राष्ट्रिय प्रत्यारोपण केन्द्रमा १९औँ कलेजो प्रत्यारोपण सफल

A+ A A-

शहीद धर्मभक्त राष्ट्रिय प्रत्यारोपण केन्द्र, भक्तपुरल गरेकोे १९ औं कलेजो प्रत्यारोपण पनि सफल भई डिस्चार्ज हुन लागको छ । गत आइतबार मोरङ्ग, विराटनगरका ६१ वर्षीय श्रीमान्लाई उनकी ५१ वर्षीया श्रीमतीले कलेजो दान दान गरेकी थिइन् । नेपालमा सबैभन्दा धेरै कलेजो प्रत्यारोपण गर्ने यस केन्द्रले स्थापनाको ११ वर्ष अवधिमा १२०३ जनाको सफल मृर्गौला प्रत्यारोपण त्यो पनि ९९ प्रतिशत सफलताका साथ सम्पन्न गरेको छ ।

नेपालमा प्रत्यारोपण शल्य चिकित्सक डा.पुकार चन्द्र श्रेष्ठकै नेतृत्वमा पहिलो कलेजो प्रत्यारोपण भएको हो । डा.पुकारले एक दशकअघि देखि नै मुलुकमा कलेजो प्रत्यारोपणको पूर्वाधार, जनशक्ति विकास, कानुन निर्माण गर्नमा अहभ भूमिका निर्वाह गर्दै आएका छन् । डा. श्रेष्ठको नेतृत्वमा यस वर्ष मात्रै १० जनाको कलेजो प्रत्यारोपण भइसकेको छ । संसारकै सबैभन्दा न्यूनतम शुल्क १५ देखि २० लाखमा कलेजो प्रत्यारोपण गरिरहेको केन्द्रले जनाएको छ । जसले केन्द्रमा आएर उपचार गराउने बिरामीहरूको संख्या दिनानुदिन बढ्दै गएको छ ।

केन्द्रले पछिल्लो केही कलेजो प्रत्यारोपणमा एक जना भारतीय विशेषज्ञको उपस्थित रहे पनि उनको भूमिका अकस्मात् देखिन सक्ने जटिलता नियन्त्रण गरी विज्ञहरूलाई थप हौसला प्रदान गर्नु बाहेक खासै नरहेको समेत बताइएको छ ।

केन्द्रमा भएको पछिल्लो कलेजो प्रत्यारोपणसँगै देशभरिमा ४ वटा केन्द्रमार्फत हालसम्म ३९ जनाको कलेजो प्रत्यारोपण भइसकेको छ । केन्द्रमा मुलुकमै पहिलोपटक डा.पुकार कै नेतृत्वमा मस्तिष्क मृत्यु भएको दाताबाट प्राप्त कलेजोलाई अन्य व्यक्तिमा प्रत्यारोपण गरिएको थियो भने हालसम्म मस्तिष्क मृत्यु भएका दाताबाट प्राप्त कलेजो तीन जनामा प्रत्यारोपण गरिसकिएको छ ।

केन्द्रले देशको सातवटै प्रदेशमा मृगौला प्रत्यारोपण तथा डाइलाइसि सेवा विस्तार गर्ने नेपाल सरकारको योजनामा महत्वपूर्ण भूमिका निर्वाह गर्दै आएको छ । यसका लागि आवश्यक दक्ष जनशक्ति उत्पादन गर्ने कार्य भइरहेको छ भने प्रत्यारोपण फेलोसिप कार्यक्रम सञ्चालन गर्नके लागि अन्तिम तयारी पूरा भएको छ ।