बेलायती राजा चार्ल्स तृतीयलाई क्यान्सर पुष्टि, विश्वका नेताहरूले गरे स्वास्थ्य लाभको कामना

बेलायती राजा चार्ल्स तृतीयलाई क्यान्सर पुष्टि, विश्वका नेताहरूले गरे स्वास्थ्य लाभको कामना

A+ A A-

बेलायतका राजा चार्ल्स तृतीयलाई क्यान्सर रोग लागेको पुष्टि भएको छ । आमा महारानी एलिजावेथ द्वितीयको निधनपछि गत वर्ष मात्रै औपचारिक रूपमा राजा भएका ७५ वर्षीय चार्ल्सलाई प्रोस्टेटको उपचारका क्रममा क्यान्सर पत्ता लागेको बर्किङ्घम दरबारले जनाएको छ ।

दरबारले चार्ल्सलाई कस्तो क्यान्सर लागेको हो र शरीरका कुन भागमा हो भन्ने बताएको छैन । तर, उनको क्यान्सर प्रोस्टेटसँग सम्बन्धित नभएको र उपचार सुरु भएको बताइएको छ ।

यद्यपि, उनलाई रोग निको भएर सार्वजनिक जीवनमा आउन कति समय लाग्छ भन्ने केही खुलाइएको छैन । बिरामी भएका कारण उनी केही समयका लागि राजकीय कार्यक्रममा सहभागी नहुने दरबारले उल्लेख गरेको छ ।

उनको स्थानमा यस्ता कार्यक्रममा राजपरिवारका अन्य वरिष्ठ सदस्य सहभागी हुनेछन् । राजदरबारमै उपचार गराइरहेका राजा चार्ल्सले यो क्रममा आफ्ना राजकीय जिम्मेवारी भने निर्वाह गर्नेछन् । जसमा दस्तावेजहरूमा हस्ताक्षर गर्ने र दरबारभित्र आयोजना हुने साना बैठकहरू हुनेछन् । सन् २०२२ सेप्टेम्बरमा आमा एलिजावेथ द्वितीयको निधनपछि उनी ७४ वर्षको उमेरमा राजा बनेका थिए ।

चार्ल्सको स्वास्थ्यको खबर आएलगत्तै बेलायती प्रधानमन्त्री ऋषि सुनकले उनको शीघ्र स्वास्थ्यलाभको कामना गरेका छन । सुनकले एक्समा भने, ‘मलाई कुनै शङ्का छैन कि उहाँ छिट्टै पूर्ण शक्तिमा फर्कनु हुनेछ र मलाई थाहा छ सम्पूर्ण देश उहाँको स्वास्थ्यलाभको लागि प्रार्थना गरिरहेको छ ।’

पूर्व बेलायती प्रधानमन्त्रीहरू लिज ट्रस, बोरिस जोनसन र सर टोनी ब्लेयरले पनि यस्तै सन्देशहरू पोस्ट गरेका छन् । जोनसनले भनेका छन, ‘आज सम्पूर्ण देश राजाको साथमा हुनेछ ।’

अमेरिकी राष्ट्रपति जो बाइडेनले पनि आफू चार्ल्सको बारेमा चिन्तित रहेको जनाउँदै उनीसँग फोनमा कुरा गर्ने बताएका छन् । विश्वका धेरै राष्ट्र र सरकार प्रमुखले बेलायती राजाको स्वास्थ्य अवस्थालाइ लिएर चिन्ता र चासो व्यक्त गरेका छन् ।

प्रकाशित मिति: मंगलबार, माघ २३, २०८० १४:४४