कोशीमा बिग्रेको सम्बन्ध कोशीबाटै सुधार्दै शेखर

A+ A A-

२५ असोजमा कोशी प्रदेशसभा सदस्य केदार कार्कीले एमालेको सहयोगमा बहुमत पुर्‍याएर मुख्यमन्त्री दाबी गर्दा कांग्रेसको संस्थापनइतर समूहका नेता डा. शेखर कोइरालाले विद्रोह गरेका थिए । उनले प्रमुख प्रतिपक्षीको सहयोगमा पार्टीको सांसदलाई मुख्यमन्त्री बन्न सहयोग गर्दा पार्टीभित्र छलफल गरेका थिएनन् ।

केन्द्रमा सत्ता गठबन्धनले माओवादी केन्द्रलाई मुख्यमन्त्री दिने सहमति गर्दा शेखरले विद्रोह गरेका थिए । उनले सो निर्णय गर्दा आफ्नो समूहमा रहेका पदाधिकारीहरूसँग पनि सल्लाह गरेका थिएनन् । महामन्त्री गगन थापाले काम उचित भए पनि तरिका गलत भएको भने । कोशी विद्रोहबाट कोइरालाको पार्टीभित्र नेताहरूसँग सम्बन्ध चिसिएको थियो । एक्लै निर्णय गरेपछि उनलाई मत्थर पार्न पार्टी सभापति शेरबहादुर देउवा र प्रधानमन्त्री पुष्पकमल दाहाल प्रचण्डसमेतको सहमतिमा गठबन्धनलाई निरन्तरता दिने र अझै बलियो बनाउने सहमति शेखरसँग गरे ।

यसबीचमा पार्टी गुटमा आएको समस्या उनले सम्बोधन गरे । महामन्त्री थापासँग बोलचाल नभएकोमा एकै ठाउँमा रहेर अघि बढ्ने कुरामा सहमति भयो । पार्टीभित्र संसदीय दलको नेता फेर्नुपर्छ र आफैँ संसदीय दलको नेता बन्न लागेको कोइरालालाई बहुमत नपुग्ने भएपछि शान्त बसेका छन् । बहुमत जुटाउन उनले संस्थापन समूहलाई विश्वासमा लिने रणनीति बनाएका छन् । ११ माघको राष्ट्रियसभा चुनावमा उनले आफ्नो गृहप्रदेश कोशीमा सबैलाई मिलाएर लगेको प्रमाण बनाए ।

कोशीबाट आफ्नो समूहका नेता डा. मीनेन्द्र रिजाल आकांक्षी थिए । २०७९ मा भएको संघीय चुनावमा टिकट नपाएका रिजाल राष्ट्रियसभामा टिकटको स्वाभाविक दाबेदार थिए । यस्तोमा कोशी प्रदेशमा कांग्रेसको भागमा परेको एक सिटमा कांग्रेस नेता कृष्णप्रसाद सिटौलाले टिकट पाए । सुरुमा उनको नाममा असहमति रहे पनि पछि सिटौलालाई स्वीकार गर्ने पक्षमा इतर समूह गयो ।

रिजालले राष्ट्रियसभाको चुनावपछि मात्र टिकट नपाउनुको कारणबारे बोल्ने बताएका छन् । सिटौलालाई जिताउन उनीसहित कोइराला पनि खटिएका छन् । जसका लागि कोइरालाले निर्वाचन आचारसंहिताको पनि ख्याल गरेनन् । १० माघमा उनले कांग्रेसका जनप्रतिनिधिलाई चियापान कार्यक्रम गरेर विराटनगरमा राखे ।

चियापानमा उम्मेदवार सिटौलाको साथमा रिजाल, महामन्त्री थापा, संस्थापन पक्षका कोशी प्रदेशका नेताहरू रामहरि खतिवडा, मीन विश्वकर्मा, कोशी प्रदेश सभापति उद्धव थापालगायतका एक ठाउँमा उभिए, जसले कोइरालाले पार्टीभित्र बिगारेको सम्बन्ध सुधार गरेको जनाउँछ ।

मतदानस्थलमा पनि शेखर सक्रिय भएका थिए । कांग्रेसभित्रको घरझगडाले चुनावमा असर नपर्नेमा माओवादी नेताहरू ढुक्क छन् । आफ्ना उम्मेदवार जिताउन माओवादीका नेताहरू पनि विराटनगरमा जम्मा भएका छन् । उनीहरू यसपटक कांग्रेसले मत दायाँबायाँ नगर्नेमा ढुक्क देखिएका छन् ।

प्रकाशित मिति: बिहीबार, माघ ११, २०८० १४:४७