कहिले व्यवस्थित बन्ला धनगढी बसपार्क ?

A+ A A-

सुदूरपश्चिम प्रदेशको अस्थायी राजधानी धनगढीको बसपार्कको अस्तव्यस्त छ । चार दशक अगाडि ५० बसका लागि बनाइएको धनगढी बसपार्कमा अहिले सयौं बस कोचेर राखिन्छ ।

सानो क्षेत्रफल भएको बसपार्क मुख्य बजारभित्रै पर्छ । जसले गर्दा सडक जामको समस्या विकराल बन्दै गएको छ भने दुर्घटनाको सम्भावना उत्तिकै बढ्दो छ ।

धनगढीमा सुदूरपश्चिम यातायातका मात्रै छ सय बस छन् भने कैलालीमै रहेका थप तीन वटा समितिका बस जोडेर १ हजार बढी बस सञ्चालनमा छन् । यस्तै, अन्य जिल्लाबाट आएर ओहोरदोहोर गर्ने गाडीको संख्या दैनिक १५ सयदेखि दुई हजार बढीको हाराहारीमा छ ।

नयाँ बसपार्क निर्माणको योजना डेढ दशकदेखि अलपत्र

बसपार्कलाई व्यवस्थित र सुविधासम्पन्न बनाउन भन्दै धनगढीमा नयाँ बसपार्क बनाउने योजना ल्याइयो । बारोडाँडीस्थित नेपाली सेनाको व्यारेक पछाडि सेनाकै संरक्षणमा रहेको जग्गामा बसपार्क बनाउने योजना अघि सारिएको थियो । तर, त्यहाँ बसपार्क वनाउने योजना जग्गासम्बन्धी विवादले रोकिएपछि नयाँ जग्गा खोज्ने काम अगाडि बढ्न सकेन । डेढ दशकसम्म पनि बसपार्क निर्माणका लागि सार्वजनिक जग्गा नपाउँदा बसपार्क निर्माणको काम अघि बढ्न नसकेको धनगढी उपमहानगरपालिकाका इन्जिनियर द्विजराज भट्टले बताए ।

दुई वर्ष अघिसम्म सेनाको संरक्षणमा रहेको जग्गामा बसपार्क बनाउने तयारी गर्दा अनुमति नदिएपछि काम अगाडि बढ्न सकेको थिएन । ‘सेनाले पनि सुरक्षाका दृष्टिकोणले राम्रो हुँदैन भनेर दिएन,’ इन्जिनियर भट्टले भने, ‘वनसँग पनि अनुमति माग गर्दा स्वीकृति नदिएपछि काम त्यसै रोकियो ।’ सो जग्गा वन क्षेत्रमा पर्छ ।पहिले सेनाले मौखिक रुपमा सहमति दिएपछि उपमहानगरपालिकाले ग्राभेल हालेर पार्किङ गर्न सुरु गर्न खोज्दा पछि सेनाले डोजर नै चल्न दिएको थिएन ।

त्यसयता बसपार्कका लागि जग्गा खोज्ने काम स्थगित गरिएको भट्टले बताए । पायक पार्ने ठाउँमा सार्वजनिक जग्गा अभाव भएकै कारण बसपार्क निर्माणको काम अलपत्र अवस्थामा रहेको उनको भनाइ छ ।

उपमहानगरपालीकाले पहल गरेन

दिनप्रतिदिन धनगढीमा गाडीको चाप बढ्दै जाँदा पनि धनगढी उपमहानगरपालिकाले बसपार्क निर्माणका लागि तदारुकता देखाएको छैन । बसपार्क निमार्णको लागी जग्गा नपाइएको भन्दै उपमहानगरपालिकाले टार्ने गरेको छ । इन्जिनियर भट्टले भने, ‘बसपार्कका लागि राजमार्ग नजिक र बजारभन्दा अलि टाढाको क्षेत्र आवश्यक हुन्छ, त्यसका लागि पनि कम्तीमा पाँच विघा जमिन चाहिन्छ ।’