अरुण चौधरी पक्राउको साइड इफेक्टः कांग्रेसको संसदीय दल संक्रमित हुने त्रास

A+ A A-

बाँसबारी छालाजुत्ता कारखानाको जग्गा प्रकरणमा अरुण चौधरीलाई प्रहरीले नियन्त्रणमा लिएपछि त्यसको प्रत्यक्ष प्रभाव सत्ता गठबन्धनको सबैभन्दा ठूलो दल कांग्रेसमा परेको छ ।

कांग्रेस सांसद तथा उद्योगपति विनोद चौधरीका भाइ अरुण पक्राउ प्रकरणले कांग्रेसको संसदीय दल तात्तिएको छ । शुक्रबार कांग्रेसको संसदीय दलको बैठकमा विनोद चौधरीले भाइ अरुणको पक्राउ प्रकरणलाई प्रवेश गराइसकेका छन् । यद्यपि, त्यसदिन सभापति तथा संसदीय दलका नेता शेरबहादुर देउवा चौधरीको विषयमा मौन देखिए ।

आक्रोशित मुद्रामा उपस्थित भएका विनोद चौधरीको भनाइ पनि निकै कडा थिए । तर, कांग्रेसका अन्य सांसदले पनि खास प्रतिक्रिया दिएनन् । विनोद चौधरीले शुक्रबार संसदीय दलमा भाइ अरुणको पक्राउ प्रकरण उठाउनुअघि नै देउवाले प्रधानमन्त्री पुष्पकमल दाहाल प्रचण्डसँग लामो संवाद गरेका थिए ।

अरुण पक्राउ परेको भोलिपल्ट बिहानै देउवा बालुवाटार पुगेर प्रचण्डसँग आक्रोश पोखेका थिए । बालुवाटार स्रोतका अनुसार, ‘नारायणकाजीले डुबाइदियो भन्दै बालुवाटार पुगेका देउवाले के गरेको प्रचण्डजी बर्बाद भयो’ भन्दै आक्रोश पोखेका थिए । पार्टीभित्र आफ्नै गुटका सांसद विनोद चौधरीको भाइ अर्कातिर कांग्रेसले साथ पाइरहेका व्यवसायी । त्यसैले अरुणको पक्राउ प्रकरणले चौधरी ग्रुपको अन्तर्राष्ट्रिय छविमा पनि गम्भीर आघात पर्ने निश्चित नै छ । त्यसैले, विनोदको दबाब र डरले देउवा प्रचण्डसमक्ष पुगेको बताइएको छ ।

देउवा बालुवाटार पुग्नुअघि नै राष्ट्रपति रामचन्द्र पौडेलले पनि चासो राखेका थिए । स्रोतका अनुसार राष्ट्रपति पौडेलले देउवालाई बोलाएका थिए । त्यसैले, देउवा राष्ट्रपति निवासजानु अघि प्रधानमन्त्री निवास वालुवाटार पुगेका थिए । प्रधानमन्त्री प्रचण्डको भेटमा पनि राष्ट्रपति पौडेललाई भेट गर्ने विषय जानकारी पनि गराएका थिए । राष्ट्रपति पौडेलको पनि अरुण पक्राउ प्रकरणबारे चासो रहेको छ । उनका राजनीतिक सल्लाहकार सुनील थापा पक्राउलगत्तै सीआईबी पुगेका थिए । आफ्ना काका अजितनारायण थापा पक्राउ परेका कारण भेट्न गएको उनले शिलापत्रसँग बताएका थिए ।

अरुण चौधरी र अजितनारायाण थापा पक्राउको साइड इफेक्ट कांग्रेसमा देखिन थालेको छ । स्रोतका अनुसार निकै तनाव र त्रसित मुद्रामा बालुवाटार पुगेका देउवालाई अरुण पक्राउ प्रकरणले संसदीय अंकगणितको पनि चिन्ता देखिएको छ । स्रोतले देउवाले बालुवाटारमा उक्त कुरा प्रष्टसँग उल्लेख नगरे पनि संकेत भने गरेका थिए । हुन पनि, विनोद चौधरीले संसदीय दलमा चलखेल गरी संसदीय दलको नेता फेर्ने खेलमा लाग्दा दलको समीकरण हेरफेर हुन सक्छ । त्यसै पनि, शेखर कोइराला समूह पहिलादेखि नै दलको नेता फेर्न खोजिरहेका छन् । त्यसमा पछिल्ला दिनमा बालकृष्ण खाँण पनि थपिएका छन् । नक्कली भुटानी शरणार्थी प्रकरणमा पक्राउ परेपछि खाँण सरकारसँग मात्र होइन, आफ्नै सभापति देउवासँग पनि रुष्ट रहेका छन् । त्यसमा चौधरी थपिए संसदीय दलको नेताबाट देउवालाई हटाउन सकिने स्थिति बन्ने डर कांग्रेसको संस्थापन पक्षमा देखिन्छ ।

कोइराला समूहसँग करिब ३२ जना सांसद रहेका छन् । त्यसमा खाँण समूहका रहेका भनिएका ५ जना सांसद थपिन सक्छन् । त्यस्तो अवस्थामा ३७ जना सांसद पुग्नेछन् । कांग्रेसको ससदीय दलको नेता परिवर्तन गर्न बहुमत संख्या पुर्‍याउन कम्तीमा ४१ जना सांसद आवश्यक पर्छ । कोइराला र खाँण मिलेर ३७ जना सांसद पुगे भने विनोद चौधरीले आर्थिक शक्ति प्रयोग गरेर बढीमा ५ जनामा सांसद प्रभावित पारिदिए संसदीय दलको नेता नै परिवर्तन हुन सक्छ । अहिले कांग्रेसभित्र यही डरले काम गर्न थालेको स्रोतको दाबी छ ।

स्रोतका अनुसार सभापति देउवाले प्रधानमन्त्री प्रचण्डसँग पनि यही संकेत गरेका थिए । त्यसो त पछिल्ला दिनमा एमाले पनि कांग्रेसको शेखर कोइराला समूहसँग सहकार्य गर्दै आएको छ । गत असोजमा कोशी प्रदेश सरकार गठनमा यी दुई समूहले सहकार्य गरिसकेका छन् । त्यसबाहेक ११ माघमा राष्ट्रियसभा चुनावमा पनि माओवादी उम्मेदवारलाई कांग्रेसकै एक समूहले मतदान नगर्दा एमाले उम्मेदवार निर्वाचित भएका छन् । त्यसैले, एमालेले पनि कांग्रेसभित्र फेरबदल हुने समीकरणका लागि सहयोगी भूमिका नै खेल्न सक्छ ।

प्रकाशित मिति: आइतबार, माघ २१, २०८० ०८:२४