नामकाे मन्त्रीस्तरीय बैठकमा परराष्ट्रमन्त्रीले भने- हामी कुनै पनि देशकाे सैन्य गठबन्धनमा सहभागी हुँदैनाैँ

नामकाे मन्त्रीस्तरीय बैठकमा परराष्ट्रमन्त्रीले भने- हामी कुनै पनि देशकाे सैन्य गठबन्धनमा सहभागी हुँदैनाैँ

A+ A A-

परराष्ट्रमन्त्री एनपी साउदले युगान्डामा आयोजित असंलग्न आन्दोलनका सदस्य राष्ट्रहरूको मन्त्रीस्तरीय बैठकमा सम्बोधन गरेका छन् ।

असंलग्न आन्दोलनका सदस्य राष्ट्रहरूको १९औँ शिखर सम्मेलन माघ ५ र ६ गते युगान्डाको राजधानी कम्पालामा आयोजना हुँदै छ । सोही कार्यक्रममा भाग लिन पुगेका परराष्ट्रमन्त्री साउदले बिहीबारसम्म चल्ने मन्त्रीस्तरीय बैठकमा साझा विश्वव्यापी समृद्धिका लागि गहिरो साझेदारी हुनुपर्ने बताए ।

वर्तमान समयमा युगान्डा असंलग्न आन्दोलनका सदस्य मुलुकहरूको अध्यक्ष हो । सन् २०२२ देखि २०२५ सम्म युगान्डा अध्यक्ष रहनेछ । यसअघि सन् २०१९ देखि २०२२ मा कोरोना महामारीका बाबजुद असंलग्न आन्दोलनलाई कुशल तरिकाले नेतृत्व गरेको भन्दै साउदले अजरबैजानको प्रशंसा गरे ।

असंलग्न आन्दोलनको ७ दशकमा सदस्यराष्ट्रहरू साझा मूल्यहरूप्रति सचेत रहेको र त्यसैले आफूहरूलाई एकताबद्ध गरेको उनको भनाइ थियो । यस अवधिमा आफूहरूले सधैँ राष्ट्रिय सार्वभौमसत्ता, क्षेत्रीय अखण्डता, राजनीतिक स्वतन्त्रता, आत्मनिर्णय, पारस्परिक सम्मान र लाभसाथै अन्तर्राष्ट्रिय सम्बन्धमा शान्ति, सद्भाव, समानता, मर्यादा र न्यायको खोजी गरिएको उनको भनाइ थियो ।

उनले असंलग्न आन्दोलन ध्रुवीय पूर्वाग्रहबाट मुक्त एक शक्तिशाली राजनीतिक आवाज बनेकोमा जोड दिए । साउदले गाजामा जारी युद्ध, युक्रेन युद्धलाई इंगित गर्दै विश्वले खराब परिस्थितिको सामना गरिरहेको बताए । उनले कोरोना महामारी, जलवायु परिवर्तन, युद्ध, मूल्यवृद्धि, मुद्रास्फीति, ऋणको भारीहरू विश्वका लागि चुनौती भएको पनि उल्लेख गरे ।

असंलग्न आन्दोलनले आगामी दिनमा बहुपक्षीयता प्रवर्द्धन गर्न, संयुक्त राष्ट्र संघको बडापत्र र अन्तर्राष्ट्रिय कानुनको रक्षा गर्न, विवादहरूको शान्तिपूर्ण समाधान खोज्न, विश्वव्यापी वित्तीय संरचना सुधार गर्न, साझा समृद्धिका लागि न्यायपूर्ण विश्वव्यापी आर्थिक व्यवस्था सिर्जना गर्न निर्णायक भूमिका खेल्नुपर्ने परराष्ट्रमन्त्री साउदले बताए ।

उनले सो क्रममा नेपालले कहिल्यै कुनै सैन्य गठबन्धनमा सामेल नहुने पनि बताए । साउदले भनेका छन्, ‘हामी कुनै पनि सैन्य गठबन्धनमा सामेल हुँदैनौं र कुनै पनि देशको सुरक्षा सम्झौताको हिस्सा हुन कहिल्यै स्वीकार गर्दैनौँ ।’

प्रकाशित मिति: बुधबार, माघ ३, २०८० १८:१५