एक सयदेखि तीन सय शय्यासम्मका सरकारी अस्पतालहरूमा सरकारले नर्सिङ अध्यापन गराउने

एक सयदेखि तीन सय शय्यासम्मका सरकारी अस्पतालहरूमा सरकारले नर्सिङ अध्यापन गराउने

A+ A A-

सरकारले १ सयदेखि ३ सय शय्यासम्मका सरकारी अस्पतालहरूमा नर्सिङ अध्यापन गराउने भएको छ । सोमबार प्रतिनिधिसभाअन्तर्गतको शिक्षा, स्वास्थ्य तथा सूचना प्रविधि समिति बैठकमा स्वास्थ्य तथा जनसंख्या मन्त्रालयका सचिव डा. रोशन पोखरेलले १ सयदेखि ३ सय बेडसम्मका सरकारी अस्पतालहरूमा नर्सिङ पढाउने बोर्डले निर्णय गरेको जानकारी दिए ।

१ सयदेखि ३ सय शय्यासम्मका सरकारी प्रदेश तथा क्षेत्रीय अस्पतालहरूमा राज्यले दायित्व लिएर नर्सिङ पढाउने तयारी गरेको पोखरेलले बताए । आगामी तीन दिनभित्र निर्णयको लागि मन्त्रिपरिषदमा लैजाने उनको भनाइ छ ।

‘स्वास्थ्य मन्त्रालयले १ सय देखि ३ सय बेडसम्मका सरकारी अस्पतालहरूमा नर्सिङ पढाउने गरी बोर्डले पास गरेका छौँ । अबको तीन दिनभित्र मन्त्रिपरिषद्‌मा लैजान्छौँ,’ पोखरेलले भने, ‘हामी के चाहन्छौँ भने १ सय वा २ सय बेड भएका अस्पतालहरूमा प्रत्येक प्रदेश वा साविकका अञ्चल अस्पतालहरूमा राज्यले दायित्व लिएर नर्सिङ पढाउँछौँ ।’

३ सय शय्याका अस्पतालहरूका एमबीबीएस शिक्षा पनि दिने तयारी रहेको पोखरेलले बताए । नर्सिङ पढाउनेलाई स्टाफ र ब्याचलर नर्स दुई कोर्ष एउटै अस्पतालमा पढाउनुपर्ने व्यवस्था गर्ने उनको भनाइ छ ।

‘३ सय बेडका अस्पतालहरूका एमबीबीएस शिक्षा नै गर्छौं । नर्सिङ पढाउनेलाई स्टाफ र ब्याचलर नर्स दुईवटै भनेका छौँ । दुई तहलाई दुईवटा अस्पताल दिन सकिँदैन,’ पोखरेलले भने, ‘३ सय बेडका ठूला अस्पतालहरूले स्टाफ नर्स पढाउन छोड्न नहुने भनेका छौँ ।’

दुई तहलाई दुईवटा अस्पताल दिन सक्ने अवस्था नभएको पोखरेलको भनाइ छ । १५ शय्यासम्मका स्थानीय तहका अस्पतालहरूमा एमबीबीएस डाक्टर सरकारले पठाउन नसक्ने उनको भनाइ छ ।

स्वास्थ्य मन्त्रालयसँग भएको २६ सय दरबन्दीमा सबै पूरा रहेको भन्दै नयाँ जनशक्ति लिन सक्ने अवस्था नभएको पोखरेलको भनाइ छ । स्वास्थ्य मन्त्रालयले लोक सेवा आयोगमार्फत प्रत्येक वर्ष केन्द्रीय दरबन्दीमा २० जनासम्म मेडिकल अफिसर लिइरहेको उनको भनाइ छ ।

‘१५ बेडसम्मका अस्पतालहरूमा एमबीबीएस डाक्टर पठाउन सक्दैनौँ । त्यहाँ सरकारले पठाउने भनेकै स्टाफ नर्स हो । स्वास्थ्य मन्त्रालयसँग भएको २६ सय दरबन्दीमा सबै पूरा छ,’ पोखरेलले भने, ‘लोक सेवा आयोगमा प्रत्येक वर्ष केन्द्रीय दरबन्दीमा २० जनासम्म मेडिकल अफिसरका लागि भर्ना खालेका छौँ ।’

सचिव पोखरेलले चालु आर्थिक वर्षको स्थास्थ्य मन्त्रालयको ४९ अर्ब ८० करोड बजेटमा पछिल्लो ६ महिनामा १० अर्ब ४१ करोड अर्थात करिब २१ प्रतिशत खर्च भएको बताए । चालुतर्फको ३७ अर्ब रुपैयाँमा ७ अर्ब ९० करोड र पुँजीगततर्फ १२ अर्ब ७३ करोडमा २ अर्ब ५१ करोड गरी २० प्रतिशत पुँजीगत खर्च भएको उल्लेख गरे ।

धेरै आयोजनाहरूको टेन्डर प्रक्रिया अगाडि बढिसकेको तर वैदेशिक खर्च २९ प्रतिशत हिस्सा बजेटमा भए पनि खर्च नहुँदा पुँजीगत खर्च कम देखिएको उनको भनाइ छ । उनले मन्त्रालयको भौतिक प्रगतिमा कार्यक्रम सम्पन्न भएका ४८.३ प्रतिशत रहेको उनको भनाइ छ ।

प्रकाशित मिति: सोमबार, माघ ८, २०८० १७:१५