सुदूरपश्चिममा माओवादी संसदीय दलको नेतामा धामी कायम, भएन केन्द्रको निर्देशन कार्यान्वयन

सुदूरपश्चिममा माओवादी संसदीय दलको नेतामा धामी कायम, भएन केन्द्रको निर्देशन कार्यान्वयन

A+ A A-

नेकपा माओवादी केन्द्रको सुदूरपश्चिम संसदीय दलको नेताका विषयमा केन्द्रले दिएको निर्देशन कार्यान्वयन नहुने भएको छ । खगराज भट्टलाई माओवादी प्रदेश संसदीय दलको नेताबाट हटाएर मानबहादुर धामी दलको नेता बनेका थिए । तर, केन्द्रले सो निर्णय कार्यान्वयन गर्न प्रदेशलाई निर्देशन दिएको थियो ।

सुदूरपश्चिम प्रदेशसभा सचिवालयले माओवादी संसदीय नेता हेरफेर भएको सोमबार सूचना जारी गरेपछि केन्द्रको निर्देशन कार्यान्वयन नहुने भएको हो । प्रदेशसभा सचिवालयका सचिव देवबहादुर बोगटीले मुख्यमन्त्री तथा मन्त्रिपरिषद्को कार्यालयलाई माओवादी केन्द्रको संसदीय दलको नेता हेरफेर भएको जानकारी पत्र पठाएका छन् ।

प्रदेशसभा सचिवालयले मुख्यमन्त्री तथा मन्त्रिपरिषद्को कार्यालयमा माओवादी संसदीय दलको नेता मानबहादुर धामी रहेको जानकारी गराएको छ ।

सचिवालयले माओवादी संसदीय दलका नेता खगराज भट्टलाई हटाइएर उक्त जिम्मेवारीमा धामीलाई चयन गरिएको मुख्यमन्त्री कार्यालयलाई जानकारी गराएको हो ।

शुक्रबार भट्टलाई हटाएर धामीलाई दलको नेता बनाइएको थियो । उनलाई नेता बनाउँदा ६ जना प्रदेशसभा सदस्यले निर्णयमा हस्ताक्षर गरेका थिए । ११ जना प्रदेशसभा सदस्य रहेको माओवादी केन्द्र सुदूरपश्चिममा एक जना सभामुख छन् ।

मानबहादुर धामी, अक्कल रावल, ओमविक्रम भाट सरल, गीतादेवी माल, लक्ष्मी विक र शिवसिंह ओलीले धामीलाई दलको नेता बनाउने निर्णय गरेको बैठकमा खगराज भट्ट, झपट साउद, रमेश धामी र जनकी देवी कुँवर उपस्थित थिएनन् । बहुमत प्रदेशसभा सदस्यहरूले गरेको निर्णयले अहिले पार्टीभित्र तरंग पैदा भएको छ । प्रदेश पार्टीले पनि उक्त निर्णय सच्चाउन निर्देशन दिएको थियो ।