कीर्तिमानी साम्बाको फ्रेन्च क्लबको यात्रा

शिलापत्र संवाददाता शुक्रबार, माघ १९, २०८०

A+ A A-

नेपाली राष्ट्रिय महिला फुटबल टिमकी कीर्तिमानी खेलाडी हुन् सावित्रा भण्डारी 'साम्बा' । राष्ट्रिय टिमबाट होस् वा क्लबबाट खेल्दा, थुप्रै कीर्तिमानी बनाएकी छिन् साम्बाले । त्यसैले पनि साम्बा सबैकी रोजाइ हुन् ।

सन् २०१४ मा पाकिस्तानमा भएको साफ च्याम्पियनसिपमा भुटानविरुद्धको खेलमा साम्बाले राष्ट्रिय टिममा डेब्यु गरेकी थिइन् । डेब्यु खेलमै गोल गरेकी साम्बा त्यसयता निरन्तर राष्ट्रिय टिममा छिन् । राष्ट्रिय टिमबाट साम्बाले कीर्तिमानी ४३ गोल गरिसकेकी छिन् । उनले २०७६ सालमा दक्षिण एसियाली खेलकुदअन्तर्गत पोखरामा भएको खेलमा माल्दिभ्सविरुद्ध गोल गर्दै कीर्तिमानी बनाएकी हुन् ।

कीर्तिमान बनाएकै अर्को वर्ष २०७७ मा घुँडामा चोट बोकेपछि भने साम्बा १३ महिना मैदानबाहिरै रहनुपर्‍यो । लामो समय मैदानबाहिर हुँदा पनि उनले आत्मविश्वास भने गुमाइनन् । एक्लै अभ्यास गरिरहिन् । चोटमुक्त भएपछि साम्बा खेलमा फर्किइन् । र, पुरानै लयमा फर्किन कडा मिहिनेत गरिन् । भारतीय महिला लिगमा समेत तहल्का मच्चाएकी २६ वर्षीया साम्बा अन्तत: युरोपियन क्लबको नजरमा परिन् ।

र, फ्रान्सको शीर्ष डिभिजनको क्लब एना भान गुइनगाम्पले साम्बालाई भित्र्याएको छ । एना भान गुइनगाम्पबाट साम्बाले सिजनका बाँकी खेल खेल्नेछिन् । सोमबार फ्रान्स पुगेकी साम्बाले मेडिकल परीक्षण पास गरेपछि क्लबले उनलाई सार्वजनिक गरेको छ । साम्बा अनुबन्ध भएको गुइनगाम्प फ्रान्सको शीर्ष श्रेणीको महिला लिग डिभिजन वान फेमिनाइनको दशौँ स्थानमा छ । १२ टोली सम्मिलित लिगमा गुइनगाम्पले १२ खेलबाट ८ अंक जोडेको छ । साम्बाले क्लबबाट यो सिजन १० खेल खेल्नेछिन् ।

साम्बालाई दक्षिण एसियाकै उत्कृष्ट फरवार्ड मानिन्छ । कीर्तिमानी साम्बाले फ्रेन्च क्लबमा अनुबन्ध भएपछि आफूले सधैँ खेल्ने सपना देखेको मञ्चमा राष्ट्रको प्रतिनिधित्व गर्न पाउँदा गर्वको महसुस गरेको बताएकी छिन् । उनले आफूलाई यो यत्रामा सहयोग गर्ने एपीएफ क्लब र राष्ट्रिय टिमका प्रशिक्षक, सबै सहकर्मी र कर्मचारीप्रति आभार पनि व्यक्त गरेकी छिन् । उनले आफ्नो कठिन समयमा मद्दत गर्ने फिजियो र चिकित्सकलाई पनि सम्झिएकी छिन् ।

साम्बाले नयाँ यात्रा रोमाञ्चकसँगै चुनौतीपूर्ण पनि रहेको बताएकी छिन् । उनले भनेकी छिन्, 'यो नयाँ यात्रा रोमाञ्चकसँगै चुनौतीपूर्ण पनि छ । र, चुनौतीलाई यसपटक पनि सहजै पन्छाउनेछु ।' साम्बाले आफ्नो क्षमतामा विश्वास गरेकोमा इजरायलली क्लब हापोएल रानानाका प्रशिक्षक बर्को र व्यवस्थापनलाई पनि धन्यवाद भनेकी छिन् । उनले भनेकी छिन्, 'मलाई विश्वास गरेकोमा इजराय हापोएल रानाना, डोरोथी र प्रशिक्षक बर्कोलाई धन्यवाद दिन चाहन्छु । आशा छ कि तपाईंहरूले ममाथि गरेको विश्वासलाई टिकाइराख्नेछु ।'

नेपाली राष्ट्रिय टिम र क्लबबाट ९ नम्बर जर्सी लगाउने साम्बा अब फ्रेन्च क्लब गुइनगाम्पबाट २८ नम्बरको जर्सीमा मैदान उत्रिनेछिन् । फ्रेन्च क्लब गुइनगाम्पले शनिबार लिगको १३औँ खेल खेल्दै छ । उक्त खेलमा गुइनगाम्पले लिगको पुछारमा रहेको बोर्डेक्ससँग प्रतिस्पर्धा गर्दै छ । उक्त खेलमा साम्बाले डेब्यु गर्न सक्ने सम्भावना छ ।

फ्रेन्च क्लबको यात्रा गर्नुअघि साम्बाले इजरायलको हापोएल रानानाबाट युरोपियन लिग खेलेकी थिइन् । गत जेठमा इजरायली क्लब रानानामा आबद्ध भएकी साम्बाले आफ्नो प्रभावशाली क्षमता देखाउन थालेकी थिइन् । तर, हमासले इजरायलमाथि आक्रमण गरेपछि भने साम्बा लिग छोडेर बीचमै नेपाल फर्किएकी हुन् ।

भारतीय लिगकी पनि कीर्तिमानी साम्बा

इजरायली क्लब रानानामा आबद्ध हुनुअघि नै साम्बाले भारतीय महिला लिगमै तहल्का मच्चाएकी थिइन् । साम्बाले लगातार तीनपटक भारतीय महिला लिग पनि जितेकी छिन् ।

सेथु एफसीबाट सन् २०१८-१९ को सिजन भारतीय महिला लिगमा खेलेकी साम्बाले डेब्यु सिजनमै उपाधि उचालेकी थिइन् । सेथुलाई उपाधि जिताउने क्रममा लिगमा साम्बाले १४ गोल गरेकी थिइन् । त्यसछि भने साम्बा गोकुलम केरलामा आबद्ध भइन् । सन् २०१९-२० को सिजनमा गोकुलमबाट खेलेकी साम्बाले लिगको उपाधि जिताइन् । साम्बाले गोकुलमलाई च्याम्पियन बनाउने क्रममा १६ गोल गरेकी थिइन् ।

सन् २०२२-२३ मा पनि साम्बाकै उत्कृष्ट प्रदर्शनमा गोकुलम केरलाले लगातार तेस्रो सिजन लिगको उपाधि जित्यो । उक्त सिजनमा साम्बाले १० खेलमा २९ गोल गर्दै लिगमा कीर्तिमानी कायम गरिन् । साम्बाले भारतीय महिला लिगमा एकै सिजन सर्वाधिक गोल गर्ने मणिपुर पुलिसकी बालादेवीको कीर्तिमानी तोडेकी थिइन् । यसअघि बालादेवीले सिजन २०१९-२० मा २६ गोल गोल गर्दै कीर्तिमान बनाएकी थिइन् ।

तीन सिजन भारतीय लिग खेलेकी साम्बा लिगकी सर्वाधिक गोलकर्ता हुन् । साम्बाले तीन सिजनमा ५९ गोल गरेकी छिन् । उनीपछि सर्वाधिक गोलकर्ताको सूचीमा भारतकी बालादेवी छिन् । बालादेवीले चार सिजनमा ४८ गोल गरेकी छिन् ।

घलेगाउँको त्यो खेल...

सावित्रालाई 'साम्बा' बनाउने टर्निङ प्वाइन्ट भने लमजुङको घले गाउँमा भएको फुटबल प्रतियोगिताको हो । २०७० मा भएको प्रतियोगितामा सावित्राले राम्रो प्रदर्शन गरेपछि प्रतियोगिता खेलाउन गएका रेफ्री शुक्र तामाङको नजरमा परिन् । उक्त प्रतियोगितामा ९ गोल गर्दै सावित्रा सर्वाधिक गोलकर्ता बनिन् । त्यसपछि शुक्रले नै सावित्रालाई विभागीय टिम सशस्त्र प्रहरी बलको एपीएफ क्लबमा जोडिने अवसर मिलाएदिए ।

सावित्रालाई शुक्रले एपीएफ क्लबमा आउन सुझाएपछि काठमाडौं आएकी थिइन् । घलेगाउँमा भएको प्रतियोगिताको तीन महिनापछि नै सावित्रा एपीएफ क्लबमा आबद्ध भएकी थिइन् । एपीएफमा आबद्ध भएकी सावित्राले कडा मिहिनेत गर्दै आफूलाई क्बलमा अब्बल सावित गरिछाडिन् ।

एपीएफबाट राम्रो प्रदर्शन गरेपछि सावित्राले राष्ट्रिय टिमको ढोका खोलेकी हुन् । राष्ट्रिय टिममा परेपछि सावित्राले पछाडि फर्किएर हेर्नुपरेको छैन ।

प्रकाशित मिति: शुक्रबार, माघ १९, २०८० १४:१६

शिलापत्र संवाददाता

प्रतिक्रिया दिनुहोस्