जापानको अन्तरिक्ष यान चन्द्रमामा ब्युँझियो, सौर्य प्यानलले ९ दिनपछि पुनः काम गर्न थाल्यो

जापानको अन्तरिक्ष यान चन्द्रमामा ब्युँझियो, सौर्य प्यानलले ९ दिनपछि पुनः काम गर्न थाल्यो

A+ A A-

जापानको अन्तरिक्ष यान गत जनवरी २० मा चन्द्रमाको सतहमा अवतरण गर्न सफल भएको थियो । तर, उक्त यान पनि भारतको चन्द्रयान– ३ जस्तै स्लिपमोडमा गएपछि नब्युँझिने अनुमान थियो ।

यद्यपि चन्द्रमामा अवतरण गरेको स्लिम नामक अन्तरिक्ष यानको सौर्य प्यानलले काम गर्न सुरू गरेको जापानको अन्तरिक्ष निकाय जाक्साले सोमबार जनाएको छ ।

स्मार्ट ल्यान्डर फर इन्भेस्टिगेसन मुन स्लिमको सौर्य प्यानलले काम नगरेको घोषणा गरिएको ९ दिनपछि पुनः काम गर्न सुरू गरेको आश्चर्यजनक घोषणाले जापानको अन्तरिक्ष कार्यक्रममा थप प्रोत्साहन मिलेको छ ।

जाक्साले सामाजिक सञ्जाल एक्स ट्वीटरमा ‘टोय पुडल’ भनिने चन्द्रमाको चट्टानको दानेदार तस्वीरसहितको सन्देश पोस्ट गर्दै लेखेको छ, 'हिजो साँझ हामी स्लिमसँग सम्पर्क स्थापित गर्न सफल भयौँ, र अनुसन्धान कार्यहरूलाई फेरि सुरु गरेका छौँ ।'

स्लिमको जनवरी २० को चन्द्रमाको अवतरणले संयुक्त राज्य अमेरिका, सोभियत सङ्घ, चीन र भारतपछि जापान चन्द्रमामा ‘सफल अवतरण’ गर्ने पाँचौँ राष्ट्र बनेको छ । यस यानलाई डिसेम्बर २५ मा प्रक्षेपण गरिएको थियो ।

जाक्साले गतहप्ता स्लिमलाई १२ प्रतिशत इनर्जी बाँकी रहेको अवस्थामा स्वीच अफ गरेको बताएको थियो । यसअघि सौर्य प्यानलहरू सिधा माथि हुनुको सट्टा पश्चिमतर्फ ढल्केका कारण सौर्य प्यानलबाट हुने इन्धन आपूर्ति प्रणालीमा अवरोध आएको थियो ।

जाक्साले सोमबार एएफपीलाई बताएअनुसार ‘सम्भवतः स्लिमको सौर्य ब्याट्रीमा सूर्यको प्रकाश आपूर्ति भएसँगै यानलाई आवश्यक बिजुली उत्पादन सुरु भएको छ र स्लिमको अनुसन्धान अभियान पुनः सुरू भएको छ ।

जाक्साका अनुसार अब अन्तरिक्ष यानको मद्दतमा चन्द्रमाको अवलोकन गरिनेछ र चन्द्रमाबारे थप जानकारी सङ्कलन गरिनेछ । जापानी वैज्ञानिकका अनुसार स्लिम रहेको चन्द्रमाको स्थानमा जनवरीको अन्त्यसम्म दिनको समय रहनेछ र सौर्य प्रणालीलाई सहयोग पुग्नेछ तर १४ दिनपछि अर्थात् फेब्रुअरीको सुरुसँगै चन्द्रमामा रात हुनेछ ।

प्रकाशित मिति: सोमबार, माघ १५, २०८० १६:०७