अमेरिकामा राष्ट्रपतिको चुनावी अभियान व्यापक बन्दै, चीनको नजरमा बाइडेन या ट्रम्प ठीक ?

अमेरिकामा राष्ट्रपतिको चुनावी अभियान व्यापक बन्दै, चीनको नजरमा बाइडेन या ट्रम्प ठीक ?

A+ A A-

अमेरिकामा राष्ट्रपतिको चुनावी अभियान व्यापक रूपमा अगाडि बढिरहँदा चीनले यो विषयलाई नजिकैबाट नियालिरहेको छ । आगामी नोभेम्बर ५ मा अमेरिकामा राष्ट्रपतिको निर्वाचन हुँदै छ ।

हालैका प्राथमिक निर्वाचनले डेमोक्रेटिकका तर्फबाट वर्तमान अमेरिकी राष्ट्रपति जो बाइडेन र रिपब्लिकनको तर्फबाट पूर्वअमेरिकी राष्ट्रपति डोनाल्ड ट्रम्प उम्मेदवार बन्ने देखाउँछ ।

चीनले बाइडेन र ट्रम्पबीचको सम्भावित आगमनलाई नजिकबाट निगरानी गरिरहेको जानकार बताउँछन् । चिनियाँ विज्ञहरूका अनुसार चीनले ट्रम्प र बाइडेन दुवैलाई चीनका लागि उपयुक्त पात्र ठान्दैन । यद्यपि, चीनले दुईमध्ये चीनप्रति केही नरम व्यक्ति अमेरिकाको नयाँ राष्ट्रपति बनोस् भनेर चाहेको छ ।

अबको केही समयमै चुनावी अभियान चर्किँदै जाँदा बाइडेन र ट्रम्प दुवैले चीनको कडा आलोचना गर्नेछन् भन्नेमा पनि चीन सजग छ । बाइडेनले चीनसँग सहकार्य गर्न त खोजेका छन् तर इन्डो-प्यासिफिक क्षेत्रमा बाइडेनले चीनविरुद्ध आफ्ना सहयोगीहरूलाई एकजुट गर्ने प्रयास गरेका छन् । यसमा बेइजिङले चिन्ता व्यक्त गरेको छ । यतिमात्र होइन चीनसँगको द्वन्द्वमा ताइवानको रक्षा गर्ने बाइडेनको अडान चीनको अर्को चिन्ताको स्रोत हो ।

अर्कोतर्फ, अप्रत्याशित दृष्टिकोण भएका ट्रम्पले राष्ट्रपति बने चलिरहेको व्यापार युद्धलाई गहिरो बनाउने सम्भावना छ । ट्रम्प ताइवानको रक्षाको विषयमा केही नरम हुन सक्छन् तर उनले कोरोनाकालमा चीनकै कारण विश्वभर कोरोना भाइरस फैलिएको बताएका थिए । ट्रम्पको अप्रत्याशित दृष्टिकोणले अमेरिका-चीन सम्बन्धमा थप अनिश्चितता ल्याउन सक्छ ।

चीनका लागि सांघाईको फुदान विश्वविद्यालयका प्राध्यापक चाओ मिङ्घाओका अनुसार बाइडेन र ट्रम्प नै चीनका लागि ‘विषका कचौरा’ जस्तै छन् । यद्यपि, उनका अनुसार ट्रम्पको अप्रत्याशितताको तुलनामा बाइडेन अधिक स्थिर देख्न सकिन्छ, जसबाट चीनले थोरै भए पनि फाइदा लिन सक्छ ।

प्रकाशित मिति: बुधबार, माघ १७, २०८० १६:५३