स्वास्थ्यमन्त्रीले नै भने– अबको पाँच वर्षमा नेपालमा डाक्टर र नर्स पाउने अवस्था छैन

स्वास्थ्यमन्त्रीले नै भने– अबको पाँच वर्षमा नेपालमा डाक्टर र नर्स पाउने अवस्था छैन

फाइल तस्वीर

A+ A A-

स्वास्थ्य तथा जनसंख्यामन्त्री मोहनबहादुर बस्नेतले अबको पाँच वर्षमा नेपालमा चिकित्सक पाउन कठिन हुने बताएका छन् । आज शहीद गंगालाल राष्ट्रिय हृदय रोग केन्द्रको २८औँ वार्षिकोत्सव समारोहलाई सम्बोधन गर्दै उनले पाँच वर्षपछि नेपालमा डाक्टर र नर्स पाउने अवस्था नरहेको जिकिर गरे ।

उनले नेपालको शिक्षा नीतिमा केही कमी, कमजोरीहरू रहेको बताए । उनले कमजोरीहरूलाई हटाएर अघि बढ्न आवश्यक रहेको बताए ।

उनले जनसंख्या बढिरहेको सन्दर्भमा स्वास्थ्यकर्मीहरू पनि बढ्दै जान आवश्यक रहेको बताए । उनले देशमा कामै नपाउने अवस्था रहेको बताए । दक्ष जनशक्ति नहुने र आधारभूत स्वास्थ्य सेवा उपलब्ध गराउने कुरामा धेरै अप्ठ्यारो भइरहेको मन्त्री बस्नेतले बताए ।

'सरसर्ती हेर्दा अब पाँच वर्षपछि नेपालमा डाक्टर र नर्स पाउने अवस्था छैन । यसमा हाम्रो शिक्षा नीतिका केही कमीकमजोरीका कुरा पक्कै हुन्', मन्त्री बस्नेतले भने । उनले अगाडि भने, 'बिरामीको संख्या अब घट्ने होइन बढ्ने हो । जनसंख्या घट्ने होइन बढ्ने नै हो । त्यस कारण स्वास्थ्यकर्मीहरू बढ्न जरुरी छ ।'

'एकथरी सेवासुविधा कमजोर भएर पलायन हुने अवस्था छ । एकथरी काम गरेर बस्दा पनि आफ्ना बालबच्चाहरू राम्रा स्कुलमा पढ्न नसक्ने, राम्रो शिक्षा पाउन नसक्ने, घर व्यवहार चल्न नसक्ने अवस्था छ', मन्त्री बस्नेतले भने, 'अर्को कामै नपाउने अवस्था छ । दक्ष जनशक्ति नहुने अवस्था छ । यसले आधारभूत स्वास्थ्य सेवा उपलब्ध गराउने कुरामा धेरै अप्ठ्यारा आइलागेका छन् ।

पछिल्लाे समय बढिरहेकाे विदेश पलायनले नेपालमा दक्ष स्वास्थ्यकर्मीकाे अभाव हुने चिन्ता विज्ञहरूले लिइरहेका छन् । स्वास्थ्यकर्मीकाे पलायन राेक्न विशेष पहल नगरे नेपालकाे स्वास्थ्य क्षेत्रमा विकराल परिस्थिति सिर्जना हुने चेतावनी उनीहरूकाे छ ।

प्रकाशित मिति: सोमबार, माघ १५, २०८० १५:२४