पाकिस्तान ‘खण्डित जनादेश’ तिर, स्वतन्त्र जितेकाहरूसँग कस्ता विकल्प ?

निर्वाचन आयोगले इमरानको पार्टी पीटीआईको आन्तरिक निर्वाचनलाई रद्द गर्दै उसको चुनाव चिन्हसमेत फिर्ता लिएको थियो ।

A+ A A-

पाकिस्तानको आम निर्वाचनमा ठूलो संख्यामा स्वतन्त्र उम्मेदवारहरूले जित हात पारिरहेका छन् । यीमध्ये धेरैजसो इमरान खानको पार्टी पाकिस्तान तहरीक–ए–इन्सफ (पीटीआई) ले समर्थन गरेकाहरू छन् ।

अहिलेसम्म ७० भन्दा बढी स्वतन्त्र उम्मेदवारले नेसनल असेम्बली (पाकिस्तानी संसद) को सिट जितिसकेका छन् । मतगणना जारी छ ।

जित्नेमा तहरीक–ए–इन्सफाका अध्यक्ष बेरिस्टर गौहर अली खान, वरिष्ठ उपाध्यक्ष लतीफ खोसा, पूर्व सभामुख असद केसर रर पार्टी सदस्य अली अमीन गण्डापुरलगायत छन् ।

यसबाहेक पीटीआईले समर्थन गरेका स्वतन्त्र उम्मेदवारले खैबर पख्तूनख्वाहको विधानसभामा बहुमत ल्याउने देखिएको स्थानीय मिडियाले लेखेका छन् । पञ्चाब विधानसभामा समेत स्वतन्त्र प्रत्यासीहरूले नवाज शरीफको मुस्लिम लिगलाई राम्रै टक्कर दिएका छन् ।

पीटीआई समर्थित स्वतन्त्र उम्मेदवारसँग के विकल्प छ?

निर्वाचन कानुन देखाउँदै विश्लेषकहरूले स्वतन्त्र उम्मेदवारले कानुनी रूपमा राजनीतिक दलमा सामेल हुनुपर्ने बाध्यता नरहेको बताएका छन् । अर्थात उनीहरूले चाहेमा राष्ट्रिय वा प्रान्तीय विधानसभामा स्वतन्त्र हैसियतमै रहन सक्छन् ।

यद्यपि, उनीहरू अक्सर विभिन्न कारणले कुनै राजनीतिक दलमा सामेल हुने अनुमान गरिन्छ ।

आफ्नो राजनीतिक करिअर बनाउन स्वतन्त्र विजयीहरू दलमा आबद्ध हुन पुग्छन् । यसबाहेक आफूलाई कुनै राजनीतिक विचारधारामा जोड्ने वा संसदमा अझै सक्रिय भूमिका निर्वाह गर्ने उद्देश्यले पनि स्वतन्त्रहरू दलमा प्रवेश गर्न सक्छन् ।

निर्वाचित भएपछि स्वतन्त्र विजयीहरूसँग तीन दिनको समय हुन्छ, उनीहरू दलमा आबद्ध हुन चाहेमा यही अवधिभित्र पार्टी रोजिसक्नुपर्ने हुन्छ ।

निर्वाचन आयोगको नियमअनुसार निर्दलीय उम्मेदवारले त्यही दलमा सामेल हुन पाउँछन, जसको चुनाव चिन्ह उनीहरूलाई मतपत्रमा दिइएको थियो ।

पाकिस्तानमा पीटीआई अहिले सक्रिय छैन । त्यसैले यी स्वतन्त्र उम्मेदवारलाई पार्टी रोज्न निकै सकस पर्न सक्छ ।

पाकिस्तानको निर्वाचन आयोगले केही घण्टाको ढिलाइपछि आम चुनावको प्रारम्भिक नतिजा घोषणा गर्न थालेको थियो । राजनीतिक विश्लेषकहरूका अनुसार, यति बेला पाकिस्तान ‘खण्डित जनादेश’ तिर अघि बढिरहेको देखिन्छ ।

प्रकाशित मिति: शनिबार, माघ २७, २०८० ०७:०५