स्वतन्त्र उम्मेदवारको जितबारे जेलबाटै इमरान खानको सन्देश, ‘लण्डन प्लान फेल’

स्वतन्त्र उम्मेदवारको जितबारे जेलबाटै इमरान खानको सन्देश, ‘लण्डन प्लान फेल’

A+ A A-

पाकिस्तानको आम निर्वाचनमा पीटीआई समर्थित उम्मेदवारको भारी जितबारे पार्टी प्रमुख एवं पूर्वप्रधानमन्त्री इमरान खानको भनाइ आएको छ । यद्यपि, यो भनाइ एआईबाट बनाइएको हो किनकि इमरान यतिबेला भ्रष्टाचार मुद्दाका कारण जेलमा छन् ।

पूर्वप्रधानमन्त्रीको पार्टी पीटीआईका तफर्लबाट सोसल मिडिया साइट एक्समा इमरानको आवाजमा भनाइ सार्वजनिक गरिएको हो । उक्त सन्देशमा अडियाला जेलमा कैद इमरानले भनेका छन्, ‘तपाईंहरूले भोट दिएर साँचो स्वतन्त्रताको आधार राखिदिनुभएको छ । २०२४ को निर्वाचनमा जितका लागि तपाईंहरूलाई बधाई दिन्छु । लण्डन प्लान तपाईंहरूको भोटका कारण फेल भएको छ ।’

इमरानको सन्देशमा पूर्वप्रधानमन्त्री नवाज शरीफबारे पनि टिप्पणी गरिएको छ । शरीफले ‘तीस सिट पछाडि हुँदाहुँदै विजयी भाषण दिएको इमरानले बताएका छन् ।

धाँधली सुरु हुनुभन्दा पहिले आफूहरू राष्ट्रिय सभाको १ सय ५० सिटभन्दा बढी जिततिर उन्मुख रहेको इमरानले दाबी पनि गरेका छन् ।

उनले भनेका छन्, ‘फार्म ४५ को डेटाअनुसार राष्ट्रिय सभाको १ य ७० सिटमा हामी जितिरहेका छौँ ।’

निर्वाचन आयोगले अहिलेसम्म अन्तिम नतिजा घोषणा गरेको छैन । पीटीआई समर्थित निर्दलीय प्रत्यासीहरूले अग्रता हासिल गरेका छन् ।

पीटीआईले मतगणनामा धाँधलीको आरोप लगाएको छ तर यसको कुनै ठोस प्रमाण भने पेस गर्न सकेको छैन ।

इमरान खानले आफ्नो पार्टी र कार्यकर्तालाई भोटको सुरक्षा गर्न सुझाव दिएका छन् ।

पाकिस्तानको नेसनल एसेम्बली (संसद) २ सय ६६ सिटको छ । अहिलेसम्मको नतिजामा पीटीआई समर्थित ८४ जना स्वतन्त्र उम्मेदवारले जित हासिल गरेका छन् । नवाज शरीफको पार्टी पीएमएल (एन) का ७० उम्मेदवारले जितेका छन् ।

पीपीपी ५१ सिटमा र अन्य उम्मेदवार ३१ सिट निर्वाचित भएका छन् ।

प्रकाशित मिति: शनिबार, माघ २७, २०८० ०८:५०