पोर्चुगल पठाइदिने भनी बी.एक्वायर कन्सल्टेन्सीले रूसी सेनामा पठाउन खोजेको पीडितहरूको आरोप

पोर्चुगल पठाइदिने भनी बी.एक्वायर कन्सल्टेन्सीले रूसी सेनामा पठाउन खोजेको पीडितहरूको आरोप

A+ A A-

मोहन वैद्य नेतृत्वको क्रान्तिकारी कम्युनिस्ट पार्टी नेपालका पोलिटब्युरो सदस्य एवं सचिवालय सदस्य भूपेन्द्र न्यौपानेआबद्ध बी.एक्वायर एजुकेसन कन्सल्टेन्सीले पोर्चुगल पठाइदिने भन्दै युवाहरूबाट पैसा लिएर रूसी सेनामा पठाउन खोजेको पीडितहरूले आरोप लगाएका छन् ।

बिहीबार रिपोर्टर्स क्लबमा पत्रकार सम्मेलन गर्दै पीडितहरूले आफूहरूले पोर्चुगल जानका लागि जनही १२ लाख तिरेको भए पनि भिजिट भिसामा अजरबैजान पुर्‍याएर त्यहाँबाट रूसी सेनामा पठाउने योजना बनाएको थाहा पाएपछि आफूहरूले प्रतिवाद गरेको उनीहरूले बताएका छन् ।

काठमाडौंको सामाखुसीमा रहेको बी.एक्वायर एजुकेसन कन्सल्टेन्सी र उक्त कन्सल्टेन्सीका प्रबन्धक रोजिन न्यौपाने, अन्य आबद्ध व्यक्तिहरू बुद्ध पाँचकोटी, वसन्त पुडासैनी, क्रान्तिकारी कम्युनिस्ट पार्टी नेपालका पोलिटब्युरो सदस्य र सचिवालय सदस्य न्यौपानेलगायतले पोर्चुगल पठाइदिने भनेर पैसा लिएको र भिजिट भिसामा अजरबैजान पुर्‍याएर रूसी सेनामा पठाउने योजना बनाएको पीडितहरूको आरोप छ ।

पीडितहरू कृष्णप्रसाद धमला, नवीनकुमार न्यौपाने, गोपीराम धमला, ध्रुवराज न्यौपाने, नेत्रप्रसाद न्यौपाने, टंक जैशी र निरज धमला रहेका छन् । उनीहरूले आफूहरूलाई गत जेठ ३१ गते पोर्चुगलका लागि भन्दै त्रिभुवन अन्तर्राष्ट्रिय विमानस्थल हुँदै अजरबैजान पुर्‍याएको बताए । अजरबैजानमा डेढ महिना राखेपछि त्यहाँको एजेन्ट फरार भएको र प्रहरीले पक्राउ गरी ६४ घण्टा हिरासतमा लिएको उनीहरूले बताए । त्यसपछि एजेन्टले आफूहरूलाई हिरासतबाट छुटाएर दुबई पठाइएको उनीहरूको भनाइ छ । दुबईमा आफूहरूलाई पोर्चुगल पठाइदिने भन्दै पाँच महिनासम्म राखिएको उनीहरूको भनाइ छ ।

एजेन्टले पोर्चुगल नपठाएपछि आफूहरू आफैँले पैसाको जोहो गरेर दुबईहुँदै गत मंसिर २६ गते नेपाल फर्किएको बताए । नेपाल आएपछि पनि नेता न्यौपानेले उल्टै धम्की दिएको र कन्सल्टेन्सीमा जाँदा गुन्डा परिचालन गरेर आफूहरूमाथि आक्रमणको प्रयास भएको उनीहरूको भनाइ छ । हाल उक्त कन्सल्टेन्सी बन्द अवस्थामा रहेको र सञ्चालकहरू फरार भएको बताइएको छ ।