माघ तेस्रो साता दैलेख महोत्सव हुँदै

A+ A A-

दैलेखमा दैलेख महोत्सव आयोजना हुने भएको छ । दैलेख उद्योग वाणिज्य संघ र नेपाल उद्योग वाणिज्य महासंघको समन्वयमा यही माघ २६ देखि फागुन ६ गतेसम्म दैलेख महोत्सव २०८० आयोजना हुने भएको हो ।

नेपाल उद्योग वाणिज्य महासंघको समन्वयमा दैलेख उद्योग वाणिज्य संघका तर्फबाट आज महासंघ सचिवालयमा आयोजना गरिएको पत्रकार सम्मेलनमा उक्त जानकारी दिइएको हो ।

आयोजक संघका अध्यक्ष कुलबहादुर विकका अनुसार, दैलेख जिल्लाको उद्योग, व्यापार, पर्यटन, कृषि, शिक्षा, स्वास्थ्य र सांस्कृतिक क्षेत्रको प्रवर्द्धन गर्दै आर्थिक स्तर उकास्न र स्थानीय प्राकृतिक स्रोत सम्पदाको प्रवर्द्धनमार्फत आर्थिक गतिविधि विस्तार एवं लगानी आकर्षण गर्ने उद्देश्यले उक्त महोत्सव आयोजना गर्न लागिएको हो ।

महोत्सवमार्फत स्थानीय आन्तरिक बजार सवलीकरणका लागि व्यावसायिक उत्थान तथा निकासीयोग्य वस्तुमा जोड दिइने उनले बताए ।

धार्मिक पर्यटकीय स्थलहरूको प्रचार प्रसारको माध्यमबाट आन्तरिक तथा बाह्य पर्यटक आकर्षण गर्ने, जिल्लाको कला संस्कृति तथा स्थानीय लोक संस्कृतिको संरक्षण तथा उजागर गर्ने, हस्तकला व्यवसायको प्रवर्द्धन गरी लगानीका अवसरहरू जुटाउने, कृषिउपजहरूको बजार प्रवर्द्धन गर्ने मेलाको मुख्य उद्देश्य रहेको विकको भनाइ छ ।

पत्रकारमा महासंघका उपाध्यक्ष सुरकृष्ण बैद्यले मेला महोत्सवबाट स्थानीय उत्पादनको बजार प्रवद्र्धनसहित समग्रमा स्थानीय जनताको आर्थिक उत्थानमा सहयोग पुुग्ने दाबी गरे । उनले मेला महोत्सवको आयोजनालाई महासंघले विशेष प्राथमिकता दिएको पनि स्पष्ट पारे ।

दैलेख जिल्लाका सांसदहरू सीता राना र सूर्यकुमारी श्रेष्ठले महोत्सवको सफल आयोजनामा आफ्नो तर्फबाट सहयोग हुने प्रतिबद्धता जनाए ।

प्रकाशित मिति: बुधबार, माघ ३, २०८० १७:२८