मेस्सीसँग रुष्ट चीनले चीनमा हुने अर्जेन्टिनाका दुई खेल स्थगित गरिदियो

A+ A A-

चीनमा हुने अर्जेन्टिनाका दुईवटा अन्तर्राष्ट्रिय खेल स्थगित भएका छन् । बेइजिङको फुटबल संघले हिजो शनिबार आगामी मार्चमा हुने अर्जेन्टिना र आइभोरी कोस्टविरुद्धको खेल रद्द भएको जानकारी दिएको हो ।

त्यसअघि मात्र हंग्जाउका खेलकुद अधिकारीहरूले अर्जेन्टिना र नाइजेरियाबीचको मैत्रीपूर्ण खेल स्थगित भएको जानकारी दिएको थियो । वास्तवमा चीनद्वारा विशेष प्रशासित क्षेत्र हङकङमा विश्वकप विजेता लियोनल मेस्सीले फुटबल नखेलेपछि चिनियाँ दर्शकहरू मेस्सीसँग रुष्ट थिए ।

यसबीचमा चिनियाँ सरकारको मुखपत्र मानिएको ग्लोबल टाइम्सले पनि मेस्सी अमेरिकी षड्यन्त्रको सहयोगी बनेको भन्दै एउटा लेख प्रकाशित गरेको थियो । मेस्सीले राजनीतिक उद्देश्य बोकेर हङकङको बदनाम गर्न खोजेको ग्लोबल टाइम्सले जनाएको थियो ।

यही सेरोफेरोमा मेस्सीको देशले चीनमा खेल्न लागेको दुई खेल चीनले रद्द गरिदिएपछि चीन मेस्सीसँग वास्तवमै रुष्ट बनेको टिप्पणी हुन थालेको छ ।

पछिल्लो घटनाक्रमको पृष्ठभूमि

चीनको विशेष प्रशासनिक क्षेत्र हङकङमा गतहप्ताको आइतबार लियोनल मेस्सी आबद्ध इन्टर मायामी र हङकङ इलेभेन क्लबबीच प्रतिस्पर्धा भयो । उक्त खेलमा मायामीले ४–१ को जित निकाल्यो ।

लुइस स्वारेज, जोर्डी अल्बा र सर्जियो बुस्केट्सजस्ता स्टार खेलाडी मायामीको तर्फबाट मैदान उत्रिएका थिए । तर, विश्व चर्चित मेस्सीले भने उक्त खेल खेलेनन् । यद्यपि, उनी मैदानमा खेल हेर्न भने पुगेका थिए ।

मेस्सीलाई हेर्न भनेरै हङकङका दर्शक महँगो टिकट काटेर स्टेडियम पुगेका थिए । घाइते भनिएका मेस्सीले उक्त खेल नखेलेपछि उनको स्टेडियममै विरोध भएको थियो । मेस्सीले खेलपछिको पत्रकार सम्मेलनमा आफू घाइते भएको बताएका थिए ।

तर, उक्त खेलको चौथो दिनमै मेस्सीले जापानमा आयोजित मैत्रीपूर्ण खेल भने खेलेका थिए । मेस्सीले हङकङ अगाडिका जनवरी २९ र फेब्रुअरी १ तारिखको साउदीका खेल पनि खेलेका थिए ।

यसरी सबै खेल खेलेका मेस्सीले चीनको हङकङमा आयोजित फुटबल प्रतियोगिता नखेलेपछि चीन रुष्ट बनेको अनुमान छ । यसबीचमा चिनियाँ सरकारको मुखपत्र मानिएको ग्लोबल टाइम्सले पनि मेस्सी अमेरिकी षड्यन्त्रको सहयोगी बनेको भन्दै एउटा लेख प्रकाशित गरेको थियो । मेस्सीले राजनीतिक उद्देश्य बोकेर हङकङको बदनाम गर्न खोजेको ग्लोबल टाइम्सले जनाएको थियो ।

यसअघि हङकङकी सांसद रेजिना आईपीले मेस्सीलाई हङकङमा प्रतिबन्ध लगाउनुपर्छ भनेर माग गरेकी थिइन् ।

अमेरिका र चीनबीच लामो समयदेखि व्यापार युद्ध जारी छ भने चीन बौद्धिक चोरी र मानव अधिकार उल्लंघनकर्ता भएको अमेरिकी भनाइ छ । अमेरिकाको उपस्थिति चीनले दाबी गर्ने ताइवान दक्षिण चीन सागरमा पनि छ । अमेरिकाले चीनलाई आफ्नो प्रमुख चुनौती नै भन्ने गरेको छ ।

चीन र अमेरिकाबीचको टकरावका बीच अमेरिकी क्लब इन्टर मायामी र मेस्सीले चीनप्रति राजनीतिक पूर्वाग्रह राखेको चिनियाँ बुझाइ छ ।

प्रकाशित मिति: आइतबार, माघ २८, २०८० १८:४७