नेपाल लाइफले ६ महिनामै कमायो ४२ करोड ७७ लाख खुद नाफा, दाबी भुक्तानी ६८२ करोड

A+ A A-

नेपाल लाइफ इन्स्योरेन्सले ६ महिनामा ४२ करोड ७७ लाख रुपैयाँ खुद नाफा आर्जन गरेको छ । कम्पनीको हालै प्रकाशित चालु आर्थिक वर्षको दोस्रो त्रैमाससम्मको अपरिष्कृत वित्तीय विवरणअनुसार उक्त परिमाणको खुद नाफा आर्जन भएको देखिएको हो ।

दोस्रो त्रैमाससम्मको वित्तीय विवरणअनुसार कम्पनीको खुद नाफामा १२.९० प्रतिशतको वृद्धि भएकोे छ । गत आर्थिक वर्षको सोही अवधिसम्ममा कम्पनीले ३७ करोड ८८ लाख रुपैयाँ नाफा कमाएको थियो ।

त्यस्तै, कम्पनीले दोस्रो त्रैमासिक अवधिसम्ममा कुल बीमाशुल्क २,०००.०६ करोड आर्जन गरेको छ । गत वर्षको सोही अवधिमा कम्पनीले कुल बीमाशुल्क १,८६२.७२ करोड आर्जन गरेको थियो । बीमाशुल्क आर्जनमा ७.३७ प्रतिशतले वृद्धि भएको छ ।

कम्पनीले समीक्षा अवधिमा ३ अर्ब १६ करोड प्रथम बीमाशुल्क आर्जन गरेको छ । यो गत आर्थिक वर्षको सोही अवधिको तुलनामा १९.६९ प्रतिशतले बढी हो । गत आर्थिक वर्षको सोही अवधिसम्ममा कम्पनीले २ अर्ब ६४ करोड रुपैयाँ प्रथम बीमाशुल्क आर्जन गरेका थियो ।

त्यसैगरी, नवीकरण बीमाशुल्क १६ अर्ब ८३ करोड रहेको छ । यो गत आर्थिक वर्षको सोही अवधिको तुलनामा ५.३८ प्रतिशतले बढी हो । गत आर्थिक वर्षको सोही अवधिसम्ममा कम्पनीले १५ अर्ब ९७ करोड रुपैयाँ नवीकरण बीमाशुल्क आर्जन गरेको थियो ।

त्यसैगरी, कम्पनीले चालु आर्थिक वर्षको ६ महिनामा ६८२.०५ करोड खुद दाबी भुक्तानी गरेको छ । कम्पनीले छिटो र छरितो तरिकाले बीमितहरुको दावी भुक्तानी गर्ने नीति अवलम्बन गरेको छ । कम्पनीले नेपाल बीमा प्राधिकरणले जारी गरेको लगानी निर्देशिकाबमोजिम सुरक्षित क्षेत्रमा लगानी गर्दै दोस्रो त्रैमासिक अवधिसम्ममा १८,६१०.२१ करोड रुपैयाँ भरपर्दाे एवं सुरक्षित क्षेत्रमा लगानी गरेको छ ।

गत आर्थिक वर्षको अन्त्यसम्ममा करिब १५० अर्ब ८६ करोड रुपैयाँ रहेको जीवन बीमा कोष २१.७४ प्रतिशतले वृद्धि भई करिब १८३ अर्ब ६५ करोड रुपैयाँ पुगेको छ । कम्पनीको महाविपत्ति कोषमा १ अर्ब ४ करोड रुपैयाँ सञ्चित छ ।

त्यसैगरी, कम्पनीको रिटेन्ड अर्निङ १ अर्ब ३ करोड रुपैयाँ रहेको छ भने अन्य इक्विटी १७ करोड रुपैयाँ रहेको छ । ८ अर्ब २० करोड रुपैयाँ चुक्ता पुँजी रहेको यस कम्पनीको समीक्षा अवधिमा कम्पनीको प्रतिशेयर आम्दानी १०.४२ रुपैयाँ रहेको छ । त्यस्तै, कम्पनीको प्रतिशेयर नेटवर्थ १२८.०१ रुपैयाँ रहेको छ ।

प्रकाशित मिति: बुधबार, माघ २४, २०८० १८:०५