पशुपन्छी क्षेत्रको विकासका लागि कृषि मन्त्रालय र अन्तर्राष्ट्रिय पशु अनुसन्धान संस्थानबीच सम्झौता

पशुपन्छी क्षेत्रको विकासका लागि कृषि मन्त्रालय र अन्तर्राष्ट्रिय पशु अनुसन्धान संस्थानबीच सम्झौता

A+ A A-

कृषि तथा पशुपन्छी क्षेत्रको विकासमा सहकार्य गर्ने गरी नेपाल सरकार र अन्तर्राष्ट्रिय पशु अनुसन्धान संस्थानबीच सम्झौतापत्रमा हस्ताक्षर भएको छ ।

बुधबार सिंहदरबारस्थित कृषि तथा पशुपन्छी विकास मन्त्रालयमा एक कार्यक्रमकाबीच सम्झौतापत्रमा हस्ताक्षर भएको हो । सम्झौतापत्रमा नेपाल सरकारका तर्फबाट कृषि तथा पशुपन्छी विकास मन्त्रालयका सचिव रेवतीरमण पौडेल र अन्तर्राष्ट्रिय पशु अनुसन्धान संस्थानका तर्फबाट सहायक महानिर्देशक डा. शर्ली तरावलीले सम्झौतापत्रका हस्ताक्षर गरेका हुन् ।

अन्तर्राष्ट्रिय पशु अनुसन्धान संस्थानबीच भएको सम्झौताले पशुपन्छी अनुसन्धान, विकास, नविन प्रविधि प्रवर्द्धन र कषि क्षेत्रको दिगो विकासमा योगदान पुग्ने सरकारले विश्वास लिएको बताएको छ । सम्झौतापत्रका हस्ताक्षर कार्यक्रममा कृषिमन्त्री डा. वेदुराम भुसालले विकासशील देशमा पशुपालनको क्षेत्रमा काम गरी किसानको जनजीवनमा सुधार ल्याउने उद्देश्यले अन्तर्राष्ट्रिय पशु अनुसन्धान संस्थानसँग भएको सम्झौता नेपालका लागि महत्वपूर्ण कोशेढुङ्गा भएको बताए ।

उनले सरकारले विगत लामो समयदेखि अन्तर्राष्ट्रिय पशु अनुसन्धान संस्थानसँग सहकार्य गर्दै उल्लेख गर्दै जलवायु स्मार्ट पशुपालन, पशुपालनमा लगानी र लम्की स्किन रोकथाम कार्यशाला गर्दै आएको बताए । मन्त्री डा. भुसालले अन्तर्राष्ट्रिय पशु अनुसन्धान संस्थानसँगको सहकार्यमार्फत पशुपालन क्षेत्रमा देखिएका चुनौतीलाई सम्बोधन गर्ने र नेपाली पशुपालन किसानको समृद्धि प्रदान गर्न सफल हुने बताए ।

कार्यक्रमा मन्त्रालयका सचिव डा. रेवतीरमण पौडेलले अन्तर्राष्ट्रिय पशु अनुसन्धान संस्थानसँगको सहकार्यले नेपालको पशुपालन क्षेत्रमा स्थानीय समस्यालाई समाधान गर्न अनुसन्धानात्मक कार्यलाई स्तरीय र अन्तर्राष्ट्रिय परिवेश अनुकूल बनाउन फलदायी हुने विश्वास रहेको बताए । उनले अन्तर्राष्ट्रिय तथा क्षेत्रीय बजारमा नेपालका पशुजन्य उत्पादनलाई पहुँच वृद्धि गर्न सार्थक हुने बताए ।

अन्तर्राष्ट्रिय पशु अनुसन्धान संस्थानकी महानिर्देशक तरावलीले उचित पोषण, बाल कुपोषण न्यूनीकरण गर्न, संज्ञानात्मक विकासमा सुधार,खाद्य उत्पादन र स्वास्थ्यका लागि साना किसानको पशुपालन प्रणालीलाई रुपान्तरण गर्ने बताइन् । उनले नेपालको उच्च आर्थिक वृद्धिका लागि दिगो उत्पादनमार्फत खाद्य र पोषण सुरक्षाको लक्ष्य पूरा गरी पशुधन विकासमा नेपालको प्रतिबद्धतालाई स्वीकार गरिन् ।

अन्तर्राष्ट्रिय पशु अनुसन्धान संस्थानले नेपालमा पहिलादेखि भैँसीको दूध मूल्य शृंंखला, पशुधन लगानी योजना, क्षमता विकास र लम्की स्किन रोग नियन्त्रणसम्बन्धी कार्यशाला र पानीको सदुपयोग, मिथेन ग्यास उत्सर्जन, एकीकृत पोषण प्याकेज स्केलिङसम्बन्धी अन्य परियोजनामा काम गरिहेको छ ।

प्रकाशित मिति: बुधबार, माघ १७, २०८० १३:१५