२८ लाख स्वाहा ! खानेपानीका लागि हिउँदवर्षै लाइन

A+ A A-

केदारस्युँ गाउँपालिका–२, जुबमा खानेपानी समस्या भएको छ । करिब १०० घरधुरी रहेको जुब गाउँमा खानेपानी भर्नकै लागि रातदिन अन्य कामकाज छोडेर परिवारको एक जनाले लाइनमा बस्नुपर्ने हुन्छ ।

गाउँमा एउटा मात्रै खानेपानीको मुहान छ । केही समयअगाडि उक्त मुहानबाट दुईवटा धारामा पानी आउँथ्यो तर अहिले जनसंख्या वृद्धि र जंगलको विनाशले मुहान सुक्दै गएको छ । सानो मुहान भए पनि त्यसकाे उचित व्यवस्थापन छैन ।

‘तिर्खा लागेको बेला पनि धित मरुन्जेल पानी खान पाइँदैन । अहिले खेतबारीमा काम गर्ने समय हो । काम गर्दै जाँदा पानी तिर्खाले घाँटी सुक्न थाल्छ । धारामा जाऊँ सबै लाइमा बसेका हुन्छन् । पानी पिउन दिनुस् भन्दाभन्दै झगडा सुरू हुन्छ ,’ स्थानीय अम्मर ओखेडाले भने ।

त्यस्तै, चुने लुहारले पनि समस्या थप्दै भने, ‘हाम्रो त दिनभरिको काम भनेकै खानेपानी जम्मा गर्नु हो । पानीका लागि लाइनमा बसिएन भने त खाना कसरी खानु हजुर ? यस्तो पानीको हाहाकार त संसारमा कहीँ पनि नहोस् भगवान् !’

विगत ५ वर्षदेखि पानीका लागि तड्पिइरहने जुबवासीलाई स्थानीय सरकारले पनि स्वच्छ खाने पानी उपलब्ध गराउन सकेको छैन । वडाअध्यक्ष चक्र बिक भन्छन्, ‘खानेपानीका लागि वडा र गाउँपालिकाबाट लाखौं रकम खर्च भइसकेको छ, तर पनि खानेपानी ल्याउन सकिएको छैन ।’

उनले थपे, ‘विगत ५ वर्षदेखि हामी निरन्तर खानेपानीको मुहान खोजिरहेका छौं । अहिलेसम्म २८ लाख रुपैयाँ सकियो । अहिले जुब गाउँबाट ११ किलोमिटर पर डाफ्रु गाउँमा मुहान भेट्टाएका छौं । अब त्यही मुहानबाट जसरी पनि खानेपानीको समस्या समाधान गर्छौं ।’

उनका अनुसार प्रदेश सरकारले १ करोड रुपैयाँ अनुदान दिएको छ । अबको एक वर्षपछि १ सय २० एमएमको पाइपमा जुबमा खानेपानी झर्छ ।

गाउँमा सबैले चर्पी बनाएका छन् तर चर्पीमा राख्ने पानी छैन । लुगा धुन, खाना पकाउन, पशु चौपायालाई खुवाउन उस्तै समस्या छ । धूलो पिस्नका लागि त झन् दुई घण्टा ओरालो झर्नुपर्ने बाध्यता छ ।

केदारस्युँ गाउँपालिकाको सिरानीमा रहेको जुब गाउँमा सडकको मात्र पहुँच पुगेको छ । अन्य पूर्वाधारबाट वञ्चित जुब गाउँवासी आफूलाई यस ठाउँमा जन्मनुपरेको भन्दै सराप्ने गर्छन् । सरकारले आफूहरूका आवश्यकता वर्षौंदेखि नबुझेको जुबवासीको गुनासो छ । वर्षामा पनि पानीका लागि तड्पिनुपरेका जुब गाउँबासीलाई हिउँदमा त झन् पूरै दिन पानीकै लागि बित्ने गर्दछ ।