विवादका बीच माल्दिभ्समा घटे भारतीय पर्यटक, चिनियाँ पर्यटक भने बढे (भिडियो)

A+ A A-

गत नोभेम्बरमा माल्दिभ्सको सत्ता सम्हालेयता मोहम्मद मुइज्जु सरकार र भारतबीचको सम्बन्धमा दरार उत्पन्न भएको छ । सम्बन्धमा समस्या देखिँदा माल्दिभ्समा भारतीय पर्यटकको संख्या ह्वात्तै घटेको छ ।

सोमबार माल्दिभ्सको पर्यटन पन्त्रालयले सार्वजनिक गरेको तथ्यांकअनुसार यस वर्ष भारतका १६ हजार ५३६ पर्यटकले माल्दिभ्सको भ्रमण गरे । भारतीयभन्दा बढी चिनियाँ पर्यटकले माल्दिभ्सको भ्रमण गरेको तथ्यांकमा देखिएको छ ।

यस वर्ष चीनका २३ हजार ९७२ पर्यटकले माल्दिभ्सको भ्रमण गरिसके । मुइज्जु 'इन्डिया आउट'को नारा लगाउँदै राष्ट्रपति बनेका थिए । उनले विमान मर्मतका लागि माल्दिभ्स पुगेका भारतीय सेनालाई पनि देश छाड्न निर्देशन दिइसकेका छन् । यस्तोमा मुइज्जुले चीनको भ्रमण गरे, चिनियाँ राष्ट्रपति सी चिनफिङसँग प्रगाढ सम्बन्ध र आर्थिक साझेदारीको सम्झौता गरे ।

यसबीचमा माल्दिभ्सले भारतविरुद्ध नीतिहरू लिँदै गएको देखेपछि भारतका प्रधानमन्त्री नरेन्द्र मोदीले भारतीय टापुहरूको समूह लक्ष्यदीपको भ्रमण गर्दै उनले भारतीय नागरिकलाई लक्ष्यदीपको भ्रमण गर्न आह्वान गरे । लक्ष्यदीप माल्दिभ्सजस्तै टापुहरूको समूह हो । यहाँ विलासी होटलहरु खुल्न थालेका छन् ।

यसरी मोदीले अप्रत्यक्ष रूपमा माल्दिभ्स छाडेर लक्ष्यदीप भ्रमणको सन्देश दिएपछि भारतीय पर्यटकहरूले माल्दिभ्स जान भनेर काटेको विमानको टिकट पनि रद्द गरेका थिए । यसपछि नै माल्दिभ्सका तीन मन्त्रीले मोदीविरुद्ध अपमानजनक टिप्पणी गरेका थिए ।

त्यसपछि भारतमा माल्दिभ्स बहिष्कारकै अभियान चलेको थियो । जेहोस्, चीननिकट मुइज्जुको आगमनसँगै भारत र माल्दिभ्सबीच दरार उत्पन्न भएको छ । माल्दिभ्सका विपक्षीहरूले भारत आफ्नो देशको असल मित्र भएकाले मुइज्जुले माफी माग्नुपर्ने भनेर दबाब दिइरहेका छन् । मुइज्जुविरुद्ध अविश्वासको प्रस्ताव ल्याउने तयारी पनि भइरहेको छ ।

(भिडियो)

प्रकाशित मिति: मंगलबार, माघ २३, २०८० १३:३०