मापसे र लापसे नियन्त्रणमा सक्रिय हुँदै नेपाल प्रहरी

A+ A A-

नेपाल प्रहरीले आर्थिक वर्ष २०८०–०८१ को गत साउनदेखि पुस महिनासम्म मादक पदार्थ सेवन (मापसे) गरी सवारी चलाउने ३९ हजार २७२ जना र लागुपदार्थ सेवन (लापसे) गरी सवारी चलाउने २ सय ४२ जनालाई कारबाही गरेको छ । मापसेबाट गरिएको कारबाहीबाट कुल ३ करोड ९९ लाख ६९ हजार रूपैयाँ राजस्व संकलन भएको छ ।

यात्रु, सवारी र सडकलाई सुरक्षित बनाउँदै गन्तव्यमा पुर्‍याउन तथा दुर्घटना न्यूनीकरण गर्न मापसे तथा लापसे चेकिङ प्राथमिकतामा राखिएको प्रहरीले जनाएको छ । चालकले मापसे गरी सवारीसाधन चलाएको पत्ता लगाउन मापसे चेकिङ हुँदै आएको छ । लहैलहैमा लागेर घरभन्दा टाढाको दूरीमा गई मापसे गर्ने र सवारीसाधन चलाएर हिँड्ने प्रवृत्तिले आकस्मिक र गम्भीर दुर्घटना निम्त्याउने गरेको प्रहरीको तथ्यांकले देखाउँछ ।

सीसीटीभीको पहुँच न्यून र सीमित ठाउँमा मात्र ट्राफिक प्रहरीको उपस्थितिका कारण मापसे गरी सवारी चलाउने प्रवृत्ति बढ्दो देखिन्छ । यस्तो प्रवृत्तिलाई निरूत्साहित र मापसे तथा लापसे नियन्त्रणलाई प्रभावकारी बनाउन नेपाल प्रहरीले विभिन्न समयमा विविध नीति लागू गरी सफल कार्यान्वयन गर्दै प्रभावकारी रूपमा काम गर्दै आएको प्रहरीले जनाएको छ ।

नेपाल प्रहरीले अवलम्बन गरेका नीतिबारे प्रस्ट पार्दै नेपाल प्रहरीका केन्द्रीय प्रहरी प्रवक्ता प्रहरी नायब महानिरीक्षक भीमप्रसाद ढकाल भन्छन्, ‘दुर्घटनाबाट आफ्नो र यात्रुको ज्यान बचाउनका लागि प्रत्येक चालकले सही हालतमा सवारीसाधन चलाउनुपर्छ । यो कुरालाई स्थानीयस्तरमा सबै नागरिकले बुझ्न र पालना गर्न आवश्यक हुन्छ ।’

यस आर्थिक वर्षको ६ महिनामा मापसे गरी सवारी चलाउने काठमाडौं उपत्यकामा १८ हजार ६२७ जना, कोशी प्रदेशमा २ हजार ५२४ जना, मधेश प्रदेशमा २ हजार २१ जना, बागमती प्रदेशमा १ हजार ९८ जना, गण्डकी प्रदेशमा ८ हजार ९२३ जना, लुम्बिनी प्रदेशमा २ हजार ७७३ जना, कर्णाली प्रदेशमा १ हजार २६४ जना र सुदूरपश्चिम प्रदेशमा २ हजार ४२ जना कारबाहीमा परेको उनले जानकारी दिए ।

मापसे गरी सवारी चलाउने मात्र होइन, मापसे गरी बाटोमा जथाभावी हिँड्नेहरूको कारण पनि सवारीसाधनले ठक्कर दिँदा दुर्घटना हुने गरेको छ । मापसे र लापसे नियन्त्रणमा ट्राफिक प्रहरीको सक्रियता सम्बन्धमा काठमाडौं उपत्यका ट्राफिक प्रहरी कार्यालय रामशाहपथका प्रवक्ता प्रहरी वरिष्ठ उपरीक्षक राजेन्द्र प्रसाद भट्ट भन्छन्, ‘उपत्यकाका धैरै ठाउँमा सवारीसाधन चेकिङ गर्ने, लापसे सेवनमा मुद्दा चलाउने गरेका कारण चालकहरू सजग र सचेत भई जनधनको क्षतिमा कमी आएको छ । यसलाई निरन्तरता दिँदै सडक सुरक्षा र दुर्घटना न्यूनीकरणका लागि विशेष जोड दिँदै आएका छौँ ।’

सो अवधिमा कारबाहीमा पर्नेहरूबाट काठमाडौं उपत्यकामा १ करोड ८६ लाख २७ हजार रुपैयाँ, कोशी प्रदेशमा २५ लाख ३९ हजार ५ सय रुपैयाँ, मधेश प्रदेशमा २० लाख ४२ हजार ५ सय रूपैयाँ, बागमती प्रदेशमा ११ लाख १७ हजार रूपैयाँ, गण्डकी प्रदेशमा ९५ लाख ६८ हजार रूपैयाँ, लुम्बिनी प्रदेशमा २७ लाख ७३ हजार रुपैयाँ, कर्णाली प्रदेशमा १२ लाख ६० हजार रूपैयाँ र सुदूरपश्चिम प्रदेशमा २० लाख ४२ हजार रूपैयाँ राजस्व संकलन भएको छ । यसैगरी, सो अवधिमा लापसे गरी सवारी चलाउने काठमाडौं उपत्यकामा ८१ जना, कोशी प्रदेशमा २८ जना, गण्डकी प्रदेशमा ८८ जना, लुम्बिनी प्रदेशमा २० जना र सुदूरपश्चिम प्रदेशमा २५ जना कारबाहीमा परेका छन् । मधेश, बागमती र कर्णाली प्रदेशमा कारबाही संख्या शून्य छ ।

मापसे चेकिङका लागि सीमित जनशक्ति र सीसीटीभीको क्यामराको न्यून पहुँच छ भने ब्रेथलाइजरलगायतका साधनस्रोत पर्याप्त नभएको प्रहरी प्रवक्ता ढकालले बताए । यसका बावजुद चेकजाँचमा नेपाल प्रहरीको सक्रियता कायम रहेको उनको भनाइ छ । नियमित चेकिङका साथै चाडपर्वको बेला जुनसुकै समयमा चेकजाँच हुने गरेको छ ।

मापसे चेकिङलाई थप प्रभावकारी बनाउने सम्बन्धमा प्रहरी नायब महानिरीक्षक ढकाल भन्छन्, ‘मापसे लापसे नगरेर सवारीसाधन चलाउने कार्यका लागि प्रहरी र नागरिक एकआपसमा सहकार्य र समन्वय गरी आगाडि बढ्नु आवश्यक छ । यही कुरालाई मनन गरेर सरोकारवाला सबैसँग समन्वय र सहकार्य गरेर हामी अगाडि बढेका छौँ । हाम्रो मुख्य ध्यान भनेको दुर्घटनाबाट धनजनको क्षति नहोस् भन्ने नै हो ।’

प्रकाशित मिति: बुधबार, माघ १७, २०८० १७:२९