नेसनल लाइफको लुम्बिनी लक्जरी टुर र रानीमहल भ्रमण : ४ सयभन्दा बढीको सहभागिता

A+ A A-

नेसनल लाइफ इन्स्योरेन्स कम्पनीको लुम्बिनी लक्जरी टुर र रानीमहल भ्रमण सम्पन्न भएको छ । उक्त कार्यक्रममा कम्पनीका विभागीय प्रमुख, प्रदेश प्रमुख, शाखा प्रमुखहरू र देशैभरिबाट उत्कृष्ट व्यवसाय गरी योजनामा छनोट हुन सफल करिब ४ सयभन्दा बढी वरिष्ठ अभिकर्ताहरूले सहभागिता जनाएका थिए ।

कम्पनीको मासिक योजनाअन्तर्गत तोकिएको लक्ष्य पूरा गर्ने अभिकर्ताहरूको उत्साहजनक उपस्थितिमा कम्पनीले लुम्बिनी लक्जरी टुरअन्तर्गत नेपालको प्रसिद्ध स्थल लुम्बिनी र पाल्पाको रानीमहल भ्रमण गराएको हो ।

सो अवसरमा कम्पनीका उप प्रमुख कार्यकारी अधिकृत स्मृतिराज कँडेलको सभापतित्वमा सम्मान कार्यक्रमको आयोजना गरी उत्कृष्ट व्यवसाय गर्ने अभिकर्ताहरूलाई सम्मान तथा प्रमाणपत्र प्रदान गरिएको थियोे ।

समापन कार्यक्रममा उपप्रमुख कार्यकारी अधिकृत कँडेलले यस्ता भ्रमण कार्यक्रमबाट देशका विभिन्न क्षेत्रका अभिकर्ताहरूबीच एकआपसमा अन्तर्क्रिया पनि हुने र मनोरञ्जन पनि प्राप्त हुनुका साथै अभिकर्ता समूहको दक्षता अभिवृद्धिमा समेत प्रत्यक्ष लाभ पुग्ने बताए ।

National Life (1)1706861487.jpg

कार्यक्रमका सहभागीहरूलाई धन्यवाद ज्ञापन गर्दै बजार विभाग प्रमुख विवेक शर्माले तोकिएको व्यावसायिक लक्ष्य पूरा गर्दै कम्पनीलाई बीमा बजारमा अग्र स्थानमा पुर्‍याउन अभिकर्ताहरूको अत्यन्तै महत्त्वपूर्ण भूमिका हुने हुँदा अभिकर्ता समूहको सल्लाह सुझावमा नै कम्पनीले योजना जारी गर्ने बताए ।

एजेन्सी विभाग प्रमुख सुशीलप्रताप राणाले सञ्चालन गरेको सो कार्यक्रमका सहभागी अभिकर्ताहरूले नेपालको प्रसिद्ध स्थल लुम्बिनी र पाल्पाको ऐतिहासिक रानीमहल भ्रमण गर्ने अवसर प्रदान गरेकोमा कम्पनीप्रति आभार व्यक्त गरे ।

प्रकाशित मिति: शुक्रबार, माघ १९, २०८० १४:३३