रूपनगर क्याम्पसमा छात्राहरूका लागि जीवन उपयोगी सिपमूलक तालिम

A+ A A-

सप्तरीको रूपनगर नन्दराज संग्रौला क्याम्पसमा किशोरीहरूका लागि जीवन उपयोगी सिपमूलक तालिम आरम्भ भएको छ ।

सिक्वेल फाउण्डेसनको आयोजना र रूपनगर क्याम्पसको संयोजनमा सो तालिम चार महिनासम्म सञ्चालन हुने क्याम्पस प्रमुख दीपक कुमार गजुरेलले जानकारी दिए ।

सरकारी विद्यालयमा कक्षा ११ र १२ मा पढ्ने गाउँका छात्राहरूलाई विभिन्न सिप सिकाएर गरी खान सक्ने बनाउने उद्देश्यले यस्तो तालिम सुरू गरिएको आयोजक संस्था सिक्वेल फाउण्डेसनले जनाएको छ ।

सप्तरी जिल्लाको कञ्चनरूप नगरपालिका १२ स्थित श्री शंकर माध्यमिक विद्यालयका २० जना किशोरीहरूलाई दिइने सिपमूलक तालिम अन्तर्गत् डिजिटल साक्षरता, वित्तीय साक्षरता, इन्ट।र प्रसनल सञ्चार सिप र यौन तथा प्रजनन् स्वास्थ्य विषयमा रहेको छ । प्रत्येक विषयमा एक एक महिना तालिम दिइनेछ ।

कञ्चनरूपका नगर प्रमुख ललन प्रसाद गुप्ताले कम्प्युटरको कि थिचेर तालिमको उद्घाटन गरे । उद्घाटनपछि नगर प्रमुख गुप्ताले तालिमबाट प्रविधि र जीवनका विभिन्न विषयमा छात्राहरूले सिक्ने छन् भन्ने विश्वास व्यक्त गरे ।

कञ्चनरूप १२ का वडाध्यक्ष देविबहादुर खत्रीले तालिममा सहभागी छात्राहरूलाई आशीर्वाद दिँदै कम्प्युटर र इन्टरनेट प्रविधिको सिप अनिवार्य भैसकेको अहिलेको युगमा प्रविधिको प्रयोग जानिएन भने पछि परिने हुँदा मन लगाएर पढ्न विद्यार्थीहरूलाई सुझाव दिए ।

यसअघि सो क्याम्पसले साइबर सुरक्षा, बैंकिङ, शेयर कारोबार लगायतका विषयमा अधिमुखीकरण कार्यक्रम गरिसकेको क्याम्पसले प्रविधि सम्बन्धी अन्य विषयमा पनि छिट्टै कार्यक्रम गर्ने भएको छ । यस बारेमा जानकारी दिँदैँ क्याम्पस प्रमुख गजुजरेलले भने, ‘कञ्चनरूप नगरपालिका र वरपरका सरकारी विद्यालयमा पढ्ने विद्यार्थीहरूका लागि विभिन्न विषयमा छोटो तालिम र अभिमुखीकरण कार्यक्रम डिजाइन गरेका छौँ । विद्यालयको सहयोग र समन्वयमा त्यस्तो तालिम आउँदो फागुनबाट सुरू गर्दैछौँ ।’

प्रकाशित मिति: शनिबार, माघ १३, २०८० १५:०३