मातेको सुरमा भाञ्जीलाई बलात्कार, चिच्याएपछि आफन्तले उद्धार गरे

A+ A A-

प्रहरीले पीडितको गोपनीयता कायम राख्दै दिएको नाम हो– ‘१७१ देवचुुली (क) ।’ उनी बौद्धिक अपाङ्गता भएकी युवती हुन् । २५ वर्षीय उनकाे घर नवलपुरमा छ ।

घटना गत ५ पुसको हो । उनकी आमा गाउँमै आफन्तको बिहेमा गएकी थिइन् । बुुबा बाख्रा चराउन बनतिर गएका थिए । घरमा बुुढी हजुरआमा र उनी मात्रै थिइन् । उनीहरूको घरदेखि केहीमाथि ठूली आमाको घर छ । त्यहाँ जान उनलाई मन लाग्यो । दिउँसो करिब ३ बजेपछि उकालो लागिन् ।

बाटैमा नवलसिंह बराल भेटिए । साइनोमा अलिक टाढाको भए पनि नवलसिंहलाई मामा भन्छिन्, पीडित । तर, त्यस दिन नवलसिंह भाञ्जीकै अस्मिता लुटेरा बने ।

प्रहरीसँग पीडितले गरेको बयानअनुसार, ठूली आमाको घर जाँदै गर्दा कताबाट आएर नवलसिंहले अचानक हातमा समाती बाटोदेखि मुनि रहेको बिरौटा खोल्सामा लगे। र, जबर्जस्ती गर्न थाले । त्यसबेला उनी चिच्याइन्, रोइन् । त्यही सुनेर ठूली आमा घटनास्थलमा आइपुगिन् ।

जिल्ला सरकारी वकिल कार्यालय नवलपुरले शुक्रबार जिल्ला अदालतमा दायर गरेको अभियोगपत्रमा उल्लेखित बयानमा पीडितले प्रहरीसँग भनेकी छिन्, ‘म रोइकराई गरी प्रतिकार गर्दा पनि निजले मलाई नछोडी करणी गरिरहे । म रोइकराई गरेको ठूलो बाबुले सुनी थाहा पाएदेखि ठूली आमा आई निज नवलसिंह बरालले मलाई करणी गरिरहेकै अवस्थामा छुटाउनु भएको हो ।’

पीडितका अनुसार यसपछि उनी घर गइन् । साँझ बिहेबाट आमा आइपुगेपछि आफू बलात्कृत भएको बताइन् । आमाले नवलसिंहविरुद्ध प्रहरीमा जबर्जस्ती करणी (बलात्कार)सम्बन्धी जाहेरी दिएकी हुन् । जाहेरीकै आधारमा प्रहरीले नवलसिंहलाई पक्राउ गरेको छ ।

बयानका क्रममा उनले आफू मादक पदार्थको अम्मली भएको बताएका छन् । घटनाको दिन पनि बिहानैदेखि रक्सी खाएको उनको भनाइ छ । दिउँसो भने खाना खाएर घाँस काट्न जाने क्रममा पीडितलाई देखेको र खोल्सामा लगेर करणी गरेको स्वीकारेका छन् । उनका अनुसार, त्यहीबेला स्थानीयले थाहा पाएका हुन् ।

‘...करणी गर्दैगर्दा पीडित चिच्याएपछि घटनास्थल नजिकै रहेका स्थानीय मानिसहरूले थाहा पाई हामी भएको स्थानमा आएर छुट्याएका हुन्’, प्रहरीसँग नवलसिंहले बयान दिएका छन् । उनले मादक पदार्थकाे नसाको सुरमा बलात्कार गरेको बताएका छन् ।

यो घटनाको अनुसन्धान गरेर प्रहरीले बुझाएको प्रतिवेदनका आधारमा आज सरकारी वकिल कार्यालयले जिल्ला अदालत नवलपुरमा नवलसिंहविरुद्ध मुद्दा दायर गरेको छ ।

सहायक जिल्ला न्यायाधिवक्ता खडानन्द पोखरेलले मुलुकी अपराध संहिता २०७४ को दफा (२१९) अन्तर्गतको (ङ) अनुसार ७–१० वर्ष र सोही दफाको उपदफा ७ अनुसार थप पाँच वर्षसम्म कैद सजायसहित तीन लाख रुपैयाँ क्षतिपूूर्ति माग दाबी गरेको बताएका छन् ।

प्रकाशित मिति: शुक्रबार, माघ ५, २०८० १७:५५