माओवादीमा ब्युँतियाे गुटको लडाइँ, बागमती इन्चार्जबाट जनार्दन हटाउने खेल

A+ A A-

नेकपा माओवादी केन्द्रको बागमती प्रदेश समिति इन्चार्जबाट जनार्दन शर्मालाई हटाउन भित्रभित्रै असन्तुष्ट पक्ष लागिपरेको छ । आज ( सोमबार) शर्मालाई हटाउनुपर्छ भन्ने पक्षका केन्द्रीय सदस्यहरूको भक्तपुरमा बैठक बसेको छ । बैठकमा काठमाडाैं उपत्यकाका तीनवटै जिल्लामा शर्मासँग असन्तुष्ट केन्द्रीय सदस्यहरू सहभागी भएका थिए ।

यो बैठकमा शर्मालाई बागमतीकाे इन्चार्जबाट जसरी पनि हटाउनुपर्नेबारे छलफल भएकाे एक केन्द्रीय सदस्यले बताए । ती केन्द्रीय सदस्यले भने, ‘भक्तपुरका दिलिप प्रजापतिको नेतृत्वमा जनार्दन कमरेडलाई हटाउने रणनीति बनाउन बैठक बसेकाे हाे । केही साथीहरू सुरुदेखि नै जनार्दन कमरेडसँग असन्तुष्ट हुनुहुन्थ्यो । एकपटक प्रधानमन्त्री तथा पार्टी अध्यक्षलाई भेट्न पनि जानुभयो । मलाई पनि बैठकमा आउन खबर गर्नुभएको थियो तर म गइनँ ।’

महासचिव देव गुरुङले सुरुमै मातृका यादवलाई बागमतीको इन्चार्ज बनाउन खोजेका थिए । तर, यादवले बागमती आउन नचाहेपछि शर्मालाई इन्चार्ज बनाइएको एक नेता बताउँछन् । ती नेताले भने, ‘महासचिव कमरेडले सुरुमै भनेको पूरा नभएपछि पछिल्लो समयमा हितमान शाक्यलाई बागमतीको इन्चार्ज बनाउनुपर्ने भन्दै केन्द्रीय सदस्यहरूलाई उचाल्नुभएको छ । माओवादी छोडेर वैद्यसँग गएर फर्केर आएका साथीहरू अहिले पनि गुट चलाएर बस्नुभएको छ । शाक्य पनि त्यही गुटको भएकाले बागमतीमा ल्याउने प्रपञ्च भइरहेको छ ।’

साउनमा भएको माओवादी केन्द्रको केन्द्रीय समितिको बैठकबाट भूगोल र गैरभूगोल गरेर १० वटा प्रदेशका इन्चार्ज परिवर्तन भएका थिए । इन्चार्ज परिवर्तन हुँदा बागमती प्रदेश इन्चार्ज शर्मा भएका थिए । शाक्य लुम्बिनी प्रदेशको इन्चार्ज छन् । यादव कर्णाली प्रदेश इन्चार्ज बने ।

शर्मा बागमती प्रदेश समितिको इन्चार्ज भएकोमा माओवादीका पदाधिकारी नै रुष्ट थिए । अहिले शर्माले एकतर्फी गर्न खाेजेकाे, बैठकमा समेत बोल्न नदिएको, पूर्ववैद्य समूहलाई पेलेर संगठन सञ्चाचालन गरेको आरोप नेताहरू दिलिप प्रजापती, राजकाजी महर्जनलगायतले आफूनिकटलाई सुनाउने गरेका एक नेता बताउँछन् ।

‘हितमान शाक्यले त सुरुबाटै बागमतीकाे इन्चार्ज हुन चाहनुभएकाे थियाे । तर, उहाँ लुम्बिनीको इन्चार्ज हुनुभयो । अहिले पनि आउन प्रयास गरिराख्नुभएको होला । भित्रभित्रै तयारी हुँदै छ भन्ने सुनेको छु’, एक नेताले भने ।

शर्माले एकलौटी रूपमा पार्टी संगठन सञ्चालन गरेको भन्दै तपाईंहरूको असन्तुष्टि रहेछ नि भन्ने प्रश्नमा नेता राजकाजी महर्जन खुलेर बाेल्न चाहेनन् । उनले यो पार्टीको आन्तिरिक मामिला भएको बताउँदै अगाडि भने, ‘ म बैठकमा छु, पछि कुरा गरौँला ।’

माओवादीले चलाएको तीनमहिने विशेष रूपान्तरण अभियानमा शर्माले नेता कार्यकर्तालाई फिल्डमा जान र काम गर्न ताकेता गरेकाले केही नेताहरू असन्तुष्ट रहेको बताइन्छ । तीन महिने रूपान्तरण अभियानमा शर्मा आफू पनि फिल्डमा खटेका थिए । सबै नेता कार्यकर्तालाई पनि खटिन निर्देशन दिएका थिए । तर, केही नेताहरू फिल्डमा देखिएजस्ताे गरेर फर्किएपछि शर्मा ती नेता कार्यकर्तासँग कडा रूपमा प्रस्तुत हुँदा उनीप्रति असन्तुष्टि बढेकाे माओवादी स्रोत बताउँछ ।

अहिले केन्द्रीय सदस्य मात्र होइन, प्रदेश सदस्य र जिल्लाका संयोजकहरू पनि शर्माविरुद्ध लागेका छन् । शर्माविरुद्ध लागेकाहरूले कार्यशैलीका बारेमा असन्तुष्टि जनाए पनि प्रमुख कुरा गुटको भएको माओवादी नेताहरूकाे भनाइ छ । ‘पूर्ववैद्य समूहका नेताहरू आफ्नो गुटबाहेक अरु नेताहरूलाई सहन नसक्ने, लखेट्ने गर्छन् । शर्मा बागमतीमा आएपछि यो समूहको हालीमुहाली बन्द गराएका थिए । त्यही रिसले उनलाई हटाएर हितमानलाई ल्याउन खोजेका छन् । यसको लागि त प्रचण्ड तयार हुनुपर्छ । अरुले जति गरेर पनि केही हुनेवाला छैन,’ शर्मानिकट एक नेताले भने ।

शर्मालाई हटाउन खाेजेका नेता दिलिप प्रजापतीले भने यसबारे अहिले नबाेल्ने प्रतिक्रिया दिए । ‘इन्चार्जसिप कसरी गरेर जाने भन्ने विषय छलफल गर्दै छाैँ । अहिले यो विषयमा धेरै नबोलौँ,' उनले भने ।

शर्मालाई हटाउन उपाध्यक्ष पम्फा भुसाल र महासचिव देव गुरुङ सक्रिय रहेकाे चर्चा छ । 'शर्मा इन्चार्ज भएर आउँदा नै केही साथीहरूको असन्तुष्टि थियो । तर, अहिले त हटाउनैपर्छ भनेर बालुवाटार कुदिरहेका छन् । उहाँलाई हटाउन महासचिव देव गुरुङ, उपाध्यक्ष पम्फा भुसाललगायत नेताहरू सक्रिय रूपमा लाग्नुभएको छ । किनभने उहाँहरूको एकछत्र राज शर्माले भत्काइदिनुभएको छ,’ शर्मानिकट ती नेताले भने ।

माओवादीमा गुटको लडाइँ कहिले सुषुप्त त कहिले चर्को रूपमा हुन्छ । पछिल्लो समय दोस्रो तहका नेताहरूमा मत्थर भएको गुटबन्दी पुन: विधान सम्मेलनको पूर्वसन्ध्यामा सुरु भएको छ ।

प्रकाशित मिति: सोमबार, माघ २२, २०८० १८:१५