क्यान्सर उपचारमा प्रयोग हुने ‘कार-टी सेल थेरापी’ के हाे ?

A+ A A-

क्यान्सर उपचारमा प्रयोग हुने ‘कार-टी सेल थेरापी’ को परीक्षण नेपालमा पनि सफल भएको छ ।

सेन्टर फर रिजेनरेटिभ मेडिसिन नेपालले काठमाडौंमा पत्रकार सम्मेलन गरी नेपालमा पनि ‘कार-टी सेल थेरापी’ सफल भएको बताएको हो । संयुक्त राज्य अमेरिकाको फुड एन्ड ड्रग एडमिनिस्ट्रेसनबाट प्रमाणित सीडी-१९ कारको प्रयोगशालामा कार-टी सेलको सफलतापूर्वक परीक्षण गरेको जनाएको हो ।

रिजेनरेटिभ मेडिसिनको सीडी-१९ कार-टी सेल स्वीस औषधि निर्माता नोभार्टिस र गिलियाडको कार-टी सेलजत्तिकै प्रभावकारी देखिएको अमेरिकाको एस्ट्राजेनेका फार्मास्यूटिकल्सको अन्कोलोजी विभागमा कार्यरत डा. सञ्जीवन गौतमले बताए । अति उच्च प्रविधियुक्त यस उपचार विधिको सफल प्रयोगशाला परीक्षण नेपालमा पहिलोपटक भएको उनको भनाइ छ ।

‘कार-टी सेल एक विशेष उपचार पद्धति हो, जुन रक्त क्यान्सरका बिरामीमा निकै प्रभावकारी देखिएको छ । नेपालमा यो पद्धति प्रयोगमा ल्याउन सकेमा देशकै लागि ठूलो अवसर हुनेछ,’ डा. गौतमले भने । अमेरिकाको सेन्टर्स फर डिजिज कन्ट्रोल एन्ड प्रिभेन्सन (सीडीसी) ले यो प्रविधिलाई सात वर्षअघि प्रमाणित गरेको थियो ।

त्यसपश्चात संसारका अन्य देशमा पनि यसको परीक्षण भएको छ । उनका अनुसार यसमा प्रयोग हुने रिएजेन्ट र उपकरण निकै महँगा र जटिल प्रविधियुक्त हुन्छन् । विकसित देशमा तीनदेखि पाँच करोड रुपैयाँसम्म खर्च लाग्ने कार-टी सेल थेरापीलाई अमेरिकी, जर्मन र ब्राजिलियन संस्थाको सहकार्यबाट नेपालमै १० गुणा कम लागतमा उत्पादन र उपलब्ध गराउने उद्देश्य रहेको डा. गौतमको भनाइ थियो ।

वीर अस्पतालको क्यान्सर विभागमा कार्यरत प्रा. डा. रमिला शिल्पकार रक्त क्यान्सरमा सफलतापूर्वक परीक्षण गरिएको यो उपचार पद्धति नेपाल प्रयोगमा ल्याउँदा बर्सेनि १०० भन्दा बढी बिरामी लाभान्वित हुने प्रक्षेपण गरिएको बताउँछिन् । यो पद्धति बिस्तारै रक्तसहित अन्य क्यान्सरमा पनि प्रयोग हुने क्रममा रहेको उनले बताइन् ।

वीर अस्पतालकै वरिष्ठ कलेजो रोज विशेषज्ञ प्रा. डा. सुधांशु केसीले कार-टी सेल थेरापी क्यान्सर मात्र नभई कलेजो, मधुमेह, स्वप्रतिरक्षा तथा मुटुसम्बन्धी रोगमा पनि प्रभावकारी देखिएको बताए । कार-टी सेल थेरापीले अबका केही वर्षमा नै उपचार पद्धतिमा महत्त्वपूर्ण हिस्सा ओगट्ने बेलायतको केभेन्ट्री विश्वविद्यालयका डा. ओम कुर्मी बताउँछन् ।

आनुवंशिकी वैज्ञानिक बलराम गौतमका अनुसार कार-टी सेल प्रविधिका लागि आवश्यक सामान पश्चिमा मुलुकबाट ‘फ्रिजिङ कन्डिसन’ मा आयात गर्नुपर्ने हुँदा महँगो पर्ने र ढुवानीमा जटिलता आउने जस्ता समस्या छन् । नेपाली प्रयोगशालामा सफल परीक्षण गरिएको कार-टी सेललाई प्रयोगमा ल्याउन कम्तीमा एक वर्ष लाग्ने यसमा संलग्न वैज्ञानिकहरूको अनुमान छ ।

औषधि व्यवस्था विभाग र राष्ट्रिय स्वास्थ्य अनुसन्धान परिषद्जस्ता निकायले कार-टी सेल नेपाल ल्याउन ऐन-नियमको व्यवस्था गर्न आवश्यक रहेको वरिष्ठ कलेजो रोज विशेषज्ञ डा. केसी बताउँछन् ।

प्रकाशित मिति: आइतबार, माघ २१, २०८० १५:३३