गुटको प्रतिस्पर्धाले भाँडियो युवा संघको कास्की अधिवेशन, गमला र सिसा तोडफोड

गुटको प्रतिस्पर्धाले भाँडियो युवा संघको कास्की अधिवेशन, गमला र सिसा तोडफोड

A+ A A-

नेताहरुको गुट र शक्ति सिर्जनाको प्रतिस्पर्धाले नेकपा एमालेनिकट राष्ट्रिय युवा संघको कास्की अधिवेशन भाँडिएको छ ।

उद्घाटन सत्रमा कुनै विवाद नभए पनि बन्द सत्रको प्रक्रिया सुरु भएपछि लफडा भएको हो । अधिवेशन गत शुक्रबार पोखराको सिर्जनाचोकस्थित एउटा पार्टी प्यालेसमा बोलाइएको थियो । युवा संघका इन्चार्ज महेश बस्नेत, अध्यक्ष क्षितिज थेवे, पार्टी केन्द्रीय सदस्य, जिल्ला अध्यक्ष सहभागी उद्घाटन सत्रपछि बन्द सत्र हुनेबेला सुरु भएको विवाद तोडफोडको अवस्थासम्म पुगेको छ ।

युवा संघ स्रोतका अनुसार विवाद सिर्जना हुनुको मुख्य कारण अध्यक्ष मण्डलको चयन र प्रतिनिधि चयन हो । अध्यक्ष मण्डलको अध्यक्ष युवा संघका प्रदेश इन्चार्च अर्जुन पौडेललाई बनाइएको थियो । एमाले उपमहासचिव पृथ्वीसुब्बा गुरुङनिकट हालका युवा संघ जिल्ला अध्यक्ष पानबहादुर जिसी, पार्टी प्रदेश कमिटी सदस्यसमेत रहेका अध्यक्ष मण्डलका अध्यक्ष पौडेल, पार्टी जिल्ला उपाध्यक्ष तेजनारायण अधिकारी, कार्यालय सचिव हिरा गिरिलाई अध्यक्ष मण्डलमा राखिएको थियो । ८ सदस्यीय अध्यक्ष मण्डलमा दुई जनाबाहेक बाँकी पृथ्वीसुब्बा पक्षका थिए ।

जिल्लाभरबाट २ सय ७८ जना प्रतिनिधि छनोट गरिएकोमा अधिकांश आयोजक कमिटी संयोजक रहेका हालका जिल्ला अध्यक्ष जिसी पक्षका छन् । यसमा उनले १० प्रतिशत मनोनीत गर्दा आफू अनुकूल हुने गरेर ल्याएको आरोप छ ।

पृथ्वीसुब्बा पक्षको बहुमत रहेको र सर्वसम्मत वा निर्वाचन नै भए पनि पार्टी स्थायी कमिटी सदस्य खगराज अधिकारी पक्षले अध्यक्ष नपाउने अवस्था हुनु विवादको अर्को कारण हो । यो विषयले अधिवेशन भैरहेको ठाउँ शनिबार राति तनावग्रस्त रह्यो ।

युवाहरुको एउटा समूहले कुर्सी फाल्ने, गमला फुटाल्ने, सिसा फुटाल्ने गरेका छन् । यही गतिविधिले गर्दा अध्यक्ष मण्डलको शनिबार बसेको बैठकले अधिवेशन अनिश्चितकाललाई स्थगित गरेको छ । ‘त्यहाँ प्रतिनिधि को हो भन्ने प्रतिनिधि आफैंलाई थाहा छैन । हामीले ६ बजेसम्म नाम आउँछ भनेर भन्यौं । तर आयोजकले दिएन,’ अध्यक्ष मण्डलका एक सदस्यले भने, ‘त्यसपछि केही साथीहरु भित्र छिरेर हामीमाथि प्रश्न गर्नुभयो । निस्कनेबेला गमला यताउता भयो, ढोकाको सिसा फुट्यो । तर कसैलाई हातपात गर्ने गतिविधि भएको होइन ।’

युवा संघ स्रोतका अनुसार खगराज पक्षले हालका उपाध्यक्ष शंकर पौडेल र पृथ्वीसुब्बा समूहले पूर्व केन्द्रीय सदस्य सरस्वती पुरीलाई अध्यक्ष बनाउन चाहेको छ । पृथ्वीसुब्बानिकट हालका अध्यक्ष जिसीले व्यक्तिगत ढंगले नै ७८ जना प्रतिनिधि चयन गरेपछि विवाद पैदा भएको हो । संगठनको बैठकले चयन गर्नुपर्ने प्रतिनिधि जिसी आफैंले छानेको आरोप छ ।

यसो हुँदा पृथ्वीसुब्बा समूहले उठाउने उम्मेदवारले नै चुनाव जित्ने परिस्थिति बन्न सक्छ । यसले पार्टीको जिल्ला अधिवेशनमा आफूहरुलाई असर पर्ने भएकाले खगराज समूहले अधिवेशन अघि बढ्न नदिएको हो । ‘यो विषय पार्टीको चैतमा हुने जिल्ला अधिवेशनसँग पनि जोडिन्छ । त्यतिबेला संगठनबाट जाने प्रतिनिधि अहिले कमिटीमा आउनेहरु नै हुन् नि,’ एमाले स्रोतले शिलापत्रसँग भन्यो ।

पार्टी पदाधिकारीले गुहारे महेश बस्नेत

यो विवाद युवा संघको केन्द्रीय हेड्क्वार्टरसम्म पुगेको छ । पार्टीलाई जानकारी नै नदिई निर्वाचन कमिटी संयोजक पानबहादुर जिसीले एकलौटी गरेको र संगठन विभागसँग समन्वय नगरेको भन्दै एमाले कास्कीका ३ जना पदाधिकारीले युवा संघका इन्चार्ज महेश बस्नेतलाई गत शुक्रबार नै पत्र लेखेका छन् ।

सचिव बैनबहादुर अधिकारी क्षेत्री, उपसचिव दर्शन लामा र नवराज ओझाले लेखेको पत्रमा अध्यक्ष मण्डलबारे पुनर्विचार नगरेसम्म अधिवेशन अगाडि बढाउने कुरामा सहमति नरहेको उल्लेख छ । यी तीन जना नेता खगराजनिकट हुन् । त्यसैले उनीहरुले अध्यक्ष मण्डल नै फेर्नुपर्ने अडानसहितको पत्र लेखेका हुन् ।

प्रकाशित मिति: आइतबार, माघ १४, २०८० १६:३८