कांग्रेस महासमिति बैठक नजिकिँदा सदस्य चयन हुनै बाँकी, माघ २० सम्म चयन गर्न परिपत्र

कांग्रेस महासमिति बैठक नजिकिँदा सदस्य चयन हुनै बाँकी, माघ २० सम्म चयन गर्न परिपत्र

A+ A A-

७ देखि १० फागुनसम्म हुने कांग्रेस महासमिति बैठकका लागि तयारीस्वरुप गोदावरीको हल बुक गरेको कांग्रेसले अझै २२ निर्वाचन क्षेत्रबाट महासमिति सदस्य छान्न सकेको छैन । हल बुक र बैठकमा पेस हुने प्रतिवेदन तयार भए पनि डेढ दर्जन जिल्लाबाट महासमिति सदस्य छनोट हुन बाँकी छ । महासमिति बैठक पार्टीको नीति अधिवेशनको जिम्मेवारी त छँदै छ, त्यसका अलावा महासमिति बैठकपछि मन्त्री फेरबदल गर्ने भएकाले आसन्न महासमिति बैठकलाई अझै महत्त्वका साथ हेरिएको छ । मंसिर २०७८ मा भएको १४औँ महाधिवेशनपछि कांग्रेसले पहिलाे महासमिति बैठक गर्दै छ ।

२०७९ मा तीनै तहको चुनावमा केन्द्रित हुँदा महाधिवेशनको ६ महिनाभित्र गर्नुपर्ने नीति अधिवेशन गर्न कांग्रेस असमर्थ भएको थियो । २०७९ पुस १० गते तत्कालीन गठबन्धन भत्किएपछि सत्तामा पुग्न कांग्रेस केन्द्रित भएको थियो ।

फागुन २५ मा भएको राष्ट्रपति चुनावमार्फत कांग्रेस सत्तामा फर्किएको थियो । सत्ता राजनीति, मन्त्री छनोट, नियुक्तिको मोलमोलाइमा भुलेको कांग्रेसले पछि महासमिति बैठकलाई त्यसको जिम्मा दियो । त्यसपछि सत्ता राजनीतिमा व्यस्त कांग्रेस अहिले पनि सत्ता राजनीतिमा व्यस्त बन्नुपर्ने अवस्थामा छ । किनकि प्रधानमन्त्री पुष्पकमल दाहाल प्रचण्डले मन्त्री फेरबदल गर्न कांग्रेसलाई पटक-पटक भनिसकेका छन् । आइतबार युगान्डाबाट फर्किएपछि पनि उनले सोही कुरा दोहोर्‍याएका छन् । मन्त्रीहरूसँग आर्थिक वर्षको पहिलो तीन महिनाको प्रगति विवरण मागेर प्रगतिबाट चित्त नबुझाएका उनले फेरि पनि मन्त्रीहरूको प्रगति विवरण माग्ने बताएका छन् ।

‘प्रधानमन्त्रीले केही मन्त्रीहरू फेर्न इच्छा गर्नुभएको छ । प्रधानमन्त्रीको एकवर्षे कार्यकाल पूरा हुँदा र हिजो युगान्डाबाट फर्किएपछि पनि त्याे कुरा गर्नुभयो । शीर्ष तहको भेटमा उहाँले कुरा राख्नुभएको छ । मुख्य दल कांग्रेसले गरौँ न त भनेपछि गर्ने होला,’ कांग्रेस प्रचार विभाग प्रमुख मीन विश्वकर्माले शिलापत्रसँग भने, ‘राष्ट्रियसभा चुनाव र महासमिति बैठकको ध्यान उतातिर मोडिन्छ । मन्त्री बन्ने भनेपछि दौडधुप अन्य विषयमा हुन्छ । त्यसैले महासमिति बैठकपछि गरौँ भन्ने हाम्रो धारणा छ ।’

पहिला कांग्रेसले महासमिति बैठक असोज १३, १४ र १५ मा गर्ने निर्णय गरेको थियो । त्यसपछि जाजरकोट भूकम्पको कारण देखाउँदै मंसिर २९ देखि पुस २ सम्म हुने गरी नयाँ मिति तय गरिएको थियो । त्यसपछि अर्को मिति पुस १६–१९ मा तय गरियो । त्याे मितिमा पनि बैठक भएन र कांग्रेसले आगामी फागुन ७ देखि १० मा महासमिति बैठक गर्ने निर्णय गरेको छ ।

‘महासमिति बैठकका लागि प्रतिनिधिहरूको नाम संकलन प्रक्रियामा छ । चुनाव नगरेकालाई निर्वाचन समितिमार्फत छिटो गराउनू भनेर ताकेता गरिरहेका छौँ । व्यवस्थापकीय पाटोमा गोदावरीको हलमा हुने भएकाले तयारी गरिरहेका छौँ,’ पार्टीका प्रचार विभाग प्रमुख विश्वकर्माले शिलापत्रसँग भने ।

महासमिति बैठकका लागि उपसभापति पूर्णबहादुर खड्काले नीतिगत, महामन्त्री गगन थापाले सांगठनिक र अर्का महामन्त्री विश्वप्रकाश शर्माले समसामयिक राजनीतिक मुद्दा समेटेर प्रतिवेदन प्रस्तुत गर्नेछन् । उपसभापति खड्काको नीतिगत प्रतिवेदन तयारीको अन्तिम चरणमा छ भने महामन्त्रीद्वयले सांगठनिक र राजनीतिक प्रतिवेदन तयार पारिसकेका छन् । ‘प्रतिवेदन तयारी यसअघिको मितिका लागि भइसकेको थियो । सबै प्रतिवेदनहरू लगभग तयार भइसकेका छन्,’ प्रचार विभाग प्रमुख विश्वकर्माले भने ।

उपसभापति खड्काको प्रतिवेदनमा पार्टीले लिने समग्र नीतिका बारेमा व्याख्या हुँदा महामन्त्री शर्माले गठबन्धन, सरकार, विपक्ष, पार्टीको गतिविधि, मुलुकको राजनीतिक अवस्थालगायतका विषयमा प्रतिवेदन तयार पारेका छन् । अर्का महामन्त्री थापाको प्रतिवेदनमा राजनीतिक र सांगठनिक कुराहरू समेटिएका छन् । महासमिति बैठकअघि एकपटक पार्टीको केन्द्रीय समिति बैठक बोलाउने तयारी कांग्रेसको छ । केन्द्रीय समितिबाट पास भएको प्रतिवेदन महासमिति बैठकमा पेस हुनेछ ।

विवादका कारण महाधिवेशनको समयमा २५ जिल्लामा मात्र महासमिति सदस्य चयन भएका थिए । कांग्रेस केन्द्रीय निर्वाचन समिति संयोजक खम्बबहादुर खातीका अनुसार अहिले १६५ निर्वाचन क्षेत्रमध्ये १४३ क्षेत्रमा महासमिति सदस्य चयन भएको छ । बाँकी क्षेत्रमा पनि माघ २० गतेभित्र चयन गरेर केन्द्रमा पठाउन परिपत्र गरिएको उनले बताए । ‘निर्णय गरेर माघ २० पछि आएका विवरण स्वीकृत हुँदैन भनेका छौँ । जिल्ला सभापतिहरूलाई क्षेत्र र जिल्लासँग संयोजन गर्न अनुरोध गरेका छौँ,’ संयोजक खातीले शिलापत्रसँग भने ।

काठमाडौंको ४, ५ र ६, सुनसरीको २, ३ र ४, मोरङको ३ र ५ नम्बर, सिन्धुलीको २ नम्बर, धादिङ १, महोत्तरीको १ नम्बर, बाराको ३ नम्बर, कञ्चनपुरको १, पर्साको १ र ३ दाङको १ र ३ नम्बर क्षेत्रमा पनि महासमिति सदस्य चयन गर्न बाँकी छ ।

त्यस्तै, भोजपुर, ओखलढुङ्गा, दोलखा, रामेछाप, पर्वत, अर्घाखाँचीका सात क्षेत्रमा महासमिति सदस्य चयन हुन सकेको छैन । ती क्षेत्रमा भएको प्रगतिबारेमा सोमबार निर्वाचन आयोगको बैठक बस्ने भनिए पनि नबसेको र मंगलबार बैठक बस्ने संयोजक खातीले जानकारी दिए ।

कांग्रेसमा प्रतिनिधिसभा निर्वाचन क्षेत्रबाट ११ जना महासमिति सदस्य छनोट भएर आउने व्यवस्था छ । एक क्षेत्रबाट दुई महिलासहित प्रत्यक्ष ७ जना, महिला, दलित, आदिवासी जनजाति, खस आर्य, मधेसी, थारू, मुस्लिम र पिछडिएका वर्गबाट जनसंख्याको बनोटका आधारमा चार जना समानुपातिक समावेशी सिद्धान्तअनुसार छनोट हुन्छन् । यसरी १६५ वटा निर्वाचन क्षेत्रबाट मात्रै १८ सय १५ महासमिति सदस्यको प्रतिनिधित्व हुनेछ  ।

त्यस्तै, केन्द्रीय कार्यसमितिका वर्तमान तथा पूर्वपदाधिकारी तथा सदस्य, निर्वतमान महासमिति सदस्य तथा भ्रातृ तथा जनसम्पर्क समितिबाट पनि महासमितिका लागि प्रतिनिधि छानिने व्यवस्था छ ।

प्रकाशित मिति: सोमबार, माघ ८, २०८० २१:०५