पहिलोपटक कुरान शरीफ वाचन तथा स्मरण प्रतियोगिता

A+ A A-

नेपालमा पहिलोपटक राष्ट्रिय स्तरमा पवित्र कुरान वाचन तथा स्मरण प्रतियोगिताको आयोजना गरिएको छ ।

साउदी दूतावासको सहयोगमा मुस्लिम आयोगले आयोजना गरिएको उक्त प्रतियोगीताको मुस्लिम आयोग अध्यक्ष समिम मिया अन्सारी र नेपालस्थित साउदी राजदूत साद नासिर अब्दुलाहले संयुक्त रूपमा उदघाटन गरेका थिए । प्रतियोगितामा देशभरिबाट करिव दुई सयभन्दा बढी मुस्लिम छात्रछात्रा (तालिवा) सहभागी भएका छन् ।

प्रतियोगिता उदघाटन समारोहलाई सम्बोधन गर्दै आयोगका अध्यक्ष अन्सारीले यस्ता कार्यक्रमले मदरसामा पढने छात्रछात्राहरूलाई कुरान शरीफको अध्यनप्रति रुचि बढने, कुरानका वाक्यहरू सही तरिकाले उच्चारण गर्ने तथा कुरानको वास्तविक संदेश सर्वसाधारण प्रवाह गर्ने मद्दत पुग्ने बताए ।

आयोगले नेपाली मुस्लिम समुदायको संरक्षण, प्रबर्द्धन तथा उत्थानका लागि विभिन्न कार्यक्रम गर्दै आएको बताउँदै अध्यक्ष अन्सारीले यस्ता कार्यक्रम सहयोग गरेकोमा साउदी सरकारलाई समेत धन्यवाद दिए ।

कार्यक्रमलाई सम्बोधन गर्दै नेपालस्थित साउदी राजदूत साद नासिर अब्दुलाहले मुस्लिम छात्रछात्राहरूको क्षमता अभिवृद्धिका लागि यस्तो कार्यक्रममा सहयोग गरेकोमा साउदी सरकार नेपाल सरकार र मुस्लिम आयोगलाई धन्यवाद दिए । यस्ता कार्यक्रमले दुई देशको सम्बन्ध प्रगाढ हुने उनको भनाइ थियो ।

कार्यक्रममा राष्ट्रियसभा सदस्य मौलना खालिद सिद्दिकी, आयोगका सदस्यहरू मिर्जा अर्शद बेग, समसुल हक, महमदीन अली, आगोयका सचिब चण्डी प्रसाद घिमिरे, भारतको दिल्लीस्थित साउदी दूतावासका उप प्रमुख बदर नासिर अल्नाजी, मौलाना अब्दुल कयूम, मौलाना नजरुल हसन फलाही, डाक्टर अब्दुल गनि अल्काफीसहितको सहभागिता रहेको थियो ।

आयोगका सदस्य तथा प्रवक्ता मिर्जाले विभिन्न उमेर समुहमा प्रथम, दोस्रो तथा तेस्रो हुने १७ जना छात्रछात्रहरलाई पुस्कृत गरिएको बताए ।

प्रकाशित मिति: शनिबार, माघ २७, २०८० १५:३५