निर्वाचन परिणामसँगै पाकिस्तानमा अन्योल: अबको सरकार कसको ?

A+ A A-

पाकिस्तानमा भएको आमनिर्वाचनले त्रिशंकु संसद निर्माण गरेको छ ।

नेसनल एसेम्ब्लीका २६४ सिटमा भएको निर्वाचनमा २५८ सिटको परिणाम घोषणा हुँदा सबैभन्दा धेरै ९३ सिट इमरान खान नेतृत्वको पाकिस्तान तहरिक–ए–इन्साफ (पीटीआई) समर्थित स्वतन्त्र उम्मेदवारहरूले जितेका छन् ।

दोस्रो स्थानमा रहेको पाकिस्तान मुस्लिम लिग (नवाज) ले ७४ र तेस्रो स्थानको पाकिस्तान पिपुल्स पार्टी पीपीपीले ५४ सिट जितेको छ ।

पाकिस्तानको निर्वाचनमा सेनाको साथका बाबजुद नवाज शरिफको पाकिस्तान मुस्लिम लिग (नवाज) को हारलाई सन् १९७० पछि पहिलोपटक चुनावमा पाकिस्तानी सेनाको हारका रूपमा हेरिएको छ ।

सन् २०२२ मा सत्ताबाट हटाइएका इमरान खानको पार्टीका शीर्ष नेताहरूलाई जेल हालेर पार्टी र पार्टीको चुनाव चिह्नसमेत प्रयोग गर्न नदिई गरिएको निर्वाचनमा नवाज शरिफको पार्टीले बहुमत ल्याउने आकलन थियो । तर, अधिकांश दलले धाँधली भएको आरोप लगाएको निर्वाचनमा शरिफको पार्टी दोस्रो नम्बरमा खुम्चिएको छ ।

सबैभन्दा धेरै सिट जितेको इमरान खानको पार्टी पीटीआई समर्थकले गत वर्ष सेनाको मुख्यालयसहित विभिन्न स्थानमा आक्रमण गरेपछि पीटीआई र सेनाको सम्बन्ध नराम्ररी बिग्रिएको छ ।

चुनाव सम्पन्न भएको तीन दिन बितिसक्दा पनि निर्वाचन आयोगले परिणाम घोषणा गर्न ढिलाइ गरेको छ । सुरुमा पीटीआईका उम्मेदवार अघि रहेका र परिणाम ढिला घोषणा गरिएका स्थानमा पाकिस्तान मुस्लिम लिग (नवाज) का उम्मेदवारहरू विजयी हुनुले पनि धाँधलीको आशंकालाई बल पुर्‍याएको छ ।

पाकिस्तानको निर्वाचनमा कुनै पार्टीको स्पष्ट बहुमत नआएका कारण सरकार गठनमा समस्या देखिएको छ । पूर्वप्रधानमन्त्री नवाज शरिफले गठबन्धन सरकार निर्माणको आह्वान गरेका छन् ।

शरिफको आह्वानलाई सेना प्रमुख असिम मुनिरले समेत समर्थन गरेका छन् । तर, बिलवाल भुट्टो जरदारीको पाकिस्तान पिपुल्स पार्टीले भने मुस्लिम लिग नवाजसँग सत्ता साझेदारी नहुन सक्ने संकेत दिएको छ । पीपीपी पनि आफ्नो नेतृत्वमा सरकार बनाउन चाहन्छ ।

पीटीआईका स्वतन्त्र उम्मेदवार र स्वतन्त्र जितेका सांसदहरूको संख्या अबको संसदमा सबैभन्दा बढी हुनेछ । नवाज शरिफको पीएमएल–एनले सरकार बनाउने तयारी गरिरहँदा सबैभन्दा धेरै सिट जितेको पीटीआई सरकार बनाउन नपाए आन्दोलन गर्ने तयारीमा देखिन्छ ।

निर्वाचन धाँधलीको आरोपमा जमात–ए–इस्लामीले कराचीका ८ स्थानमा प्रदर्शनको योजना बनाएको छ भने जमीयत उलेमा–ए–इस्लामले पनि चुनावमा गडबडीको आरोप लगाउँदै २८ स्थानमा धर्ना बस्ने र राष्ट्रिय राजमार्गमा जक्काजाम गर्ने घोषणा गरेको छ ।

धाँधलीको आरोप लागेपछि अमेरिकासहित अन्तर्राष्ट्रियस्तरमा समेत निर्वाचनलाई वैधता नदिन माग उठेको छ ।

राजनीतिक अस्थिरताको फाइदा उठाउँदै पाकिस्तानमा पटकपटक सत्ता कब्जा गर्दै आएको सेनालाई यो निर्वाचनको परिणामले आफूअनुकूल नवाज शरिफलाई सत्तामा ल्याउन सहज नहुने देखिन्छ ।

राजनीतिक जोडघटाउ गरेर शरिफ प्रधानमन्त्री बनेपनि पीटीआईबाहेक सबै दल र स्वतन्त्र सांसदलाई साथमा राखेर सरकार टिकाउने चुनौती हुनेछ ।

प्रकाशित मिति: आइतबार, माघ २८, २०८० १५:५२