राजनीतिक पहुँच भएकालाई पक्राउ गर्न हिचकिचाउँछ प्रहरी, नेताका छोरादेखि सहकारी ठग्नेसम्म फरार सूचीमा

राजनीतिक पहुँच भएकालाई पक्राउ गर्न हिचकिचाउँछ प्रहरी, नेताका छोरादेखि सहकारी ठग्नेसम्म फरार सूचीमा

A+ A A-

कुनैअपराधमा संलग्न भएका र किटानी जाहेरी परेकाहरूलाई प्रहरीले पक्राउ गर्नुपर्छ । प्रहरीले नेपालमा नै रहेकाहरूलाई खोजी गरेर पक्राउ गर्छ भने अपराध गरेर विदेश भागेकाहरूको हकमा अन्तर्राष्ट्रिय प्रहरी संगठन इन्टरपोलको सहयोगमा पक्राउ गर्छ । तर, ठूला अपराधमा संलग्न भएर पनि राजनीतिक पहुँचमा रहेकाहरूलाई पक्राउ गर्न भने प्रही तर्किने गरेकाे छ ।

यसरी राजनीतिक पहुँचका भएका व्यक्तिहरू सार्वजनिक कार्यक्रममा देखिइरहे पनि प्रहरीले भने उनीहरूलाई फरार सूचीमा राख्ने गरेकाे छ । अझ कतिपय आराेपीहरू भने प्रधानमन्त्री, मन्त्रीसँग देखिन्छन् तर प्रहरी उनीहरूलाई सुरक्षा दिन्छ पक्राउ गर्दैन ।

पूर्वगृहमन्त्रीकै छाेरा फरार

नक्कली भुटानी शरणार्थी प्रकरणमा जोडिएका पूर्वगृहमन्त्री तथा एमाले उपाध्यक्ष रामबहादुर थापाका छोरा प्रतीक थापा पनि अहिलेसम्म प्रहरीको फरार सूचीमा छन् । तत्कालीन गृहमन्त्री थापाका सल्लाहकार रहेका इन्द्रजित राई पक्राउ परेपछि अनुसन्धान गर्दा प्रतीक पनि उक्त घटनामा संलग्न रहेको प्रमाण भेटिएपछि उनीविरुद्ध पक्राउ पुर्जी जारी भएको थियो । उनलाई प्रहरीले अहिलेसम्म पक्राउ गर्न सकेको छैन ।

उनी विदेशमा लुकेर बसेको आशंका प्रहरीले गरेको छ । उनलाई पक्राउ गर्नका लागि प्रहरीले इन्टरपोलको सहयोग मागेको छ । उनको नाममा पनि रेडकर्नर नोटिस जारी गरेको छ । इन्द्रजित राईका छोरा निरज राई पनि यही प्रकरणमा फरार छन् । उनीविरुद्ध पनि वैशाखमा पक्राउ पुर्जी जारी भएको थियो । तर, १० महिना बित्दा पनि प्रहरीले पक्राउ गर्न सकेको छैन ।

सुन प्रकरणका तीन जना आराेपी फरार

६० किलो सुन तस्करी प्रकरणमा २९ जनामध्ये जीवन चलाउने, अमला रोका र भोला साह सोनारगरी तीन जना अहिलेसम्म फरार छन् । चिनियाँ मूलका बेल्जियन नागरिक दावा छिरिङसँग विवाह गरेकी अमलाको घर रोल्पाको थवाङ हो । दावा–अमलाको विवाहले तस्करीको जालो माओवादीसम्म पुगेको बताइन्छ । अरु सबै पक्राउ पर्दा पनि अमला भने अहिलेसम्म पक्राउ परेकी छैनन् । उनको सम्बन्ध माओवादीका शीर्ष नेतासँग जोडिएको देखिन्छ । उनी पनि प्रहरीको फरार सूचीमा छिन् ।

उनी नेकपा माओवादी केन्द्रको रोल्पा–काठमाडौं सम्पर्क समन्वय समिति उपाध्यक्षसमेत थिइन् ।

खुलमखुल्ला हिँडे पनि प्रहरीले नदेखेकाे पञ्चा सिंह

१५ वर्षअघि कालीकोटका १७ वर्षीय युवक राजबहादुर मल्लको हत्यामा संलग्न भएको भन्दै माओवादी पार्टीको भ्रातृ संगठन अखिल क्रान्तिकारीकी केन्द्रीय अध्यक्ष पञ्चा सिंहसहित छ जनाको नाममा दाेस्राेपटक पक्राउ पुर्जी जारी भएको छ । पक्राउ पुर्जी जारी भएका सबै तत्कालीन अवस्थामा माओवादीका नेता कार्यकर्ता थिए ।

प्रहरीका अनुसार २०६५ फागुन २६ गते बेलुका ८ बजेतिर सुर्खेत बसपार्कमा राजबहादुर मल्लमाथि खुकुरी प्रहार भएको थियो । त्यसबाट गम्भीर घाइते भएका राजबहादुरको उपचारकै क्रममा मृत्यु भएको थियो । त्यही घटनालाई लिएर अहिले सुर्खेत जिल्ला अदालतले सिंहलगायतका नाममा पक्राउ पुर्जी जारी गरेको छ । तर, सिंहलाई अहिलेसम्म पक्राउ गरिएको छैन । सिंहलाई प्रहरीले फरारको सूचीमा राखेको छ । जबकी उनी दैनिक सार्वजिनक कार्यक्रममा सहभागी हुने गर्छिन् ।

माओवादी केन्द्रका अध्यक्ष पुष्पकमल दाहाल प्रचण्डको नेतृत्वमा सरकार छ । फरार सूचीमा रहेकी सिंह खुल्ला रूपमा राजनीति गरिरहेको भए पनि सरकारको दबाबका कारण पक्राउ नगरेको हाे ।

सुन तस्करीका १२ जनालाई प्रहरीले भेटेन

त्रिभुवन विमानस्थलबाट सुन तस्करी गर्दा बढी जोखिम हुन थालेपछि तस्करहरूले दोलखाको लामाबगर फलाक नाकाबाट तस्करी गरेकाे पाइयाे । उक्त नाकाबाट मंसिर पहिलाे हप्तामा ३३ किलो सुन भित्रिएको प्रहरी अनुसन्धानबाट पुष्टि भयाे । उक्त सुन तस्करीमा संलग्न १२ जना अझै फरार छन् । प्रहरीले ३३ किलो सुनमध्ये ११ किलो सुन र ५ सय ३२ ग्राम सुनका गहना दोलखाबाट बरामद गरेको थियो । उक्त प्रकरणमा संलग्नहरूलाई प्रहरीले खोजी गरिरहेको छ ।

सहकारीका महाठग जीबी पहिल्यै भागे

सूर्यदर्शन बचत तथा ऋण सहकारी संस्थाका पूर्वअध्यक्ष गितेन्द्रबाबु राई (जीबी राई)लगायतले बचतकर्ताको १ अर्ब ३५ करोड ५३ लाखभन्दा बढी रकम खाएर बेपत्ता भएका छन् । ओखलढुंगाका जीबी पछिल्लो समयमा उक्त सहकारीका संरक्षक हुन् । अर्का पूर्वअध्यक्ष भूपेन्द्र राई र हालका अध्यक्ष एवं व्यवस्थापक थानबहादुर बुढामगर कास्की प्रहरीको फरार सूचीमा रहेको कास्की प्रहरी प्रमुख एसपी मोहनकुमार थापाले बताए । राईले देशका विभिन्न शहरमा सहकारीकाे नेटवर्क बनाइ लाखाैँ बचतकर्तालाई बिचल्लीमा पारेका छन् ।

कास्की प्रहरी प्रमुख एसपी माेहनकुमार थाापले भने, ‘तीन जनाको नाममा डिफ्युजन नोटिस जारी गर्नलाई केन्द्रको सम्बन्धित विभागमा पत्र पठाएका छौँ । तीनै जना विदेशमा लुकीछिपी बसेको भन्ने सूचना पाएका छौँ । नेपालमा पनि खोजी कार्य जारी छ । विदेशमा भए पनि प्रक्रिया पुर्‍याएर अगाडि बढ्छौँ ।’

उनीहरू अहिले प्रहरीको फरार सूचीमा छन् । यो ठगी प्रकरण धेरै ठूलो हो । तर, मुख्य अभियुक्त भनिएका जीबी राईलाई अहिलेसम्म प्रहरीले पक्राउ गर्न सकेको छैन ।

जीबी राईको हकमा प्रहरीको केन्द्रीय कार्यालयले डिफ्युजनको नोटिस प्रक्रिया अगाडि बढाउन तयारी गरेको केन्द्रीय प्रवक्ता तथा प्रहरी नायब महानिरीक्षक भीमप्रसाद ढकालले बताए । उनले भने, ‘जीबी राईको हकमा डिफ्युजन नोटिसको प्रक्रिया अगाडि बढेको छ ।’

गत साउन २२ गते १ हजारभन्दा बढी बचतकर्ताले आफूहरू ठगिएको भन्दै प्रहरीमा उजुरी दिएका थिए । जीबीलगायतका विरुद्ध उजुरी परेपछि प्रहरीले अनुसन्धान थालेको थियो । राई लगायतका व्यक्तिहरू भने त्यतिञ्जेल फरार भइसकेका थिए । अहिले यो सहकारीका कोषाध्यक्ष कुमार रम्तेललगायत केही पदाधिकारी पक्राउ परेका छन् । प्रहरीले अध्यक्षसहित १९ जनालाई प्रतिवादी बनाएको छ ।

प्रकाशित मिति: बुधबार, माघ १०, २०८० १८:४५