गंगालाल हृदय केन्द्रको कार्यकारी निर्देशकमा मल्ल नियुक्त, यी हुन् मन्त्रिपरिषद्का ६ निर्णय

गंगालाल हृदय केन्द्रको कार्यकारी निर्देशकमा मल्ल नियुक्त, यी हुन् मन्त्रिपरिषद्का ६ निर्णय

A+ A A-

सरकारले शहीद गंगालाल राष्ट्रिय हृदय केन्द्रको कार्यकारी निर्देशकमा डा. रवि मल्ललाई नियुक्त गरेको छ ।

बुधबार बसेको मन्त्रिपरिषद् बैठकले डा. मल्ललाई शहीद गंगालाल राष्ट्रिय हृदय केन्द्रको कार्यकारी निर्देशकमा नियुक्त गर्ने निर्णय गरेको सञ्चार तथा सूचना प्रविधिमन्त्री रेखा शर्माले जानकारी दिइन् ।

यस्तै, बैठकले नरदेवी आयुर्वेद चिकित्सालय विकास समितिको अध्यक्षमा रमेशचन्द्र न्यौपानेलाई नियुक्त गर्ने निर्णय गरेको मन्त्री शर्माले बताइन् ।

यस्तै, मन्त्रिपरिषद् बैठकले सांस्कृतिक संस्थानको महाप्रबन्धकमा किरणबाबु पन्तलाई नियुक्त गरेको छ ।

महाप्रबन्धकमा नियुक्त पुन रुकुमपश्चिमको सानीभेरी गाउँपालिका- ६ का हुन् । बैठकले नागरिक लगानी कोषको रिक्त कार्यकारी निर्देशकमा पर्वतकुमार कार्कीलाई नियुक्त गर्ने निर्णय पनि गरेको सरकारकी प्रवक्तासमेत रहेकी मन्त्री शर्माले जानकारी दिइन् ।

यी हुन् मन्त्रिपरिषद् बैठकका निर्णय

१. नागरिक लगानी कोषको रिक्त कार्यकारी निर्देशक पदमा श्री पर्वतकुमार कार्कीलाई नियुक्त गर्ने ।
२. आर्थिक कार्यविधि तथा वित्तीय उत्तरदायित्व ऐन, २०७६ लाई संशोधन गर्न बनेको अध्यादेश, २०८० जारी गर्न नेपालको संविधानको धारा १२४ को उपधारा (१) बमोजिम राष्ट्रपतिसमक्ष सिफारिस गर्ने ।
३. राजनीतिक दलसम्बन्धी ऐन, २०७३ लाई संशोधन गर्न बनेको विधेयक संघीय संसद समक्ष पेश गर्न स्वीकृति दिने ।
४. सांस्कृतिक संस्थानको रिक्त महाप्रबन्धक पदमा सानीभेरी गाउँपालिका वडा नम्बर ६ रुकुमपश्चिमका श्री किरणबाबु पुनलाई नियुक्त गर्ने ।
५. नरदेवी आयुर्वेद चिकित्सालय विकास समितिको अध्यक्ष पदमा श्री रमेशचन्द्र न्यौपानेलाई मनोनयन गर्ने ।
६. सहिद गंगालाल राष्ट्रिय हृदय केन्द्रको कार्यकारी निर्देशक पदमा डा. रवि मल्ललाई नियुक्त गर्ने ।

प्रकाशित मिति: बुधबार, माघ ३, २०८० १७:१०