मधेश कृषि विश्वविद्यालयको तालाबन्दी यथावत्, विद्यार्थी भन्छन्– हाम्रो भविष्यमाथि खेलबाड हुँदै छ

मधेश कृषि विश्वविद्यालयको तालाबन्दी यथावत्, विद्यार्थी भन्छन्– हाम्रो भविष्यमाथि खेलबाड हुँदै छ

A+ A A-

जनमत पार्टीले मधेश कृषि विश्वविद्यालयमा गरेको तालाबन्दी आज नवौँ दिन पनि यथावत् छ । विश्वविद्यालयको भवनको डीपीआरमा भष्टाचार, परीक्षा समिति गठन नै नगरी परीक्षा लिएको लगायत सातबुँदे माग राख्दै जनमत पार्टीले गत ७ माघमा तालाबन्दी गरेको थियो ।

एक साताभन्दा बढी भइसक्दा पनि तालाबन्दी कायम नै रहँदा विश्वविद्यालयको पठनपाठनका साथै प्रशासनिक कार्यहरूसमेत प्रभावित भएको छ ।

कृषि विश्वविद्यालयको भवन शिलान्यासको विषयमा जनता समाजवादी पार्टी र जसपाबीच भएको विवादका कारण तालाबन्दी गरिएको थियो । तालाबन्दी गरेको एक साताभन्दा बढी भइसक्दासमेत त्यसलाई खुलाउन न विश्वविश्वविद्यालय प्रशासन, न स्थानीय प्रशासन, न त ती पार्टीहरू, कसैले पनि चासो नदेखाएको त्यहाँ अध्ययनरत विद्यार्थीहरूको आरोप छ ।

एक विद्यार्थीले भने, ‘दुई पार्टीको विवादमा तालाबन्दी गरिएको छ । यसमा हामी विद्यार्थीको के दोष छ ? हाम्रो पढाइ प्रभावित भइरहेको छ । त्यस कारण हामी सरोकारवाला निकायलाई पठनपाठनको वतावरण बनाइदिन अनुरोध गर्छौं ।’

अर्का विद्यार्थीले भने, ‘दुई पार्टीका नेताहरू आ–आफ्नो राजनीतिक स्वार्थका कारण हाम्रो भविष्यसँग खेलबाड गरिरहेका छन् ।’

मधेश कृषि विश्वविद्यालयका राजिस्ट्रार भागवान ठाकुरले तालाबन्दीका कारण पठनपाठन प्रभावित भएको, साथै प्रशासनिक कार्यसमेत प्रभावित भएको बताए । नयाँ शैक्षिकसत्रका लागि पहिलो चरणमा १५ जना विद्यार्थीले नामकरण भइसके पनि दोस्रो चरणको विद्यार्थी भर्नाका लागि विश्वविद्यालय बन्दको कारण सूचनासमेत प्रकाशित गर्न नसकेको उनले बताए ।

दुई पार्टीको विवादका कारण विश्वविद्यालयमा तालाबन्दी गर्नु उचित नरहेको बताउँदै उनले भने, ‘हामीले कुनै पार्टीलाई काख र कुनैलाई पाखा गरेका छैनौँ । विश्वविद्यालयका कुलपति मुख्यमन्त्री हुनुहुन्छ । उहाँको आदेशअनुसार हामीले काम गरेका छौँ ।’ भवनको डीपीआरमा कुनै भ्रष्टाचार नरहेको तथा परीक्षा समिति गठन गरेरै परीक्षा लिएको दाबी गर्दै राजिस्ट्रार ठाकुरले भने, ‘हामीसँग सबैका प्रमाण छन् । सबै विश्वविद्यालयमै राखिएको छ । त्यसका लागि पनि पहिला तालाबन्दी खोल्नुपर्छ ।’

यता, जनमत पार्टीका प्रदेश सांसद तथा सप्तरी निवासी सतीश सिंहले पनि आफूहरूको मागका विषयमा विश्वविद्यालय प्रशासनले गम्भीरता नदेखाएको आरोप लगाए । दुई दिनभित्रै तालाबन्दीको विकल्पबारे पार्टीका जिल्ला नेताहरूसँग छलफल गर्ने उनले बताए ।

प्रमुख जिल्ला अधिकारी किरण थापाले ताला खुलाउन आफूले पहल गरिरहेको बताए । उनले भने, ‘तालाबन्दी खोलाउन दुवै पक्षसँग समन्वय गरिरहेका छौँ । उहाँहरूका माग आफ्नो ठाउँमा छन् । त्यो विषयमा छानबिन गर्न सकिन्छ । तर, विद्यार्थीहरूको पठनपाठन अवरुद्ध हुनु भएन । त्यस कारण दुवै पक्षबीच सहमति नभए कानुनअनुसार स्थानीय प्रशासन अगाडि बढ्नेछ ।’

प्रकाशित मिति: मंगलबार, माघ १६, २०८० १९:२९