संसदीय दलकाे बैठकमा बम्किएका विनोद चौधरीलाई देउवाले दिएनन् भाउ

A+ A A-

२२ माघमा बोलाइएको संसदको हिउँदे अधिवेशनमा पार्टीको भूमिका प्रभावकारी बनाउन नेपाली कांग्रेसले संसदीय दलको बैठक शुक्रवार राख्यो । बैठकमा पार्टीका आन्तरिक विषयभन्दा सांसद विनोद चौधरीले बोलेको विषयले प्राथमिकता पायाे, तर सभापति शेरबहादुर देउवा भने यसबारेमा माैन बसे ।

बिहीबार सांसद चौधरीका कान्छा भाइ अरुण चौधरी बाँसबारी जग्गा प्रकरणमा पक्राउ परेका थिए । बैठकमा सांसद चौधरीले राज्यले आतंक मच्चाएको बताए । ‘हामीले राज्यसँग नियमसंगत रूपमा जग्गा लिएका हौँ । केही थियो भने पूर्वजानकारी दिएर गर्नुपर्थ्यो । सोधपुछको मौका दिइनुपर्थ्यो केही नदिएर एक्कासि पक्राउ गरियो । गृह प्रशासन र सीआईबीले यस्तो गर्नु घोर आपत्तिको विषय हो,’ चौधरीले बैठकमा भनेकाे एक नेताले शिलापत्रलाई जानकारी दिए ।

संसदकाे हिउँदे अधिवेशन चल्दासम्म राजधानी नछाेड्न सांसदहरूलाई कांग्रेसकाे निर्देशन

उनले लगानी सम्मेलन भनेर विदेशी लगानी आकर्षित गर्ने भन्ने तर नेपालका उद्यमीहरूलाई हतोत्साहित बनाउन खोजिएको बताए । ‘एकातिर लगानी सम्मेलन गर्ने भन्छौँ, अर्कोतिर भित्र रहेका उद्योगीहरूलाई ह्यारेसमेन्ट गर्दैछौँ । मेरा साथीहरूले असुरक्षित व्यवसाय किन गर्ने सुरक्षित मुलुक रोजौँ भन्दा पनि म देश भनेर बसेँ । यो किन र कसरी भयो म पनि चकित छु,’ बैठकमा चौधरीले भनेका थिए ।

कहिले मीनबहादुर गुरुङलाई समात्ने त कहिले अरुण चौधरीलाई समात्ने गरेको भन्दै सीआईबीप्रति गरम देखिएका थिए चौधरी । बैठकको विषय प्रवेश प्रमुख सचेतक रमेश लेखकले गरेका थिए । त्यसपछि सांसद चन्द्र भण्डारीले धारणा राखे । उनले विकास आयोजनामा बजेट नपुगेको बताए । त्यस्तै रामहरि खतिवडाले सरकारले प्रभावकारी काम गरेर देखाउनुपर्ने बताए ।

बैठकमा अन्य सदस्यहरूले बोलेनन् । सभापति शेरबहादुर देउवा सांसद चौधरीको विषयमा प्रवेश नै गरेनन् । बरु उनले सांसदहरूले संसद बैठकमा नियमित उपस्थित हुनुपर्ने बताए । 'संसदमा उपस्थित नहुने सांसदहरू भएपछि कसरी टिकट दिने ? यस्ता मान्छेलाई दिएर के अर्थ हुन्छ ? संसदमा आफ्नो गाउँठाउँका कुरा प्रभावकारी रूपमा उठाउनुस् जुन राष्ट्रिय अन्तर्राष्ट्रिय इस्यु बन्छ,’ बैठकमा सभापति देउवाले भने ।

बैठकले संसदीय समिति र संसदमा उपस्थिति कम हुन नदिन प्रमुख सचेतकको लिखित सहमतिमामात्र काठमाडौं उपत्यका छाड्न निर्देशन दिएको छ । ‘सरकारकाे स्रोत, आगमन र मुहान भनेको संसद हो । संसदलाइ बाइपास गरेर सरकारले केही गर्न हुँदैन । समितिको निर्देशनलाई पालना गरेर सरकार अघि बढ्छ भन्ने धारणाको विश्वास विकास भएको छ,’ पार्टीको निर्णयबारे सांसद तथा राज्य व्यवस्था समिति सभापति खतिवडाले भने ।

बैठकपछि निर्णय सुनाउने क्रममा प्रमुख सचेतक लेखकले सांसद चौधरीले केही विषयमा धारणा राखेको बताए । उनले यसबारे पार्टीले आधिकारिक धारणा नबनाएको बताए । 'उहाँ (विनाेद चाैधरी)ले संसदीय दलको ध्यानाकर्षण गराउनुभएको हो’, लेखकले भने ।