पणी गरे । उनले वर्गमा आधारित पार्टी बनाउनुपर्ने, वर्ग छोड्दा कमजोर भएको, विधि र पद्धति नहुँदा पार्टीमा समस्या आएको बताए । ‘पार्टीका नेताहरूको कार्यशैली, आचरणसमेत रुपान्तर गरेर अभियानलाई निरन्तरता दिनुपर्छ,’ पोखरेलको भनाइ थियो ।

प्रवास कमिटीका इन्चार्ज राम कार्कीले भने प्रवासीहरूको भूमिका फेरिएकाले यताबाट भनेको उताकाले नमान्ने गरेको बताएका छन् । ‘पहिले यताबाट भनेको मान्थे, अहिले उनीहरूले भनेको यताकाले मान्छन् । अब प्रवासको काम सहयोगीबाट निर्णायकमा बदलिएको छ,’ कार्कीले भने । माओवादीको नेतृत्वमा सरकार भएकाले यही बेला नेपाललाई शान्ति क्षेत्र घोषणाको प्रस्ताव गर्न सुझाव दिएको एक केन्द्रीय सदस्यले बताए ।

कर्णाली प्रदेशका इन्चार्ज मातृकाप्रसाद यादवले आफूले कहीँ जिम्मेवारी नपाउँदा कर्णालीमा पाए पनि खुसी लागेको भन्दै गुनासो गरे । 'मातृका कमरेडले पार्टीमा कहीँ काम नपाउँदा कर्णालीको पहाडमा पठाएको जस्तो भएको छ, तर पनि खुसी छु भन्नुभयो,' बैठकमा सहभागी एक केन्द्रीय सदस्यले भने ।

यादवले बैठकमा पहिले जाँडको भाँडा फुटाउँदै हिँड्ने माओवादी नेता-कार्यकर्ता अहिले त्यही खाएर बाटोमा लड्ने गरेको बताए । 'मातृका कमरेडले बैठकमा हुम्लाका जनताले मलाई भेटेर पहिला जाँडको भाँडो फुटाउने तपाईंका कार्यकर्ता अहिले त्यही खाएर बाटोमा लड्छन् भन्नुभयो भनेर सुनाउनुभयो,’ ती केन्द्रीय सदस्यले बैठकमा भएको रिपोर्टिङबारे भने ।

सुदूरपश्चिम प्रदेशका अध्यक्ष हरि चौधरीले सुदूरपश्चिमा देखिएको सांगठनिक अराजकताको हल समयमा नै हुनुपर्ने बताएका थिए । चौधरीलाई उद्धृत गर्दै ती नेताले भने, ‘पार्टीभित्र अराजकता मच्चाएर संसदीय दलको नेता फेर्दा पनि पार्टी हेडक्वार्टरको धारणा अहिलेसम्म आएको छैन । आउनुपर्छ । यसरी नै चल्ने हो कि अनुशासन चाहिन्छ ?’

बैठकपछि प्रतिक्रिया दिँदै माओवादी केन्द्रका केन्द्रीय सदस्य रञ्जित तामाङले सांगठनिक रूपमा केही समस्या भए पनि पार्टी बनाउन सकिन्छ भन्ने आस पलाएको बताए । 'पार्टीमा समस्या नभएको होइन । तर, हालै सम्पन्न अभियान र त्यसको रिपोर्टीङका आधारमा पार्टी बनाउन सकिन्छ भन्ने निष्कर्षमा पुगिन्छ,' उनले भने ।

माओवादीका १० वटा प्रदेशको रिपोर्टिङ सकिएको छ । बैठक भोलि पुनः बस्नेछ ।

प्रकाशित मिति: आइतबार, माघ २८, २०८० १९:१९