सुरक्षा परिषद्‌को बैठकमा रुस र अमेरिकाले एक-अर्कालाई अपराधीसँग गरे तुलना (भिडियो)

सुरक्षा परिषद्‌को बैठकमा रुस र अमेरिकाले एक-अर्कालाई अपराधीसँग गरे तुलना (भिडियो)

A+ A A-

संयुक्त राष्ट्रसंघ सुरक्षा परिषद्‌को बैठकमा अमेरिका र रुस भनाभनमै उत्रिएका छन् । यतिसम्म कि उनीहरूले एकअर्कालाई अपराधीसँग तुलना गरे । सुरक्षा परिषद्‌को बैठकमा राष्ट्रसंघका लागि अमेरिकी कार्यवाहक राजदूत रोवर्ट वुडले रुसले उत्तर कोरियाली ब्यालिस्टिक क्षेप्यास्त्र प्रयोग गर्दै युक्रेनमा आक्रमण गरेको आरोप लगाएका थिए ।

वुडका अनुसार सन् २०२२ यता जारी रुस-युक्रेन युद्धमा रुसले ९ पटक उत्तर कोरियाली ब्यालस्टिक क्षेप्यास्त्र प्रयोग गरिसकेको छ । रुस र उत्तर कोरियालाई उनीहरूका कामका लागि जवाफदेही बनाउनुपर्ने र उनीहरूको कामले राष्ट्रसंघका नियम उल्लंघन भएको वुड बताउँछन् ।

रुसी कार्यले सुरक्षा परिषद्को प्रस्तावअन्तर्गत लामो समयदेखिको दायित्वलाई कमजोर पार्ने पनि उनको भनाइ छ । यस्ता दाबीलाई रुस र उत्तर कोरियाले अस्वीकार गर्दै आएका थिए । यस्तोमा अमेरिकी भनाइको रुसले पनि भड्किलो जवाफ दिएको छ । राष्ट्रसंघका लागि रुसी राजदूत भासिली नेबेन्जियाले हालै रुसी सेनाको विमानमा आक्रमण हुनुमा अमेरिका जिम्मेवार भएको बताइदिए । हालै ६५ युक्रेनी युद्धबन्दीसहित ७४ जनाले रुसी इल-७६ विमान दुर्घटनामा ज्यान गुमाएका थिए । रुसका अनुसार युक्रेनी सेनाले उक्त विमान अमेरिकी सहयोगमा खसाएको हो ।

भासिलीले भनेका छन्, ‘हामीसँग अकाट्य प्रमाण छ कि हाम्रो विमान खसाउन अमेरिकी प्याट्रियट मिसाइल प्रयोग गरिएको थियो, जसले यो अपराधमा वाशिङ्‌टनको प्रत्यक्ष संलग्न छ भन्नेमा कुनै शंका छैन ।’

उसो त रुसले युक्रेनमा आक्रमण थालेदेखि नै अमेरिकाले युक्रेनलाई शक्तिशाली हतियार दिइरहेको छ । वास्तवमा अमेरिका र रुस नै संयुक्त राष्ट्रसंघ सुरक्षा परिषद्का‌ स्थायी सदस्य हुन् । राष्ट्रसंघको मुख्य उद्देश्य अन्तर्राष्ट्रिय शान्ति र सुरक्षा कायम राख्नु हो, मानव अधिकारको रक्षा गर्नु हो साथै अन्तर्राष्ट्रिय कानुनको पालना गर्नु पनि राष्ट्रसंघको दायित्व हो ।

तर, यी दुवै राष्ट्र विभिन्न युद्धमा होमिएका छन् । यी दुवै राष्ट्र युद्धमा हतियार बेच्ने प्रमुख राष्ट्र पनि हुन् । यी दुवै राष्ट्रबाट राष्ट्रसंघीय दायित्व पूरा हुन नसकेको टिप्पणी भइरहन्छ ।

(भिडियो)

प्रकाशित मिति: बुधबार, माघ २४, २०८० १७:३२